1 Timoce 5
5
Ɗəw pa tar gə dəwje ɓədə-ɓədə
1Ja̰ 4.1-3; Kɔl 2.16-23; 2Tm 2.4-6
1Əw rɔ-i mba ndangə dəw gə tɔgə, may pa sə-a tar to gə bɔ-ije be, ar tar ndəji ngan basa̰ to gə to ngan ko̰-ije be ja tɔ. 2O jeneje gə tɔgə to gə ko̰-ijeje ngaɓa ngan mandəje ꞌnay to gə ko̰ nan-ije be to. Ar kəji lə-i arə ngadə dɔ-je gə.
3Unda kəm-i dɔ jene ndubaje gə to jene ndubaje gə tɔgərɔ. 4Ngaa to gə ɓo jene nduba gə ngan-ɛ ose ngan k-ɛ ga̰ nama, may kar d-ila kuji dɔ ne gə lə Luba ɔji mə kəy gə lə-je; Ye ɓa to ɗəw təl gə ne kar njekuji-jeje gə d-odo-je kede, mba to ne gə may ta kəm Luba gə. 5Ngaa ɓo jene nduba gə to dəw gə isi dɔ-ɛ gə baa ɗaa, unda m-e dɔ Luba gə, ngaɓa ar njang dɔ dəji gə, ɗa ndoo no Luba gə cil gə kar. 6Ngaa, jene nduba gə un rɔ-ɛ ar ne rɔləl gə dɔ nangə nee le, isi kəm baa ja kara, nay to gə dəw gə uy. 7Ye gə nee ɓa to ndu gə ꞌi a pa kar jene ndubaje mba kar dəw ila nee tar dɔ-je ang. 8To gə ɓo dəw tɔsə kəm-e dɔ njeka-ɛje ang ose nje gə mə kəy gə lə-a ang nama, nj-ɛ nee le ila takagə lə-a bagir-e gə baa, ngaɓa ɗa ne gə kṵra̰y unda dəw gə gərə Luba ang. 9Jene nduba gə a kunda ri-a horo jene ndubaje gə le, n-a kaw gə ɓal dɔg misa̰ jən be, ngaɓa n-a to jene jingaw gə kara; 10may kar neɗaje lə-a gə may to ɗaga pay-pay kəm dəwje gə: ɗəw siri ngan-ɛ gə gə maj-ɛ, ɗəw kuwa mbaje gə, ɗəw togo#5.10 Lug 7.44 gɔl njetakagəje, ɗəw la gə nje gə d-isi dan nekəmtondoo gə, ɗəw ɗa ne gə may gə lo-e lo-e. 11Ngaa, ye gə uji dɔ jene ndubaje gə nay mandə ɓi nama, ɔr ji rɔ-je gə mba lo gə ɓo darɔ-je ḭ gə je nama, d-a mbadə-je Kirisi nəm ngaɓa d-a təl kaw ta ngaw gə ɗangə ja cibi. 12Be ɓa, Luba a gangə tar dɔ-je gə mba d-ila kuji dɔ ndu kun lə-jə gə dɔngɔr ang. 13Ye gə ɗangə ja cibi ɓa nee, ꞌtoje gə njedabəje baa, ndoje ɗəw nja gə ta kəy kəy, ngaɓa to njetaɓarje baa ang ne, to njeɗəgərəje nəm, cibi d-ula rɔ-je mə ne gə ɔsə-je kəne ang tɔ. Jene ndubaje gə ꞌto njedabəje nee le pa tar ne gə asə kəm pa ang baa. 14Gəl-e nee ɓa, m-njigi kar jene ndubaje gə ꞌnay mandə ɓi ꞌta ngaw, d-uji nganje, ꞌngom-je mə kəy lə-je mba kar njeba̰a̰ inga ɗəw tuji ri-je ang. 15Mba jene ndubaje gə kɛm ꞌndəm mba d-un go ꞌSu#5.15 2Kɔ 6.4. 16To gə ɓo njetakagə gə jene aw gə jene ndubaje gə to njenujije lə-a nama, to may ya̰ kar tɔsə kəm-e dɔ-je gə ɓo iya̰-je gə nekodo ar Mbo̰ naa lə njetakagəje ang mba Mbo̰ naa lə njetakagəje a la gə jene ndubaje gə tɔgərɔ.
17May kar ngatɔgəje gə d-o̰ dɔ kula gə maj-ɛ le, njetakagəje d-a kila riɓar dɔ-je gə gɔl joo, nje gə d-ula rɔ-je ndubu ɗəw pa tar gə lə Luba ngaɓa ɗəw netɔji gə ja ɓa. 18Ye ɓa, Mbede pa nee na: ꞌI a tɔ ta mangə#5.18 1Kɔ 9.9 gə aw ɗa kula lo kunda wa gə ang, ngaɓa, njekula a kinga kuga lə-a ɔji go kula gə ɗa#5.18 Mat 10.10; Lug 10.7. 19May kar njetar najije joo ose munda ɓa d-ila nee tar dɔ ngatɔgə gə, ɓo be ang nama ꞌmbadə tar gə d-ila dɔ-ɛ gə.#5.19 Ttt 19.15. 20May kar ndangə njeneɗaje gə kṵra̰y no dəwje gə tɔ̰y, be ɓa nje gə kɛm d-a ɓəəl nee. 21ꞌMa m-dəji-i no Luba gə, no Jeju Kirisi gə nəm gə no anjije gə Luba mbərə-je, mba kar ꞌngom nduje nee le tɔ̰y gə mə-i gə kara, ngaɓa ꞌɗa ne kara ɔr ne kəm dəw ang. 22May kar ila ji-i gə tɔg-ɛ baa dɔ dəw gə ang, mba ɗa ne mə kara dɔ neɗa gə kṵra̰y gə lə dəw ang. ꞌI ja kara ngom rɔ-i gə maj-ɛ. 23May kar ꞌi ay man ja baa ang, ɔsə man bḭyə̰ kəne njɛ̰ mba kəy bo sḭ-i gə aw jɔg-i le. 24Dəwje gə kɛm ɗa neɗa gə kṵra̰y ɗaga d-ar d-o nda̰-nda̰ nam ɓa gangə tar kəne. Dəwje gə ɗangə ꞌɗa neɗa gə kṵra̰y lə-je lokiya gə ɓa ce ɗaga ɓi. 25Ɗəw kara baa, neɗa gə may le tɔji rɔ-ɛ gə ɗaga, ngaa neɗa gə kṵra̰y le to lokiya gə ang tɔ.
Currently Selected:
1 Timoce 5: lap
Highlight
Copy
Compare
Share
Want to have your highlights saved across all your devices? Sign up or sign in
© 2020, ATALTRAB. All rights reserved
