1 Piyɛr 2
2
1Ne ja gə ne gə kṵra̰y nama ɔsə-je ngərəng, ngaɓa kərə dəw, tar mula, ɗa mal ne gə pa tarje gə kṵra̰y dɔ dəw gə. 2Ngaa ɗəw kara baa to gə ngan tayje ꞌnjigi ne mbaa be le, ar-je ɓo mbaa gə arə ngadə, gə to tar lə Luba ɔr-si, mba kar mbɔr dɔ-ɛ ɗaa ꞌtɔgəje ne ɓo ingaje ne kaji, 3to gə ɓo ꞌnaje to gə Mbayɓe may ya̰.
Jeju to kɔr ər kil kəy
Epɛ 2.20-22; Mat 21.42-44; Rɔm 9.30-33
4ꞌƊəmje gə rɔ-ɛ gə, ꞌne gə n-to kɔr ər gə to kəm baa gə dəwje ꞌmbadə, ngaa n-may ta kəm Luba gə ɓa mbər-e. 5Sisəy ja kara, ꞌnayje ɗəw kara baa to gə kɔr ərje gə to kəm baa mba kar undaje rɔ-si naa gə, gə kəy gə ɗəw Njil gə, kəy lə Luba gə to gə losang-ɛ, mba kar unje ne nepoloje gə ɗəw Njil gə, gə ta kəm Luba ɗəw gə lə Jeju Kirisi; 6mba ꞌpa mə mbede gə na:
Oje, m-a kila kɔr ər kil kəy Siyo̰ gə, to kɔr ər gə ꞌmbərə, gə may ya̰,
A ɓo dəw gə unda m-e kəne nama rɔ kul a kuwa-a ang.
7Ɗɔy to kar-sisəy gə ꞌtaje kagə. Ngaa kar nje gə ta kagə ang ɗaa,
Kɔr ər gə njekunda kəyje d-un d-ila kɔrɔ le ja
Ye ja təl to kɔr ər gə kil kəy gə
Ngaɓa kɔr ər le təl to jigi tuga gɔl
To kɔr ər gə təl to ɗəw koso.
8ꞌƊe ꞌtuga gɔl-je jigi gə ꞌce d-oso mba ꞌmbadə kila kuji dɔ tar gə, ꞌnay mba ne gə ɔji dɔ-je. 9Sisəy le ɗaa, ꞌtoje ko dəwje gə ꞌmbərə-je, njekapoloje gə kəy mbay gə, gəl kuji gə to gə losang-ɛ, dəwje gə n-unda-je gə njeka-ɛje, mba kar ilaje mbərə lə nje kɔr-si dan cil ciməri gə, kar isije dan lokarə gə al dɔ lo gə. 10Sisəy gə kede ꞌtoje dəwje gə d-aw baa gə nangə əng ngaa ɓisine ꞌtoje dəwje lə Luba; Luba o kəmtondoo lə-si ang, ngaa ɓisine ɗaa n-o kəmtondoo lə-si ngaa.
Pa nja gə may
Rɔm 13.1-8; Epɛ 6.5-8
11Ngan ko̰-m gə m-njigi-si ya̰, may kar-si ꞌgərəje to gə ꞌtoje nje kaw taarje ngaɓa gə mbaje dɔ nangə nee, ɗaa aje rɔ-si dɔ ɓo neje gə darɔ gə, gə d-aw ɗɔ gə si le. 12Ar-je pa nja-si to gə maj-ɛ horo dəwje gə ꞌgərə Luba ang gə, mba kar logə ꞌpa na ꞌɗaje ne gə kṵra̰y kəne nama, kula ɗa si gə may ɓa d-o kəne ngaɓa kar d-ɔsə ne gaji Luba dɔ ndɔ ɗe gə lə-a.
13May kar osoje kul no njeko̰ dɔ dəwje gə tɔ̰y mba Mbayɓe, no mbay gə gə njeko̰ dɔ-si gə, 14osoje kul no njeko̰ ɓeje gə n-ula-je mba kar ꞌbɛ̰ ta nje gə ɗa ne gə kṵra̰y, gə mba kar ꞌpidi nje ɗa ne gə may, 15mba Luba njigi kar pa nja-si to gə maj-ɛ ar mbəje d-o ne lo pa tar ang, 16may kar isije to gə dəwje gə dɔ-je to doy, ɗaa kar dɔ to doy lə-si to ɗəw ɗa ne gə kṵra̰y ang, ngaa ꞌnjaje gə njekulaje lə Luba. 17ꞌƊɔyje dəwje tɔ̰y, ꞌnjigije ngan ko̰-si gə mə Kirisi gə, ꞌɓəəlje Luba, ilaje kuji dɔ mbay gə tɔ.
18Ngan njekulaje, may kar ꞌɓəəlje ꞌɓəə-sijee dan neje gə tɔ̰y, osoje kul no-je gə, nje gə may gə kul yururu ja gə kar-je baa ang ngaa nje gə ꞌmongə gə si ya̰ kara nəm tɔ. 19Dəw gə ɗa-ɗa ja ɓa d-ula kəm-e ndoo dɔ buguru baa ngaa ila m-e dɔ mar-ɛ gə mba to nje ɓəəl Luba nama, to ne gə may ja. 20To gə ɓo d-ula kəm dəw ndoo mba kula ɗ-ɛ gə kṵra̰y le se, riɓar gə ban ɓa nj-ɛ a kinga wa? Ngaa to gə ɓo ꞌɗaje may ɓa uwaje gədərə dan ꞌməsərə gə nama, to ne gə may ta kəm Luba gə. 21Ye gə kən le ja ɓa ꞌɓar-si mb-ɛ, mba Kirisi kara o ꞌməsərə mba-si tɔ ngaɓa ḭya̰ gə ne kɔji mar-ɛ ar-si, mba kar unje ne dɔ gɔl-ɛ. 22ꞌNe gə n-ɗa neɗa gə kṵra̰y ang, ꞌne gə tar kərə dəw ce t-ɛ gə ang; 23ꞌne gə ꞌtaj-ɛ kara, n-təl n-taji-je toro-e gə ang, n-o ꞌməsərə ja kara n-ɗa singa ang, ngaa n-ḭya̰ rɔ-ɛ yag mə ji nje gangə tar gə gə dɔ gɔl-ɛ gə; 24ꞌne gə n-unda dɔ-ɛ kede n-ta ne neɗaje gə kṵra̰y lə-si, n-uy ne dɔ kagə gə, mba kar-sijee gə ja to dəwje gə j-uy ɗəw neɗa gə kṵra̰y gə le, j-aw ne kəm baa ɔji dɔ neɗa gə dana gadə, ngaɓa do gə ninga le ɓa ajije ne kəbərə. 25Mba ꞌnayje to gə badəmje gə d-igi be, ngaa ɓisine ɗaa ꞌtəlje dɔ-si gə ɓə lə njekuul-si ngaɓa nje tɔsə kəm-e dɔ kəm gə lə-si nəm tɔ.
Currently Selected:
1 Piyɛr 2: lap
Highlight
Copy
Compare
Share
Want to have your highlights saved across all your devices? Sign up or sign in
© 2020, ATALTRAB. All rights reserved
