1 Timoce 2
2
Dəji Luba mba dəwje tɔ̰y
1Dɔngɔr kede ɗaa, m-dəji#2.1 Rɔm 12.12 neje gə nee: may kar ꞌdəjije Luba, ꞌpaje sə-a tar, ꞌɗaje ndoo rɔ-ɛ gə nəm, ngaɓa ꞌɗaje oyo#2.1 2Kɔ 4.15 Luba mba dəwje tɔ̰y, 2mba mbayje, gə nje gə d-um ɓeko̰ mə ji-je gə mba kar j-isi nee gə dɔ si taar ɗɛgɛgɛ gə mə kul lom, gə kila kuji dɔ Luba gə nəm ngaɓa ɗəw pa nja gə gə maj-ɛ tɔ. 3Ye gə nee le ɓa to ne gə may ngaɓa to ne gə to ngira rɔləl lə Luba, Njekaji-si. 4ꞌNe gə n-njigi kar dəwje tɔ̰y d-inga kaji ngaɓa kar dəwje ꞌtəl gərə tar gə tɔgərɔ. 5Gəl-e gə nee ɓa, Luba le kara baa. Ɗaa, njekar#2.5 Ebə 8.6 horo dəwje gə gə Luba le kara kara baa tɔ, n-to dəw, Kirisi Jeju, 6gə iya̰ rɔ-ɛ to nekuga dɔ dəwje. Ye ɓa to tar naji gə Luba tɔji dɔ kar gə Luba ɔji. 7Kudu tar-ɛ gə nee le ɓa, Luba təl-m ne to gə njetɔji tar ngaɓa to njeka̰ykula, mba kar m-tɔji tar dəwje gə ꞌgərə Luba ang ɗəw takagə gə ɗəw tar gə tɔgərɔ gə. M-pa tar gə tɔgərɔ ɓo m-ɗəgərə ang. 8Be ɓa, m-njigi kar dəwje pa tar gə Luba gə lo tɔ̰y, d-odo nee ji-je gə may tɔ̰y gə dara. D-a ɗa gə wungu ang nəm ngaɓa d-a kaw gə kəji tɔsə tar ang nəm tɔ.
Kula gə jeneje d-a ɗa
1Pi 3.1-6; Tit 2.3-5
9Ɗəw kara baa, may kar jeneje d-ula kubu lə-je gə maj-ɛ. D-a kula kubu gə a kila kuji dɔ-je gə, cibi d-a kuwa dɔ gə bar-ɛ yaw ɓo d-a kula ne mbi maa ang nəm gə d-a kum mər ngɔbəje gə ang, ngaɓa d-a kula kubuje gə gə go ɗəb-e ɓa. 10Ngaa d-a tɔji mandə lə-je gə go ɗəw kula#2.10 2Kɔ 9.8 ɗa-je gə gə maj-ɛ. Ye ɓa to gə ndu kun lə jeneje gə d-ila kuji dɔ Luba gə. 11May kar jene ndo ne t-ɛ munduru baa, gə kəji kula dɔ#2.11 1Kɔ 14.34. 12M-un ɗəw m-ar jene kar tɔji ne ose o̰ dɔ jingaw ang. To tar lə-a kar n-isi t-ɛ munduru baa. 13Gəl-e gə nee le ɓa, Luba ɗa#2.13 Lgn 1.27; 2.7,18-24 Adam kede nam ɓa, ɗa Ɛbə ɓi. 14Cibi, to Adam ɓa ꞌSu ər-e ang, ngaa jene ɓa oso dan nekərə gə ɗaa n-mbadə ne torondu Luba. 15Be ja kara, n-a kinga kaji ɗəw gə lə nganje gə n-a kujije#2.15 Lgn 3.15, to gə n-ngom takagə gə n-njigi dəwje, sangə rɔ-ɛ ngaɓa n-ɗa ne gə mə Luba njigi.
Currently Selected:
1 Timoce 2: lap
Highlight
Copy
Compare
Share
Want to have your highlights saved across all your devices? Sign up or sign in
© 2020, ATALTRAB. All rights reserved
