Jagə 2

Tar kɔr kəm naa

1Ngan ko̰-mje, takagə Mbayɓe lə-si Jeju Kirisi gə njerɔnduba gə ꞌtaje le, ꞌjungərije gə kɔr kəm dəwje ang.

2J-unje ne kɔji mar-ɛ: To gə ɓo dəw kara gə ula ꞌninga maa gə kubu gə bḭ may rɔ-ɛ gə ɗe nee kəy nendo gə lə-si, ngaɓa njendoo gə ula kubu gə ngisi wunji-wunji ce lo mbo̰ naa gə lə-si; 3a to gə ɓo kəm-si to gə dɔ njekubu gə bḭ may gə ɓa ꞌpaje ar-ɛje na: ꞌI, ꞌɗe isi lo gə to gə kəm-e nee! Ɗaa ꞌpaje ar-je njendoo na: ꞌI, ꞌɗe ar dɔ gɔl-i gə taar nee ose: ꞌI, isi lo tula gɔl-m gə nangə nee. 4Sisəy ɔrəje kəm naa horo-si gə ang ɓa kən wa? Ose ɔrəje kəm ne gə go tar kəji gə kṵra̰y ang wa?

5Ngan ko̰-mje gə m-njigi-si ya̰, ꞌtugaje mbi-si oje: Se Luba ja ɓa mbərə nje gə ꞌto gə njendooje kəm dəwje gə dɔ nangə nee ɓa mba kar ꞌtəl to gə bawje ɗəw takagə, ngaɓa gə nje kuwa nendubaje gə mə ɓeko̰ gə lə-a, gə n-uwa dɔ gɔl-ɛ n-ngəbə nje gə ꞌnjigi-e le ang wa? 6Ngaa sisəy ilaje rɔ kul dɔ njendooje gə! Se bawje le ɓa d-ula kəm-si ndoo ang wa? ꞌJejee nee le ja cibi ɓa d-aw gə si nadə gangə tar gə le ang wa? 7ꞌJejee le ja ɓa ꞌtaji ri gə may pɛdə gə to dɔ-si gə le ang wa? 8Tɔgərɔ ja, to gə ɓo sisəy ilaje kuji dɔ torondu gə ur dɔ mar-ɛje tɔ̰y, gə go tar gə Mbede pa na: ꞌNjigi njemar-i to gə darɔ-i be nama, ꞌɗaje gə dɔ gɔl-ɛ ja. 9Ngaa to gə ɓo sisəy ɔrəje kəm dəwje nama, ɗaje neɗa gə kṵra̰y, ɗaa torondu ila tar dɔ-si gə to gə sisəy ꞌtoje gə njekal tarje. 10Be ɓa, dəw gə ɗa-ɗa gə a dɔ torondu gə t-ɛ ləm-ləm ngaa ɗa neɗa gə kṵra̰y ɔji dɔ ye gə kara baa ja kara, tar uwa dɔ-ɛ ɔji dɔ ye gə kɛm tɔ̰y ja. 11Mba dəw gə pa na: A ɓogo lo to ang le, pa cibi tɔ pa na: ꞌTɔl dəw ang. A to gə ɓo ꞌɓogo lo to ang a ɓo ꞌtɔl dəw nama, ꞌtəl to njekal dɔ torondu. 12ꞌPaje tar gə ꞌɗaje ne to to gə dəwje gə d-a gangə tar dɔ-je gə ɔji go torondu dɔ to doy. 13Mba ndɔ gangə tar le, ko kəmtondoo lə dəw gə o kəmtondoo ang le godo; ngaa dəw gə o kəmtondoo le, ye ɓəəl lo gangə tar ang.

Takagə gə kula ɗa

14Ngan ko̰-mje, dəw gə pa na n-ta kagə ngaa kul-ɛ godo le se may lə-a to gə ɗi wa? To gə be ngaa se takagə ne le a kaj-ɛ ja wa? 15To gə ɓo ngon ko̰-si gə jene kara ose ngon ko̰-si gə jingaw kara ꞌlal kubu gə ꞌlal nekusa gə ndɔ tɔ̰y, 16a ɓo dəw kara horo-si gə pa ar-je na: Awje gə maj-ɛ, ar-je rɔ-si nunga soo ngaɓa ar-je nekusa ləl ta-si gə tɔ, lal kar-je ne gə d-a la ne gə rɔ-je le se, may lə-a to ɗi wa? 17Takagə kara to to gə be tɔ: To gə ɓo kul-ɛ godo nama, uy mbudugu. 18Ngaa dəw kara a pa na: ꞌI ꞌta kagə, ꞌma m-aw gə kula ɗa-m tɔ. ꞌTɔji-m takagə lə-i gə lal kul-ɛ ar-m m-o nama, ꞌma m-a tɔji-i kula ɗa-mje gə ɗəw takagə gə lə-m kar-i o tɔ. 19ꞌTa kagə to gə Luba kara baa ɗəgədə wa? ꞌƊa gə dɔ gɔl-ɛ ja. Njilje gə kṵra̰y kara ꞌta kagə to gə bənəng tɔ, ɗaa ꞌɓəəl d-isa baa ɗɛgə-ɗɛgə. 20Ngaa ꞌi gə ɛɓɛ, ꞌnjigi gərə to gə takagə le, kula ɗ-ɛ godo nama aw kadə baa ang wa? 21Bɔ-sijee Abəraham le, kula ɗ-ɛ ɓa d-unda-a ne gə dəw gə dana gadə, mba ngon-e Ijagə gə n-un-e n-ar no kɔgə le ang wa? 22ꞌI o to gə takagə lə-a le aw naa gə kara baa gə kula ɗ-ɛ, ngaɓa kula ɗ-ɛ le gɔl takagə lə-a ar-ɛ may ɔr sṵra̰. 23Be ɓa tar gə Mbede pa le aw ne lo-e gə: Abəraham ta kagə Luba, ɗaa d-o-e ne gə dəw gə gadə-gadə, ɗaa ꞌɓar-ɛ ne njekura lə Luba. 24Oje to gə ɗəw kula ɗa gə le tɔ ɓa d-o ne dəw gə dəw gə dana gadə-gadə, ɓo gə mba takagə ja kara baa ang. 25Ɗəw kara baa to gə Rahabə, gə kaya jene le, kula ɗ-ɛ ɓa d-o-e ne gə dəw gə dana gadə-gadə, mba kuwa gə n-uwa nje gə d-ulaje gə rɔ-ɛ gə ngaɓa ꞌtɔji-je ɗəw gə ɗangə n-ar d-aw ne le ang wa? 26Be ɓa, ɗəw kara baa to gə darɔ dəw gə njil godo kəne nama uy mbudugu le, takagə gə kul-ɛ godo nama uy mbudugu tɔ.

Currently Selected:

Jagə 2: lap

Highlight

Copy

Compare