Malkus 3

Si Isa ngulian lalla kimoy tangan na

(Matiyu 12.9-14; Lukas 6.6-11)

1Na ni disu Llaw Pahali, lay na baw si Isa pa langga balik. Ndooy siꞌ, luu disu lalla kimoy tangan na. 2Maka luu du ndooy siga Parisi maimanan si Isa. Kainagon da malkalaꞌ iya bong ya bay nguliꞌ ni Llaw Pahali.

3Pag-anu, yuk si Isa ni lalla looy ma kimoy tangan na, “Tu ko, Nges. Nangge doꞌ ko ntuu ni duhuan.” Lai jaꞌ siꞌ, 4yuk si Isa ninsila sikamimon ndooy, “Mamooy lay la numan ni saraꞌ pasal Llaw Pahali, buwat mahap, atawa buwat maat? Nalamat jama atawa mapatoy sila?” Sugaꞌ lay jaꞌ sila diyam-diyam.

5Si Isa siꞌ tu, sasang na ngandaꞌ ninsila, maglamud na lasu na ka susa na ninsila sabap tumatandaꞌ yaꞌ san luu luuy da ni jama. Pag-anu, yuk si Isa ni lalla looy, “Pa-nnatun na tangan nu.” Pag nnat na, sarunduun du ya kasay.

6Pag ndaꞌ siga Parisi meꞌ looy, magti sila lakka man langga. Pag-anu, boꞌ da isun ka baanan raayat Gubnul Herod bong pooy meꞌ da mapatoy si Isa.

Meka patuhut ni si Isa pa Danaw Jalil

7Na pag lakka si Isa ka ga mulit na mandooy, lay na baw sila pilay pa bihing Danaw Jalil. Jama siꞌ tu sakiyan bay patuhut niiya. Luu na ga jama man Jalil, man Yahudiya, 8man Jerusalem, man Idumeya, sampay man dambilaꞌ Sōng Juldan. Minsan jama man tagan siga daira Tayil ka Saydon, luu na du bay bahuklud pilay. Kon da bay pilay pa mman na sabap lay taaka da siga pakaradjaan kahaylan-haylan bay pabuwat na.

9Pag ndaꞌ si Isa paeka na pin jama ndooy, lay ya nohoꞌ pinatapitan bagung ni mulit na man na dutai, taggahaꞌ tadogsog na baw ya meꞌ baanan jama. 10Batan sagannap ma sakihan ndooy, pag ndaꞌ da ndang meka na bay kaulian meꞌ si Isa, palogos na pin sila papassūt bong pin ya tapurut da jaꞌ. 11Maka tuktuk na takita meꞌ siga jama sineytan, magti sila pahantak ni awpan na sambayan da ngahowap, yuk da, “Kau ina Anak Tuhan!” 12Sugaꞌ luu-luu ngahowap meꞌ looy, magti sila sinaggong meꞌ si Isa yaꞌ nohoꞌ makitau bong soy ya.

Sapu-duwa jama pineneꞌ meꞌ si Isa binuwat rasul na

(Matiyu 10.1-4; Lukas 6.12-16)

13Na paddus mandooy, lay na baw si Isa nukad punu maka luu du bay boo na sagannap ma karomanan na mmeꞌ niiya. 14Takka njataꞌ, lay ya meneꞌ sapu-duwa ninsila binuwat rasul na. Sila siꞌ tu bay pineneꞌ mmeꞌ niiya supaya sila tasohoꞌ na ngalataan lahat masaplag umanat Tuhan song hallom. 15Maka lay gi sila buwanan na kawasa-kapatut malakka siga seytan.

16Na ga ilooy siꞌ sikasapu-duwa bay peneꞌ na, yana ga si Saymon ma bay awnan na si Pitel. 17Pasunuꞌ si Yaꞌkub ka si Yahiya, siga anak si Sibidi. (Meꞌ si Isa ngandē sila, Bowaneljes. Hatiyan na, siga anak guntu.) 18Luu gi si Andru, si Pilip, si Baltolome, si Matiyu, si Tomas maka si Yaꞌkub, yana anak si Alpiyus. Pasunuꞌ si Tadiyus, si Saymon ma bay pingkaꞌ ngatuhan parinta Rom, 19ka si Judas Iskariyut ma bay muwan tipu-akka njataꞌ si Isa song hallom.

Si Isa maka Belsibul

(Matiyu 12.22-32; Lukas 11.14-23; 12.10)

20Pag-anu, lay na baw si Isa ka ga rasul na pilay pa disu lumaꞌ man da pahantiꞌ. Ndooy siꞌ, meka na baw jama kumpo-kumpo pabalik sampay yaꞌ na san luu masa man ga si Isa kasakap mangan.

21Pag taaka ga lūng-kampung si Isa bay kahalan na ndooy, ilooy ma lay sila pilay ngaddoꞌ iya, batan yuk da, “Yaꞌ na ya njawom sayu.”

22Na ndooy siꞌ, luu siga guru saraꞌ agama ma bay takka man Jerusalem bay mitsala si Isa, yuk da, “Lay na bilay ya inasok meꞌ Belsibul,#(3.22) Belsibul itu yana disu gallahan Ibilis. panghuluꞌ siga seytan. Ilooy na silay poonan kawasa na malakka siga seytan.”

23Dari ilooy ma lay sila linganan si Isa pa bihing na boꞌ na muwanan sila pamintangan, yuk na, “Pooy lay la meꞌ na sikatuwaꞌ Belsibul malakka pagkahi na seytan? 24Bong nnaꞌ ta pa siga pa-mmean parinta, bong sila wā magsaggaꞌ, basta yaꞌ baw silay hallom tatasan pamarinta da. 25Damikiyan, bong bay luu dampalūng wā sasaꞌ-manasaꞌ, yaꞌ hallom langkat du paglūng da. 26Belsibul pun ina, bong ya magsaggaꞌ ka siga pagkahi na seytan, yaꞌ du natas pamarinta na, mastiꞌ langkat du.

27“Belsibul ilay meꞌ sapantun lalla basag kawasa na wā nganjagahan lumaꞌ na paayad. Yaꞌ luu kaasok lumaꞌ na ngahawasan altaꞌ na bong yaꞌ du bay kalabihan kawasa na. Sugaꞌ bong luu ngantanan kawasa mas mehe man lalla looy, taingkot na lalla looy sampay tahawasan na altaꞌ na.”

28-30Na sabap sila bay māꞌ luu seytan na muwanan iya kawasa, yuk na ninsila, “Baan ta kam banahan, san gi sina oy dusa manusiyaꞌ sampay bitsala da pangka pa Tuhan, dari gi pinuwasan. Sugaꞌ soysoy ina māꞌ pabuwatan Rū Sutsiꞌ yana pabuwatan seytan, mastiꞌ yaꞌ na ya koleꞌ kaampunan labba man junyaꞌ sampay pa ahirat. Inaa na sina dusa ma yaꞌ tapuwasan saumu.”

Sagannap ma inawnan paglūng si Isa

(Matiyu 12.46-50; Lukas 8.19-21)

31Yaꞌ hallom, luu na baw takka nneꞌ si Isa ka ga danganakan na pa lumaꞌ man na nōꞌ. Sasang da ngagad ni poan, lay sila nohoꞌ jama nginganan iya. 32Dari sasang si Isa liput meꞌ baanan jama ndooy ningkōꞌ, ilooy ma luu na pahati niiya, yuk na, “Tuwan, luu la ga nneꞌ nu ka ga danganakan nu ndooy ni poan. Doman konoꞌ sila magbitsala ka kau.”

33Pag tampung si Isa, “Ohoꞌ, sugaꞌ meꞌ ku ngingat, saꞌ sat sila jaꞌ nneꞌ ku ka ga danganakan ku.” 34Pag-anu, ngandaꞌ na baw ya ni sagannap ma lundooy ningkōꞌ ngaliput iya, boꞌ na halling, “Siga jama tuu pun itu bilang ku du nneꞌ ku ka ga danganakan ku. 35Batan sagannap ma mean kahandak Tuhan, sila pun ina bilang ku du ga danganakan ku ka nneꞌ ku.”

Currently Selected:

Malkus 3: sjm

Highlight

Copy

Compare