Ebərəje 5

1Buba njekapolo gə ɗa-ɗa kara d-ɔr-ɛ horo dəwje gə ngaɓa d-unda gə njekula lə Luba ɔji dɔ dəwje, mba kar n-un nepolo gə nekarə mba neɗaje gə kṵra̰y. 2Mba ꞌne n-gərə ne gə ꞌɓar-e tɔgə godo le ɗaa, n-asə gərə tar lə nje gə ꞌɗa ne dɔ mbə gə njendəəmje gə maj-ɛ. 3Ngaɓa mba tɔgə godo nee le ja, n-a kun ne nepolo gə ɔji dɔ darɔ-ɛ gə kar dəw mə ɓeje mba neɗa gə kṵra̰y.#5.3 Voir Nll 9.7.

4To tar lə dəw mba kar ɗɔy darɔ-ɛ gə buba njekapolo nee le ang, may kar Luba ja ɓar-ɛ, to to gə ɓar ne Aro̰ be ɓa. 5Be ɓa Kirisi ja kara ila riɓar dɔ darɔ-ɛ gə təl to ne buba njekapolo ang, ngaa dəw gə nje pa kar-ɛ na: ꞌI ꞌto ngon-m, ꞌma ja m-uji-i ɓogəne; 6ꞌtəl ꞌpa to to gə be ja cibi lo gə ɗangə gə na: ꞌTo njekapolo ja gə dɔbo̰ gə ɗəw gə gəl Mɛləkisedɛk gə.#5.6 Paj 2.7; 110.4.

7ꞌNe ja, logə n-aw dɔ nangə nee taar ɓi le, n-uru ꞌkuwi ɓolong gə man no, gə n-dəji Luba ngaɓa n-ɗa ne ndoo no-ɛ gə mba kar t-ɛ ta yo gə. Be ɓa gə go kila kuji lə-a ɗaa Luba o ndu-e ja,#5.7 Mat 26.36-46; Mrk 14.32-42; Lug 22.39-46. 8n-to ngon-e ja ngaa n-tɔji kila kuji ɗəw ko ꞌməsərə gə. 9Logə n-tɔl ta kula lə-a bɛm ɗaa, n-təl n-to ɗəw kaji gə gə ndɔ gə ndɔ lə dəwje tɔ̰y gə d-a kila kuji dɔ-ɛ gə. 10Luba unda-a gə buba njekapolo gə ɗəw gə gəl Mɛləkisedɛk gə.

11Tar gə j-a pa ɔji dɔ-ɛ bula ya̰ ja ngaa lo kɔr gəl-e kədərə mba ko tar lə-si o̰ ya̰. 12Sisəy le ɗaa kuru lo əw asə kar-si ꞌtoje njenetɔjije ngaa, ngaa dɔngɔr nendo gə d-uma ne kudu tar lə Luba ja cibi ꞌnjigije kar ꞌtəl ꞌtɔji-si, to to gə ꞌtoje nganje gə kasə gə mbaa baa ɓa il-je ɓo usaje nekusa dəwje gə tɔgə ang. 13Be ɓa dəw gə aw il mba ɓi le to ngon ja jaga ɓo a gərə kunja kəm tar gə dɔ gɔl-ɛ ang mba n-tɔgə ang.#5.13 1Kɔ 3.2. 14Ngaa dəw gə tɔgə nama nekusa tɔgə ja tɔ ɓa to ɔji dɔ-ɛ, mba n-gərə kɔr kəm ne gə kṵra̰y gə ne gə may.

Currently Selected:

Ebərəje 5: lap

Highlight

Copy

Compare