1 Nje gə Kɔrɛnt 15
15
TAR KUY ƁA NDOL
Kuy ɓa ndol lə Jeju
1Ngan ko̰-mje, m-ole mə-si dɔ Tar gə May gə m-ila mbər-e m-ar-si le, gə ꞌtaje, gə to gə uwaje ne gədərə 2ngaɓa to gə ɓo ꞌngomje gə lo-e gə m-ila ne mbərə m-ar-si ja mɔgɔgɔ nama, mbɔr dɔ-ɛ ɓa ingaje ne kaji, ɓo be ang nama, takagə lə-si tor-e godo.
3Ne gə ꞌma m-inga ja, m-ar-si dɔngɔr: Gə go tar mə mbede gə ɗaa Kirisi uy mba neɗaje gə kṵra̰y lə-si; 4ꞌdub-e, ɗaa ndɔ gə njekum gə munda ɗaa n-ndol, to gə mbede pa, 5ngaɓa n-tɔji rɔ-ɛ n-ar Sepas, cibi ɓa nje dɔg gə gir-je gə joo. 6Go-e gə ɗaa, n-tɔji rɔ-ɛ n-ar ngan ko̰ naaje gə kɔr-je nday tɔl-tɔl mi ja d-o-e, nje gə kɛm bula horo-je gə d-aw kəm baa ɓi, ngaa kara karaje d-uy tɔ. 7Go-e gə ɗaa n-tɔji rɔ-ɛ n-ar Jagə, gə njeka̰ykulaje tɔ̰y. 8Go-je gə tɔ̰y ɗaa n-tɔji rɔ-ɛ n-ar ꞌma gə to to gə ngon gə d-ɔr-ɛ gə kɔr be; 9mba ꞌma gə m-to dəw gə njɛ̰ baa horo njeka̰ykulaje gə; m-asə kar ꞌɓar-m njeka̰ykula ang, mba m-ula kəm Mbo̰ naa lə njetakagəje lə Luba ndoo. 10Ngaa gə go mənuji lə Luba ɓa m-to ne ne gə m-to ɓogəne, ngaɓa mənuji gə m-inga le to ne gə baa ang, m-ɗa kula m-unda-je tɔ̰y, gə go singa-m ꞌma ang ngaa gə go mənuji gə Luba ɓa nay sə-m. 11Be ɓa, le to ꞌma ose ꞌjeje kara, tar gə j-ila mbər-e ja kən, ngaɓa ye ja ɓa to gəl takagə lə-sisəy.
12Be ɓa, to gə ɓo d-ila mbərə to gə Kirisi uy ɓa ndol horo nje gə d-uy gə ɗaa, nje gə kɛm horo-sisəy gə ꞌpa na ce buwa yo gə lə nje gə d-uy godo to gə ban wa? 13To gə ɓo kuy ɓa ndol godo nama Kirisi kara uy ɓa ndol ang tɔ, 14ngaɓa to gə ɓo Kirisi uy ɓa n-ndol ang nama kila mbərə lə-sijee kara to ne gə baa ja, ngaɓa takagə lə-sisəy kara to ne gə baa tɔ. 15Cibi j-a to njetar najije lə Luba gə gə mbɔr-ɛ baa, mba j-a gangə tar j-unda ta Luba gə, to gə n-ndol Kirisi, ngaa n-ndol-e ang baa, to gə ɓo tɔgərɔ ja, nje gə d-uy le ꞌndol ang. 16Mba to gə ɓo nje gə d-uy ꞌndol ang nama Kirisi kara uy ɓa ndol ang tɔ. 17Ngaɓa ɓo Kirisi uy ɓa n-ndol ang nama takagə lə-si kara to ne gə baa tɔ, ꞌna̰yje dan neɗaje gə kṵra̰y gə lə-si ɓi, 18ngaɓa nje gə d-uy ɗəw gə lə Kirisi kara d-igi gə kigi ja yom ngaa. 19To gə ɓo j-unda mə-si dɔ Kirisi gə mba kaw ne gə təbə dɔ nangə nee baa nama, ja to kəmandoo ya̰ unda dəwje tɔ̰y.
Jeju Kirisi to dɔngɔr dəw gə uy ɓa ndol
20Ngaa ɓisine ɗaa, Kirisi uy ɓa ndol horo nje gə d-uy gə, n-to dɔngɔr dəw gə ndol horo nje gə d-uy gə. 21Mba, yo ɗe ɗəw gə lə dəw le ɗaa, ɗəw gə lə dəw ja tɔ ɓa nje gə d-uy d-a ndol ne. 22Ngaɓa to gə tɔ̰y ja d-uy gəl Adam gə le, ɗəw kara baa d-a təl kaw kəm baa tɔ̰y gəl Kirisi gə tɔ, 23ngaa na-na kara gə lo kar-ɛ kar-ɛ: Kirisi ja to dɔngɔr-je tɔ̰y, ngaɓa nje kar Kirisije dɔ ndɔ gə təl gə lə-a. 24Go-e gə, gə a to ɗud-e ɗaa, logə n-a tuji nje dum dɔ loje tɔ̰y, gə njeko̰ dɔ loje tɔ̰y ngaɓa singamongə tɔ̰y ɗaa, n-a təl gə ɓeko̰ kula ji-a ꞌne gə to Luba gə Bɔ dəwje. 25Mba, kəm kar no ɓe saar kar n-turu njeba̰a̰je lə-a tɔ̰y n-nja dɔ-je gə.#15.25 Paj 110.1. 26Dɔbo̰ njeba̰a̰ gə n-a tuj-e pugudu ja to yo. 27Mba n-um ne tɔ̰y gəl gɔl-ɛ gə. Neje tɔ̰y d-oso kul no-ɛ gə. Ngaa logə n-pa na neje tɔ̰y d-oso kul no ꞌne gə le, n-pa n-ɔr ne kəm ye gə nje kar neje tɔ̰y d-oso kul no-ɛ gə le. 28Ngaɓa logə neje d-a koso kul no-ɛ gə ɗɔdə ɗaa ngon gə darɔ-ɛ ja kara a koso kul no nje kar neje tɔ̰y d-oso kul no-ɛ gə nee le, mba kar Luba to ne dəw dɔ neje tɔ̰y.
29Ngaa ɓo bənəng ang nama, nje gə d-inga batɛm yo le d-a ɗa ban ngaa wa? To gə ꞌpa nena nje d-uy d-a təl ndol ang le, ꞌɗa-je batɛm mba ɗi cibi wa? 30Ngaɓa sijee, ja cila kəm yo gə dɔ karje tɔ̰y mba ɗi wa? 31Ngan ko̰-mje, gə ndɔ-ndɔ ja m-o yo gə kəm nda̰-nda̰, m-pa tɔgərɔ ja, mba ꞌtoje ne rɔləl lə-m ɗəw gə lə Jeju Kirisi, Mbayɓe lə-sijee. 32To gə ɓo ɗɔ gə m-ɗɔ gə daje gə mu mə ɓe gə Epɛs le, m-ɗɔ mba kəm dəwje baa ɗaa, ɗi ɓa to may lə-m kəne wa? To gə ɓo nje gə d-uy d-a təl ndol ang nama,
J-usaje gə j-ayje, mba bara nama j-a kuyje! # 15.32
Eja 22.13
.
33Ərəje rɔ-si ang: Riya gə adə le unda mar-ɛje gə may mə jo gə. 34ꞌNdolje dɔ rɔ-si gə to gə tɔgərɔ ngaɓa undaje ngangə ɗa neɗa gə kṵra̰y, mba nje gə kɛm ꞌgərə Luba ang, m-pa m-ila ne rɔ kul dɔ-si gə.
Darɔ nje gə d-uy ɓa ꞌndol
35Ngaa dəw kara a pa na: Nje gə d-uy d-a ndol to gə ban wa? Ngaɓa gə darɔ gə ɗa ɓa d-a təl ɗe ne wa? 36Mbə dəw! Ne gə ꞌi dubu le, ɓo uy ang baa ja a təl cee wa? 37Ngaɓa ne gə ꞌdubu le, to darɔ gə dɔ ndɔ gə bara ang, to kandə ne ja baa, bayɛ̰ to kandə waa ose ko ne gə ɗangə kara nəm; 38ngaɓa Luba ar-ɛ darɔ to gə m-e njigi; cibi ko ne gə ɗa-ɗa kara n-ar-ɛ darɔ gə ɔji dɔ-ɛ ja.
39Nekundaje tɔ̰y gə d-aw kəm baa le, taal rɔ-je to to gə na-na ang baa; ngaa kar dəwje to dang, kar daje to dang, kar əlje to dang, kar kənjije to dang. 40Ngaɓa darɔ neje gə dara gə darɔ neje gə nangə nee; ngaa ndogo lə neje gə dara to dang, kar neje gə nangə nee to dang tɔ. 41Ndogo lə kar to dang, ndogo lə nay to dang tɔ; ndogo lə ndɛ̰ndərɛ̰ndɛ̰je to dang ngaɓa ndɛ̰ndərɛ̰ndɛ̰je nee ja kara ndogo lə ꞌye kara to dang gə ye gə ɗangə.
42Be ɓa, ndol lə nje gə d-uy kara to to gə be ja tɔ. ꞌDubu ne gə a ndum, ngaa a ce gə ne gə a ndum ang. 43ꞌDubu ne gə to yɛm, ngaa a ndol gə rɔnduba, ꞌdubu ne gə mbɔr-ɛ, ngaa a ndol gə singamongə. 44ꞌDubu darɔ gə to da, ngaa a ndol to darɔ gə ɗəw njil gə. To gə ɓo darɔ gə to da ga̰ nama, darɔ gə ɗəw njil gə ga̰ tɔ. 45Gəl-e gə nee ɓa ꞌɗa ne mə mbede gə na: Dɔngɔr dəw, Adam, təl nekunda gə aw kəm baa. Bo̰ Adam, təl njil gə nje kar təbə. 46Dɔgɔr-ɛ ɓa to ꞌye gə to njil ang, to ꞌye gə to da; ngaɓa ꞌye gə to njil ɗe go-e gə. 47Dɔngɔr dəw gə d-ɔr-ɛ nangə le, to dəw gə nangə nee. Njekum gə joo le ḭ dara. 48ꞌYe gə nangə nee unda rɔ nje gə nangə nee ja tɔ, ngaɓa ꞌye gə dara unda rɔ nje gə dara tɔ. 49Ngaɓa, ɗəw kara baa to gə ja to ndaji ꞌye gə nangə nee le, j-a to ndaji ꞌye gə dara tɔ.
Mbəl rɔ ngaɓa cɛdə ɗɔ gə ɗudu
1Te 4.13-18
50Ngan ko̰-mje, tar gə m-pa le, mba darɔ gə məsə le d-a kasə kuwa ɓeko̰ lə Luba gə nenduba ang, ngaɓa ne gə a ndum le, a kuwa nduba ne gə a ndum ang ang.
51M-a kila gə ne gə iya rɔ-ɛ kar-si oje: Sijee le, j-a kuy tɔ̰y ang, ngaa tɔ̰y ja d-a mbəl rɔ-si: 52mə ngon kar gə njɛ̰ baa be ja, to gə tuga kəm jib be ɗaa, gə ndu kuul gə gə bo̰. Mba kuul a ɓar, ngaɓa nje d-uy d-a ndol gə darɔ gə ndum ang, ngaɓa sijee le, d-a mbəl rɔ-si. 53Mba darɔ gə ndum nee le, a kula darɔ gə ndum ang ja ɓa, ngaɓa darɔ nje kuy nee le, a kula ye gə nje kuy ang ja ɓa.
54Logə darɔ gə ndum nee a kula ꞌye nje ndum ang, ngaɓa darɔ nje kuy a kula darɔ gə nje kuy ang ɗaa, tar gə ꞌɗa mə mbede gə le a kaw lo-e gə na:
Yo ꞌcɛdə-i ɗɔ ngaa.
55 Yo, cɛdə ɗɔ lə-i ga̰ ɗa ngaa wa?
Yo, ngab-i to ɗa ngaa wa?
56Ngaw yo le to neɗa gə kṵra̰y; singamongə neɗa gə kṵra̰y to torondu. 57Ngaa oyo ar Luba, gə ar-si j-a cɛdə ɗɔ ɗəw gə lə Mbayɓe lə-sijee Jeju Kirisi!
58Be ɓa, ngan ko̰-mje gə m-njigi-si ya̰, uwaje gədərə, ulaje ngira-si nangə, awje gə kede-kede mə kula gə lə Mbayɓe, mba ꞌgərəje to gə kula lə Mbayɓe gə ꞌɗaje le to ne gə baa ang.
Currently Selected:
1 Nje gə Kɔrɛnt 15: lap
Highlight
Copy
Compare
Share
Want to have your highlights saved across all your devices? Sign up or sign in
© 2020, ATALTRAB. All rights reserved
