Salsila siga Rasul 24

Si Pol pinalkalaꞌ meꞌ siga Yahudi ni awpan Gubnul Pilik

1Na luu jaꞌ siꞌ ga lima ngallaw bay pingkaꞌ, takka na baw panghuluꞌ imam, yana si Ananiyas ka ga kasohean matatoa ni agama. Maka lay gi sila moo disu abugaw inawnan si Teltullus. Maksud da malkalaꞌ si Pol ni awpan Gubnul Pilik.

2Na luu jaꞌ siꞌ si Pol bay binoo pa awpan gubnul, ilooy ma nagnaꞌ na si Teltullus malkalaꞌ si Pol, sugaꞌ lay doꞌ ya duhuꞌ mantug gubnul, yuk na, “Tuwan Gubnul Pilik, ni kaayad pamarinta nu, hallom na la paglahat tabi njawom kasalassayan. Maka sabapan kapandoyan nu, meka na kamadjuwan takita kami ni sikaliput lahat. 3Tuwan Gubnul Pilik, katoonan kami yaꞌ luu sikamimon kaayaran meꞌ looy siꞌ bong saꞌ man sabapan nu. Dari mehe situ meꞌ kami magsuku ningkau.

4“Halin ta pagbitsalahan, yaꞌ na ku doman masensengan waktu nu. Paku kami junjung ningkau, pakalehun doꞌ bitsala kami sakāng.

5“Na kon kami itu malkalaꞌ lalla naa ni awpan nu batan paninggai-paninggai jaꞌ ya, mōꞌ jaꞌ ya kalingogan. Boꞌ iya na sina poonan kahiluhalaan mehe ni bangsa kami Yahudi. Iya na sina disu pa-mmean ni baanan jama ma ngantanan agama bahau, yana baanan ma mmeꞌ ni tōꞌ disu lalla man Nasaret. 6Boꞌ dak gi silay patamakan na langga kami ndooy ni Jerusalem. Kahapan lay na ya sungkuban kami. Iya ina adak na bay binotangan hukuman ni lanan saraꞌ agama kami. 7Sugaꞌ lay na baw ya inagaw meꞌ Komandel Laysiyas ka ga sundalu na man kami. 8Sampay itu na kami lay sohoꞌ na pitu pa mman nu bong kami doman malkalaꞌ iya. Batnaa, Tuwan Gubnul, bong ko ina numariya iya, mastiꞌ tabista nu jaꞌ sina mattan diklamu kami njataꞌ na.”

9Pus si Teltullus mitsala, kuwan siga soheꞌ na bangsa Yahudi, lay gi ngaminan bitsala na, yuk da, “Bana sina.”

Si Pol ngandaawa ni awpan Gubnul Pilik

10Pag-anu siꞌ, lay na inisalatan meꞌ gubnul si Pol nohoꞌ mitsala. Dari yuk si Pol, “Tuwan Gubnul, tud gāk ku kau ngahukum palkalaꞌ tuu batan yaꞌ ko awam ni hāl-hiwal bangsa kami Yahudi. Katoonan ku ndang hallom na ko daran ngahukum siga palkalaꞌ bangsa kami. Dari batnaa pōꞌ ku na daawa ku ni pag-awpan nu.

11“Tuwan Gubnul, bong siꞌ ko bay doꞌ pakiyaka, basta katoonan nu jaꞌ sina bohoꞌ sapu-duwa ngallaw halloman ku bay takka pa Jerusalem mmeꞌ numba ni langga mehe. 12Na kuwan siga Yahudi naa ma malkalaꞌ aku, yaꞌ sina sila bay pingkaꞌ ngita aku magjaw-jawap atawa ngalingog soy maka soy na njawom langga mehe. Ni siga langga sarī pun atawa ninggai-ninggai jaꞌ ndooy ni Jerusalem, yaꞌ du sila bay ngita aku mōꞌ kalingogan. 13Boꞌ yaꞌ san luu buktiꞌ tapōꞌ da ningkau ni hāl diklamu da njataꞌ ku. 14Tuwan Gubnul, mangaku baw situ ku mmeꞌ ni lān kasalamatan ma baꞌ-bāꞌ siga pagkahi ku Yahudi ntuu magsāꞌ. Sugaꞌ bong baw inawnan Tuhan ma sumba ku, yana Tuhan kabboꞌ-bboan kami du. Maka pitsayaꞌ du baw situ ku ni mimon saraꞌ agama kami sampay na mimon suwat kanabi-nabihan njawom kitab. 15Maka sibuꞌ du ku ka ga pagkahi ku Yahudi ntuu pitsayaꞌ mimon manusiyaꞌ ma lay na matoy, intong saꞌ intong, mastiꞌ pinakallum du bbos-bbos. 16Sangkon sabuli-buli ku situ buwat mahap supaya tallak njawom honaꞌ-honaꞌ ku yaꞌ luu sutsutan njataꞌ ku pa Tuhan sampay ni pagkahi ku manusiyaꞌ.

17“Na paddus ku bay ngalataan kalahat-lahatan daka dangon taun na, bahau jaꞌ situ ku bay pabeleng pa Jerusalem. Maksud ku masampay sīn bay pinokonan meꞌ siga bangsa sarī man narakahan siga pagkahi ku Yahudi ma njawom tiksaꞌ. Maka luu du maksud ku ndooy mmeꞌ nong kulban pa Tuhan. 18Dari siꞌ sasang ku ni langga mehe bay nutsiꞌ dī ku ni lanan arat agama bangsa kami, lay ku takita meꞌ kasohean Yahudi man Asiya. Waktu looy siꞌ, yaꞌ du meꞌ noy eka jama ndooy maka yaꞌ du ku bay mōꞌ hiluhalaꞌ. 19Ilooy ya bay mōꞌ hiluhalaꞌ yana kasohean Yahudi looy siꞌ man Asiya. Sampay sila na silay bay mitnahan aku. Subay siꞌ sila ya pitu pa mman nu ngandiklamu bong tud mattan luu kasaan ku tatuntut da. 20Sugaꞌ pagka yaꞌ sila luntuu, bong dari Tuwan Gubnul, sōn doꞌ siga Yahudi naa māꞌ bong oy dusa ku bay tatammu da waktu ku bay sinumariya meꞌ baanan Sanhidrin. 21Sila ina, ilooy du bay tasakup da bay jaman ku ngahowap ni awpan da, ilooy ma yuk ku, ‘Ituu du tu man ku hinukum meꞌ bi batnaa sabap pitsayaꞌ ku mimon manusiyaꞌ ma lay na matoy mastiꞌ pinakallum jaꞌ meꞌ Tuhan bbos-bbos.’ ”

22Na Gubnul Pilik siꞌ tu, ndang meka katoonan na pasal lān kasalamatan ma kinapitsayaan meꞌ si Pol. Dari lay na doꞌ suhutan na palkalaꞌ na, yuk na, “Pag mintu takka na Komandel Laysiyas, boꞌ ku muwan hukuman ni palkalaꞌ njataꞌ nu.” 23Pag-anu, lay na sohoꞌ na njagahan si Pol ni kapitan sundalu, sugaꞌ nohoꞌ jaꞌ baw ya binuwanan kasumunsayaan dangkitiꞌ. Maka lay gi ya nugun nohoꞌ jaꞌ pinadari kabagayan si Pol muwanan iya oy-oy jaꞌ kulang-kabus na.

Si Pol masaplagan Gubnul Pilik ka nda na si Drusilla

24Na paddus meꞌ looy, lay na baw Gubnul Pilik palakka. Sugaꞌ luu jaꞌ siꞌ daka dangoy ngallaw, luu na du ya bay pabeleng ka nda na si Drusilla. Nda na ilay bangsa Yahudi.

Pag-anu siꞌ, lay na baw sohoꞌ Gubnul Pilik si Pol binoo pa mman na. Luu jaꞌ siꞌ ya, lay na baw gubnul nohoꞌ pinahatiyan ni si Pol hāl ntan ma kinapitsayaan meꞌ na pasal si Isa Almasi. 25Pag-anu, lay gi si Pol maan iya subay jama paintong ka ngagak dī da sabap song takka na sina hukuman Tuhan. Dari ilooy ma hanggaw na baw Gubnul Pilik pakale niiya. Sangkon yuk na, “Ddong na doꞌ ko mitsala batnaa. San ko lakka na doꞌ. Tawag ta sa ko pabalik bong mintu luu waktu ku.”

26Na song hallom, daran si Pol tinawag meꞌ Gubnul Pilik binoo magbitsala. Kainagon na binuwanan na ya sīn meꞌ si Pol man na maddusan palkalaꞌ njataꞌ na.

27Na paddus duwan taun, lay na ginantian si Pilik maggubnul meꞌ si Polsiyus Pestus. Sugaꞌ pagka Gubnul Pilik doman nulut siga Yahudi, masi du yaꞌ bay pōꞌ na si Pol man jawom jīl.

Currently Selected:

Salsila siga Rasul 24: sjm

Highlight

Copy

Compare