Jagə 5

1Ɓisine ɗaa, sisəy njenekingaje, ꞌnoje gə ꞌkuwi ta-si gə, mba nekəmandooje gə d-a ce dɔ-si gə. 2Nekinga lə-si ndum mbudugu ngaɓa yo̰je d-o̰ kubuje lə-si tɔlɔg-tɔlɔg. 3Maa lə-si gə lar lə-si ɔbə ɓar, ɗaa kɔbəɓar lə-je le, a təl to tar naji gə a kila tar dɔ-si gə ngaɓa a ro darɔ-si pulug-pulug to gə pər be. ꞌKəmələje nekingaje gə dɔ naa gə dɔ naa gə dɔ ɗudu ndɔje gə nee! 4Dəwje gə d-unja ko ndɔɔ lə-si le, uwaje nekuga dɔjije kɛgə ꞌtoje nee le, ɗaa ꞌno ngaɓa bangə no oso mbi Mbayɓe gə ꞌɓəə njeɗɔje. 5Ubaje may dɔ nangə nee, ngaɓa isije dan nemayje gə dana badagə, uulje rɔ-si to gə d-uul ne da mba tɔl-ɛ be. 6Ilaje tar dɔ dəw gə gadə-gadə gə, ꞌtɔl-ɛje; n-ar gədərə no-si gə ang.

Tar ndəjije dang-dang

7Ngan ko̰-mje, uwaje mə-si ndəər, saar ndɔ ɗe lə Mbayɓe. Oje njendɔ ngəbə kandə ne gə ar yororo gə ye gə dubu nangə, uwa məndəər saar kar-ɛ inga man nji gə dɔngɔr, gə ta ngaw nji gə, gə ye gə ɗudu gə dɔ nay gə. 8Sisəy kara, uwaje mə-si ndəər, oreje ur-si ndəng, mba ndɔ ɗe lə Mbayɓe aw ɗe dəb ngaa.

9Ngan ko̰-mje, ꞌpaje tar gə kṵra̰y dɔ naa gə yo gə ne ang, mba kar Luba gangə ne tar dɔ-si gə ang. Oje, nje gangə tar le ar ta kəy gə nee. 10Ngan ko̰-mje, unje ne kɔji mar-ɛ dɔ ꞌməsərə gə gə kuwa məndəər lə pajambərəje gə ꞌpa tar gə ri Mbayɓe. 11Oje, tar gə ja pa ɓa nee: Nokarə to ɔji dɔ dəwje gə d-uwa gədərə. Oje tar lə Job gə uwa gədərə, gə ne gə Mbayɓe ɗa ar-ɛ gə ɗudu, mba Mbayɓe to nje ko kəmtondoo, gə nje bḭ man no kəm dəwje gə.

12Dɔngɔr ne tɔ̰y ɗaa, ngan ko̰-mje, ꞌnajije gə dara ang nəm gə nangə ang nəm, gə pa naji gə ɗangə ang nəm tɔ. May kar tar lə-si to oyo nama oyo, a ɓo ə̰ə̰ə̰ nama ə̰ə̰ə̰ mba kar tar gangə uwa dɔ-si ang.

13Se dəw kara horo-si gə isi dan ꞌməsərə gə wa? May kar-ɛ dəji Luba. Se dəw kara isi dan rɔləl gə wa? May kar-ɛ ɔsə pa. 14Se dəw kara horo-si gə rɔ-ɛ to-e wa? May kar-ɛ ɓar ngatɔgəje gə Mbo̰ naa lə njetakagəje ɗaa d-a kuwa dɔ-ɛ gə ubu gə ri Mbayɓe, dəji ne Luba ɔji dɔ-ɛ. 15Dəji Luba gə takagə le a kaji dəw gə rɔ-ɛ to-e ɗaa Mbayɓe a kun-e kur-e taar, a ɓo n-ɗa neɗa gə kṵra̰y nama d-a kɔr tar dɔ-ɛ gə.

16ꞌPaje tar neɗa gə kṵra̰y lə-si gə ɗaga no naa gə ɗaa dəjije Luba ɔji dɔ naa gə yo gə nee, mba kar ajije ne. Dəji Luba lə dəw gə gadə-gadə le, ɓar mii ngaɓa tɔg-e to ya̰ tɔ. 17Eli to dəw to gə sijee be ja: n-dəji Luba ngɔɔgɔ-ngɔɔgɔ kar nji ər ang ɗaa, man nji oso nangə cɛ̰ng ang saar ɗa ɓal munda gə nay misa̰. 18Cibi n-təl n-dəji Luba to gə ɗangə ngaɓa kəm dara cɛ̰ ar nji ər ɗaa dɔ nangə kuja rɔ-ɛ ar kandə neje cee.

19Ngan ko̰-mje, to gə ɓo dəw kara horo-si gə ndəəm aw əw gə tar gə tɔgərɔ, ɓa ɓo dəw gə ɗangə təl sə-a kəne nama, 20ꞌgərəje to gə dəw gə nje təl gə njeneɗa gə kṵra̰y ɗəw ndəəm gə lə-a ɗe sə-a le, a t-ɛ ta yo gə, ngaɓa a kudu dɔ neɗaje gə kṵra̰y bula tɔ.

Currently Selected:

Jagə 5: lap

Highlight

Copy

Compare