1 Timoce 3
3
Njekun dɔ kulaje gə lo mbo̰ naa lə njetakagə
Tit 1.5-9; 1Pi 5.1-4; Kɗn 6.1-6
1Oje tar gə tɔgərɔ le ɓa nee, to gə dəw gɔl m-e gə mba kun dɔ kula nama, nj-ɛ njigi kula gə may. 2Be ɓa, may kar nje ka dɔ lo kuwa dɔ naa le tar a kuwa dɔ-ɛ ang, n-a to nje jene gə kara, n-a ɗa mə bo nekusa ang, n-a kunda kəm karə dɔ rɔ-ɛ gə, n-a to njekuwa nuji, n-a to nje kuwa mbaje#3.2 Rɔm 12.13 cibi n-a kasə mba tɔji#3.2 1Kɔ 12.29; 2Tm 2.24; Jag 3.1 ne dəwje. 3N-a to ɓərə lə kodo#3.3 Nll 10.8 ang, n-a to nje tɔsə tar ang, ngaa n-a to dəw gə kul lom ngaɓa n-a to dəw nuji, n-a to dəw gə ɓo lar a ɗ-ɛ ang. 4N-a to dəw gə a kasə ngom mə kəy lə-a gə maj-ɛ ngaɓa ngan-ɛje d-a koso kul no gɔl-ɛ gə maj-ɛ pɛdə. 5Ngaa to gə ɓo, to gə dəw gə gərə ngom mə kəy lə-a ja ang le se a ngom mbo̰ naa lə njetakagəje lə Luba to gə ban wa? 6To may kar njetakagə gə sigi a to njekɔr no Mbo̰ naa lə njetakagəje ang mba to gə be ang nama kəsə tar a tɔ kəm-e kar n-oso mə bandə gə lə ꞌSɛ̰ngərɛ̰. 7May kar dəwje gə to njetakagəje ang ja kara pa tar naji lə-a gə maj-ɛ ɓa, gə mba kar n-oso mə bandə#3.7 2Tm 2.26 gə le ꞌSɛ̰ngərɛ̰ ang tɔ.
8Ɗəw kara baa, diyakərəje#3.8 Diyakərəje to dəwje gə Mbo̰ naa lə njetakagəje tɔr-je, um kula tɔsə kəm dɔ dəwje gə njendooje horo-je gə. Oje Kɗn 6.1 d-a to dəwje gə d-a kila ngon kuji dɔ rɔ-je gə gə maj-ɛ, ndu-je a kḭ joo ang, d-a toje gə ɓərə lə kodo ang ngaɓa d-a mbɔl-ɛ lar ang tɔ. 9D-a to dəwje gə d-a ngom takagə gə iya rɔ-ɛ mə kəji negərə gə arə ngadə. 10To may mba na-je ko kede nam ɓa, ngaa ɓo tar godo dɔ-je gə nama d-a kum kula diyakərə ji-je gə ɓi.
11Ɗəw kara baa, jeneje kara d-a to dəwje gə d-a kila ngon kuji dɔ-je gə, d-a to nje kunda tarje ang, d-a ɗa mə bo nekusa ang, d-a to dəwje gə kula ɗa-je a to dana gadə-gadə. 12Diyakərə a to nje jene gə kara, ngaɓa n-a ngom ngan-ɛje gə mə kəy lə-a gə maj-ɛ. 13Ngaa ɓo, nje gə ꞌɗa kula diyakərə gə maj-ɛ le Luba a kila riɓar dɔ-je gə. D-a gərə ɗang-ɗang to gə Jeju Kirisi aji-je nam.
14M-aw m-gɔl gə mə ngəbə mba ce dɔ-i gə ɓisine baa ja ɗaa m-ɗa mbede nee m-ar-i gə tar. 15Ngaa to gə ɓo, kuru-m əw njɛ̰ nama, ꞌi ja a gərə ɗəw gə a ngom nee rɔ-i mə kəy gə lə Luba, gə to Mbo̰ naa lə njetakagəje lə Luba gə Nje kisi kəm baa, ꞌNe gə to nje kɔsə kudu tar gə tɔgərɔ nəm ngaɓa nje ta dɔ tar gə tɔgərɔ nəm tɔ. 16Cibi, ne gə to kəm kar ja gərə-je ɓa nee, negərə gə to ɓəəl ya̰ gə to lokiya ɓa takagə tɔji-si le ɓa nee:
N-təl tɔji rɔ-ɛ gə dəw,
N-tɔji rɔ-ɛ gə dəw gə gadə-gadə mə Njil gə,#3.16 Rɔm 1.4.
N-tɔji rɔ-ɛ n-ar anjije,
D-ila mbərə lə-a horo dəwje gə ꞌgərə Luba ang
Ta kag-ɛ gə dɔ nangə gə nee
D-ila riɓar dɔ-ɛ gə.
Currently Selected:
1 Timoce 3: lap
Highlight
Copy
Compare
Share
Want to have your highlights saved across all your devices? Sign up or sign in
© 2020, ATALTRAB. All rights reserved
