2 Nje gə Kɔrɛnt 2

1Be ɓa, gə go mə njigi lə-m ꞌma ja, m-ɔgə rɔ-m gə mba təl kaw ɓe lə-si mba kar kəm-si ɗa ne ndoo ang. 2Mba, to gə ɓo ꞌma ɓa m-ɗa-si m-ar kəm-si to ndoo ɗaa, rɔləl lə-m a kḭ rɔ na gə cibi wa, to gə ɓo be ang nama nj-ɛ gə m-ɗ-e m-ar kəm-e to ndoo le ja ang wa? 3M-ɗa mbede nee m-ar-si to gə m-ɗa ne kede le, mba kar lo gə m-ce rɔ-si gə nama, nje gə ꞌto gə ngira rɔləl lə-m ja cibi ɓa m-təl m-inga məko̰ rɔ-je gə ang. 4M-ɗa mbede nee dan ꞌməsərə gə to bəl ya̰, gə ɓəgərə̰ gə ti ndɔ̰yi nəm ngaɓa gə man no mba ɗa kar kəm-si to ne ndoo ang, ngaa mba kar-si ꞌgərəje to gə njigi gə m-njigi-si le sṵra̰-a godo. 5To gə ɓo dəw kara horo-si gə ɗa ne ar kəm dəw to ndoo nama, to gə ꞌma ɓa ꞌɗa-m n-ar kəm-m to ndoo ang, to gə sisəy ja tɔ̰y, ngaɓa tɔ̰y ang kara buduru, mba pa kuru ne muu ang 6Dəw gə to gə be le, tar gə dəwje bula ꞌgangə dɔ-ɛ gə əng ja asə mbagə. 7Be ɓa, may kar tar ɓa ɔrəje dɔ-ɛ gə gə kɔr nəm, kul ɓa ꞌkul-je m-e mba kar kəm-e ɗa ndoo gə kede-kede cɛdə ne singa-a ang. 8Be ɓa, m-ndəji-si mba kar ꞌtɔj-ɛje njigi gə ꞌnjig-eje le gə ɗaga. 9M-ɗa ne mbede m-ar-si mba na ne mə-si ko, se ila-je kuji ɔji dɔ neje tɔ̰y ja wa? 10Ngaɓa, dəw gə ɔrəje tar dɔ-ɛ gə nama, ꞌma kara m-ɔr tar dɔ-ɛ gə tɔ. Be ɓa, to gə ꞌma m-ɔr tar dɔ ne gə nama, m-ɗa mba sisəy no Kirisi gə, 11mba kar ꞌSu uba singa dɔ sijee gə ang, sijee le ja gərə kula ɗ-ɛ som.

12Logə m-ce mə ɓe gə Torowas mba kila mbərə Tar gə May lə Kirisi, ɗaa Mbayɓe ɔr ta ɗəw ila tagə ar-m. 13Be ɓa, njil-m uwa dɔ-m ang mba m-inga ngon ko̰-m Titə ang ɗaa, m-iya̰-je m-ɔdə m-aw Masedowan.

Kirisi cɛdə ɗɔ

Rɔm 15.17-19; 1Kɔ 1.17-24; 2Kɔ 4.1-7

14Oyo ar Luba gə ar-sijee ja cɛdə ɗɔ mə Kirisi gə gə ndɔje tɔ̰y, ngaɓa ɗəw gə lə-sijee ɗaa, ba̰y kəndə mambo̰ negərə lə Kirisi sagə pə-pə gə lo tɔ̰y. 15Mba sijee le ja to ba̰y kəndə mambo̰ lə Kirisi gə ɔji dɔ Luba horo nje gə d-um gɔl-je ɗəw kaji gə ngaɓa horo nje gə d-aw gə lo tuji gə tɔ. 16Kar nje gə kɛm ɗaa, to gə ba̰y yo gə aw gə je gə lo yo gə, ngaɓa nje gə ɗangə tɔ ɗaa to gə ba̰y kisi kəm baa gə aw gə je gə lo təbə gə tɔ. Se na ɓa asə ɗa kula gə to gə be wa? 17Mba sijee le ja to to gə nje gə kɛm bula gə d-un tar lə Luba gə nekinga ne lə-je baa ne ang; sijee ɗaa, tar gə tɔgərɔ gə ḭ rɔ Luba gə ɓa ja pa, j-ar ne no Luba gə mə Kirisi gə.

Currently Selected:

2 Nje gə Kɔrɛnt 2: lap

Highlight

Copy

Compare