1Ja̰ 5

Takagə gə kula ɗa takagə

1Dəw gə ɗa-ɗa ɓa ta kagə to gə Jeju to Kirisi nama, Luba uji-e, Ngaɓa dəw gə ɗa-ɗa ɓa gə njigi Bɔ ngon je nama njigi ngon-e tɔ. 2Ne gə j-a gərə ne to gə j-a njigi nganje lə Luba ɓa nee: sijee j-a njigi Luba ngaɓa j-a ngom ndu-e tɔ. 3Be ɓa, njigi lə Luba le to ngom ndu-eje. Cibi ndu-eje le ɔyi ang, 4mba dəw ja gə Luba uji-e le cɛdə ɗɔ dɔ nangə, oje cɛdə ɗɔ dɔ nangə nee le to takagə lə-si. 5Dəw gə nje cɛdə ɗɔ dɔ nangə to na wa? Be ang nama, dəw gə ta kagə to gə Jeju to Ngon lə Luba ja ɓa.

6To ꞌNe, Jeju Kirisi gə ɗe ɗəw gə lə man gə ɗəw gə lə məsə, n-ɗe gə man baa ang, ngaa n-ɗe gə man ngaɓa gə məsə; to Njil ja pa tar naj-ɛ, mba Njil to tar gə tɔgərɔ, 7mba njetar naj-ɛje d-ḭ munda: 8Njil, man gə məsə, nje gə munda nee le nduje asə naa.

9To gə ɓo j-o tar naji lə dəwje nama, tar naji lə Luba bo ya̰; mba tar naji lə Luba le to tar naji gə pa ɔji dɔ Ngon-e. 10Dəw gə ta kagə Ngon lə Luba ɗaa tar naji nee le to m-e gə; ngaa dəw gə ta kagə Luba ang nama, dəb-e nee le o Luba gə njetar gə baa, mba mbadə ta kagə tar naji gə Luba pa ɔji dɔ Ngon-e le. 11Ɗaa oje tar naji nee le ɓa nee: Luba ar-si təbə gə ndɔ gə ndɔ, təbə nee le ḭ rɔ Ngon-e gə. 12Dəw gə Ngon isi m-e gə ɗaa, inga təbə; ngaa dəw gə ngon lə Luba isi m-e gə ang nama, kinga təbə lə-a godo.

13Gəl-e gə nee ɓa, m-ɗa ne mbede m-pa ne tar neje m-ar-si mba kar ꞌgərəje to gə ingaje təbə gə gə ndɔ gə ndɔ le nam, sisəy gə ꞌtaje kagə gə ri Ngon lə Luba.

14Oje ne gə arə si singa ɓa nee: to gə ɓo j-a dəji-e ne gə go mə njigi lə-a nama, n-o ndu-si. 15Cibi, to gə ɓo j-a gərə to gə n-o ndu-si nama, ɗi-ɗi ɓa j-a dəji-e kara, sijee j-a gərə to gə j-inga ne le nam.

16To gə ɓo dəw o ngon ko̰-ɛ ɗa neɗa gə kṵra̰y gə a ce yo dɔ-ɛ gə ang nama, may kar dəji Luba kar ar dəb-e nee le təbə; ye gə ɔji dɔ nje gə ꞌɗa neɗa gə kṵra̰y gə a ce gə yo dɔ-je gə ang. Neɗa gə kṵra̰y gə a ce yo to kəne əng, ngaa neɗa gə kṵra̰y gə nee ɓa m-pa kar ꞌdəji Luba ɔji dɔ-ɛ ang baa. 17Ne gə dɔ buguru tɔ̰y to neɗa gə kṵra̰y, ɗaa neɗa gə kṵra̰y gə bənəng le a ce yo ang baa.

18Sijee j-a gərə to gə dəw gə ɗa-ɗa gə Luba uji-e le, ɗa neɗa gə kṵra̰y ang, mba dəw lə Luba le, ngom-e, ɗaa njeməkṵra̰y ɔr rɔ-ɛ ang. 19Sijee j-a gərə to gə j-a to kar Luba, ɗaa dɔ nangə nee tɔ̰y to gəl njeməkṵra̰y gə. 20Sijee j-a gərə ja cibi to gə Ngon lə Luba ɗe ar-si kəji negərə mba kar j-a gərə ne Luba gə tɔgərɔ, ngaɓa j-a ga̰ gə Luba gə tɔgərɔ ɗəw gə lə Ngon-e Jeju Kirisi. ꞌNe gə to Luba gə tɔgərɔ nəm gə təbə gə gə ndɔ gə ndɔ. 21Ngan-m gə gɔgɔ, ꞌngom-je rɔ-si dɔ magəje.

Currently Selected:

1Ja̰ 5: lap

Highlight

Copy

Compare