2 Timoce 2
2
1Be ɓa ꞋI gə to ngon-m le, mənuji lə Kirisi Jeju to gəl kuba singa lə-i. 2Ngaɓa ne gə o ta-m gə nje tar naj-ɛje bula le, um mə ji dəwje gə gadə-gadə gə, d-a kasə mba tɔji nje gə kɛm tɔ. 3O sə-m ko̰ ne naa gə to gə njeɗɔ lə Kirisi Jeju gə may. 4Dəw gə un rɔ-ɛ gə njeɗɔ le, ɓo njigi may ta kəm njeko̰ dɔ-ɛ gə nama a jɔgə rɔ-ɛ mba neje gə ɗangə ang. 5Ɗəw kara baa to gə njeka̰y ngɔdə gə a̰y ila ne kɔji dɔ nduje gə ɓa a kinga ne dɔ ji lə-a. 6Njendɔ gə ɗa kula ya̰ le, a kinga kandə ko gə kəne dɔngɔr. 7ꞌTuga mbi-i gə maj-ɛ o ne tar gə m-pa, mba Mbayɓe a kar-i kəji negərə dan ne gə tɔ̰y.
8Ole mə-i dɔ Jeju Kirisi gə, gə ndol horo nje gə d-uy gə, ḭ gəl kuji gə lə Dabidi, gə go Tar gə May gə m-ila mbər-e. 9Mba tar-ɛ ja m-o ne ko̰ saar, tɔ-m ne kula lar to to gə m-to dəw gə ɗa məyɛr be. Ngaa ꞌtɔ Tar lə Luba gə kula lar ang baa. 10Gəl-e gə ne ɓa m-uwa ne gədərə dan ne gə tɔ̰y mba kar nje gə Luba mbərə-je le d-inga ne kaji gə ḭ rɔ Kirisi Jeju gə, gə riɓar gə a to gə ndɔ gə ndɔ.
11Tar gə tɔgərɔ gə kəm ta ne kagə ɓa nee:
To gə ɓo j-uyje gə Jeju Kirisi nama
J-a kisije sə-a kəm baa tɔ
12To gə ɓo j-uwaje gədərə nama
J-a ko̰je sə-a ɓe naa gə tɔ;
To gə ɓo j-a mbad-eje nama
N-a mbadə si tɔ;
13To gə ɓo j-a toje dəwje gə j-ar njang ang kara
Ne n-ar njang ja jaga,
Mba ꞌne n-asə tula rɔ-ɛ naa gə ang.#2.13 Tuk 23.19; Mat 10.33; Lug 12.9; Rɔm 6.8.
Tar gə ɔji dɔ dəwje gə d-uba Tar gə May d-ḭya̰
1Tm 1.3-7,18-20; Tit 1.10-16; 2.11-15; 2Pi 2.1-22
14Tar gə a kole mə dəwje kəne ɓa to nee: ꞌPa ar-je no gɔl Luba gə mba kar d-əw rɔ-je tar ma̰y gə asə ɗa ne kara ang. Mba tar ma̰y gə baa le tuji dəwje gə njeko-eje gə tuji. 15Ɔsə rɔ-i ɓad gə dəw gə Luba n-ɛ nam, ꞌto dəw gə ɗa kula tɔji ne tar gə tɔgərɔ gə dɔ gɔl-ɛ. 16Ɔsə tar gə ɗəgərə gə tarje gə baa rəw gə ɗangə, mba nje pa tar gə ɗəgərəje d-a kila kuji dɔ ne gə lə Luba ang dɔ-je gə kede-kede. 17Tar gə ta-je gə a kusa-je gə kede-kede to to gə ngɔ gogəro be. Imene je gə Pilɛt ꞌga̰ horo-je gə tɔ. 18Jeje ja d-uba tar gə tɔgərɔ d-ḭya̰; ngaɓa paje d-ar-je dəwje na Luba ndol nje gə d-uy nam ngaa, d-ar-je nje gə kɛm ꞌtusu ne takagə lə-je d-ḭya̰. 19Tar gə tɔgərɔ gə Luba ja ula ngira nangə: Mbayɓe gərə dəwje tɔ̰y gə to njeka-ɛje, ngaɓa ɓo na-na ja ɓa pa na n-to nje kar Luba nama a kɔsə neɗa gə dɔ buguru rəw ɓa.#2.19 Tuk 16.5. 20Bay maa gə bay lar to mə kəy gə boy gə; ngaa bay kagə gə bay ənji kara to kəne tɔ. Be ɓa bayje gə kɛm ꞌto mba ɗa ne kula ndɔ bula gə ngaɓa nje gə ꞌɗa ne kula ndɔ gə baa gə tɔ. 21Be ɓa dəw gə sangə rɔ-ɛ gə maj-ɛ, gə ngom rɔ-ɛ dɔ neɗa gə kṵra̰y gə nama a to to gə bay gə a ta kəm nj-ɛ ngaɓa a to ɔji dɔ kula gə gə maj-ɛ tɔ̰y.
22Ar ɓo neɗa gə kṵra̰y gə dɔ basa̰ gə o̰ dɔ-i ang, ɗaa sangə go neɗa gə gadə-gadə, gə takagə, gə njigi, ngaɓa ar mə-i to ɗɛgɛgɛ gə dəwje tɔ̰y gə d-aw no ꞌɓar ne Mbayɓe gə mə gə arə ngadə. 23Ɔsə tar ma̰y mbə rəw gə ɗangə, mba ꞌgərə to gə tar ma̰y mbə ce ɓɛlɛ gə ce. 24Be ɓa may kar ngon njekula lə Mbayɓe to njeɓɛlɛ ang, ngaa n-a kul kuji gə dəwje tɔ̰y, ngaɓa n-a kaw gə gusu tɔji ne ngaɓa n-a kore m-e ndəng dɔ-je gə. 25N-a ndəji njekunda tarje gə ndu gɔsə gə kul kuji, mba kunda ne m-e to gə ndɔ gə ɗangə nama Luba a kar-je mbəl kəji lə-je, mba gərə ne tar gə tɔgərɔ, 26gə mba təl kun kəji lə-je gə gə maj-ɛ, gə mba ce ne ta kula gə ꞌSɛ̰ngərɛ̰ iya mba kuba neje ɓa mba kar ɗa-je ne mə njigi lə-a.
Currently Selected:
2 Timoce 2: lap
Highlight
Copy
Compare
Share
Want to have your highlights saved across all your devices? Sign up or sign in
© 2020, ATALTRAB. All rights reserved
