Malkus 4

Dalil pasal jama naburan bani

(Matiyu 13.1-9; Lukas 8.4-8)

1Pag-anu, lay na baw balik si Isa nōꞌ ndooy ni bihing Danaw Jalil. Sugaꞌ pagka sakiyan na jama ngandogsog iya, lay ya dutai ningkōꞌ taꞌ bagung ma tapit pa bihing. Kuwan baanan ga jama looy siꞌ tu, lay na jaꞌ ndooy ni tapiyan pakale niiya. 2Iya siꞌ bay nōꞌ, meka dalil bay pakoy na. Disu meꞌ tuu, yuk na,

3“Pakale doꞌ kam. Luu disu jama lay naburan bani ni huma na. 4Pag sabud na, kasohean lay tumiluꞌ pa tangngaꞌ lān sampay lay katis kinakan meꞌ siga manuk-manuk. 5Kuwan kasohean bani, lay tumiluꞌ pa jawom kabatuhan dangkitiꞌ du tanaꞌ na. Dari lay pasapput deꞌ-dēꞌ tomoꞌ bani looy sabap yaꞌ bay lawom man da njawom tanaꞌ. 6Sugaꞌ pag pasuꞌ jaꞌ llaw, yaꞌ hallom, lay du lūs tinanom looy sampay lay na ngalayu sabap yaꞌ bay nganggamut pa lawom. 7Kuwan kasohean bani, lay tumiluꞌ pa jawom lumput itingan. Pag tomoꞌ na, yaꞌ kuhi buwaꞌ batan lay limbo meꞌ lumput. 8Kuwan kasohean bani, lay tuwaꞌ ni tanaꞌ mahap. Dari siꞌ, mahap meꞌ da sulig sampay lay na buwaꞌ. Kasohean, eka buwaꞌ na njawom dampoon lipat min tallumpūꞌ; kasohean lipat min nnompūꞌ; kuwan kasohean, sampay lipat min dahatus.”

9Pag-anu, yuk si Isa lagi, “Kaam ma pakale ni bitsala ku, pahamun bi paayad.”

10Pag lay jaꞌ moleꞌ ga baanan jama looy siꞌ, ilooy sa tamban ni si Isa yana ga rasul na sikasapu-duwa ka siga mulit na kasohean. Pag-anu siꞌ, tinilaw na baw ya meꞌ da bong oy kamaatunan dalil looy siꞌ.

11Yuk si Isa ninsila, “Ohoꞌ, baan ta sa kam, batan ndang bay sina sinukuꞌ ningkaam pinahatiyan hāl pamarinta Tuhan ma yaꞌ gi bay lahil maruhuꞌ. Sugaꞌ bong ni siga jama sarī ma yaꞌ pitsayaꞌ niyaku, ngandalil jaꞌ ku man ku noan sila. 12Jama meꞌ sila ina, tuwaꞌ pa sila na bay halling njawom kitab, ilooy ma yuk na, ‘San ina sila ngandaꞌ, yaꞌ du sila kakila. San sila pakale, yaꞌ du sila kuhi kahati. Bong siꞌ ilay saꞌ meꞌ looy, mastiꞌ lay na bay tawbatan da dusa da boꞌ da inampun na meꞌ Tuhan.’ ”#(4.12) Kitab Nabi Isaya 6.9-10.

Si Isa makkasan kamaatunan dalil pasal jama naburan bani

(Matiyu 13.18-23; Lukas 8.11-15)

13Pag-anu, yuk si Isa ninsila, “Bong yaꞌ san bay tahati bi dalil looy siꞌ samura-mura na, pooy na baw mintu meꞌ bi kahati bong ku makoy ga dalil sarī?

14“Na kamaatunan dalil looy ilay siꞌ meꞌ tuu: Bani looy ilay siꞌ ma bay sinaburan yana umanat Tuhan pinasaplag. 15Kuwan tanaꞌ ni tangngaꞌ lān man bani looy bay tumiluꞌ, tuwaꞌ pa sagannap ma bay kale umanat Tuhan, sugaꞌ magti ndagmit meꞌ Ibilis man jawom atay da.

16“Kuwan tanaꞌ looy ma njawom kabatuhan man bani looy bay tumiluꞌ, tuwaꞌ pa sagannap ma bay kale umanat Tuhan sampay magti pitsayaꞌ ni kagāk da. 17Sugaꞌ pagka yaꞌ bay nganggamut pa lawom umanat looy njawom atay da, yaꞌ du hallom tatasan da pitsayaꞌ. Pag luu jaꞌ kabinsanaan atawa laug tuwaꞌ njataꞌ da sabap meꞌ da pitsayaꞌ ni umanat Tuhan, siglaꞌ du sila patatak.

18“Kuwan tanaꞌ looy ma meka lumput itingan na man bani looy bay tumiluꞌ, tuwaꞌ pa sagannap ma bay kale umanat Tuhan sampay pitsayaꞌ, 19sugaꞌ wā sila hanggaw ni hāl meꞌ da llum ni junyaꞌ. Taboo-boo sila magsiꞌ meꞌ napsu da ni sīn sampay ni kajinisan. Dari song hallom, umanat Tuhan njawom atay da, bong dalil ta pa tinanom, lay na limbo leꞌ lumput sampay yaꞌ du buwaꞌ.

20“Boꞌ tanaꞌ looy ma mahap man bani looy bay sinaburan, tuwaꞌ pa sagannap ma bay kale umanat Tuhan sampay kinanna meꞌ da banahan. Pag toklas na, jinisan kaayaran takita ni kaallum da. Kaayaran da ina, bong dalil ta pa tinanom, kasohean buwaꞌ lipat min tallumpūꞌ, kasohean lipat min nnompūꞌ, kuwan kasohean sampay lipat min dahatus.”

Kabanahan yaꞌ dari tinapuk

(Lukas 8.16-18)

21Pag-anu, yuk si Isa, “Kaam ina, katoonan bi na kabanahan. Sangkon daa na tapukun bi. Bong dalil ta pa palitaan, yaꞌ sina luu jama pus na nantikan palitaan tinangkopan na baw ka undam atawa inannaꞌ ndiyoꞌ kantil. Mastiꞌ gowet na jaꞌ sina pa jataꞌ supaya karantaan mimon njawom lumaꞌ. 22Intong na, pag pōꞌ kabanahan, mimon ma bay llimbuhan, pinalahil na. Damikiyan, mimon ina ma bay sinipuk, kinatoonan na. 23Na kaam ma pakale ni bitsala ku, pahamun bi paayad.”

24-25Yuk si Isa lagi, “Isbatun bi paayad tōꞌ ku. Batan mangkin ina kam magtuyuꞌ ngahati, mangkin pasōng gi pangahati bi. Boꞌ na, sinampunan gi sina meꞌ Tuhan. Sugaꞌ soysoy ina yaꞌ ngisbat bitsala ku, san luu pangahati na dangkitiꞌ, kinaddoan du.”

Pamarinta Tuhan ndalil pa bani sinaburan

26Yuk si Isa lagi, “Meꞌ tuu situ karuha pamarinta Tuhan: Luu jama bay naburan bani njawom huma na. 27Llaw pa dangallaw, sasang na tuli-matiꞌ, bani looy mastiꞌ tomoꞌ jaꞌ maka suligan didihan da na sadjaꞌ. Boꞌ jama looy ilay siꞌ ma bay nabud, yaꞌ du tahati na bong pooy meꞌ da sulig. 28Tanaꞌ looy na mismu kasulig ni bani looy. Duhuꞌ takita yana tomoꞌ. Song hallom, pasapput na buwaꞌ da sampay katting na isi da. 29Pag tahak na banahan, ilooy ma kinattom na meꞌ jama looy sabap taabut na timpu na.”

Pamarinta Tuhan ndalil pa bigi mustard tinanom

(Matiyu 13.31-34; Lukas 13.18-19)

30Maka yuk si Isa, “Ngandalil gi ku pamarinta Tuhan 31pa bigi mustard bay tinanom njawom huma. Minsan lannik bigi looy man sikamimon, 32pag sulig na, iya gi pinakamehe man mimon jambangan sampay lay na dari kayu. Ngangkang na engas na sampay pinagsangan na meꞌ manuk-manuk.”

33Sarī man ga ilooy siꞌ, meka gi dalil man si Isa bay masaplag umanat Tuhan ni baanan jama ndooy, gantaꞌ ma takaya pangahati da. 34Tuktuk na noan sila, wā ya ngandalil. Sugaꞌ pag taabut sila-sila sa ka ga mulit na, lay du passaꞌ na kamaatunan siga dalil looy labbasakayi.

Si Isa mataddoꞌ libut

(Matiyu 8.23-27; Lukas 8.22-25)

35Pag taabut deꞌ kohap, yuk si Isa ni ga mulit na, “Palintas doꞌ kitabi pa dambilaꞌ danaw.” 36Dari lay du mbanan ga mulit na baanan jama ndooy sampay lay na sila mmeꞌ dutai pa taꞌ kumpit ma ndang man si Isa bay pauwan. Pag tuwak da, luu gi kasohean kumpit bay pahaboy ninsila. 37Sasang da siꞌ ngalē pa dambilaꞌ, takka na libut. Ni kabasag baliyu, sinakat na ga kumpit da meꞌ lamba sampay adak na ga tumallob. 38Libut looy siꞌ takka sasang si Isa tuli ni buliꞌ kumpit. Dari lay ya binatiꞌ meꞌ mulit na, yuk da, “Tuwan, yaꞌ san bitu ko maruli! Matoy limbo na situ kitabi!”

39Dari ilooy ma bangun du si Isa, boꞌ na nohoꞌ baliyu looy patagong. Maka yuk na ni lamba looy, “Ddong na! Banti na ko!” Dari lay du patagong baliyu looy sampay tud taddoꞌ na lahat saꞌ alang-alang.

40Pag-anu, yuk na ni ga mulit na, “Ongoy tu biddaꞌ na baw tawu bi? Yaꞌ gi kitu luu pangando bi niyaku?”

41Ga mulit na siꞌ tu, tud bay kahimattaan. Dari sitilaw-tilaw na ga sila, yuk da, “Jama oy doꞌ tu meꞌ tuu? Sampay baliyu ka lamba ngasip jaꞌ du niiya!”

Currently Selected:

Malkus 4: sjm

Highlight

Copy

Compare