इब्रानियों 9

दनियाँ अन हरग में भगती

1देको पेलो करार ज्यो इजराएली मनकाँ अन परमेसर का बचमें हो, वींमें सेवा-चाकरी का नेम हा, अन एक सेवा करबा का वाते पुवितर जगाँ भी बणईगी ही। 2#निर 26:1–30; निर 25:31–40; निर 25:23–30एक तम्बू बणायो ग्यो हो, जिंका पेला कमरा में दिवो मेलबा को आळ्यो, टेबल अन भेंट की रोट्याँ ही, वा पुवितर जगाँ केवाती ही। 3#निर 26:31–33अन दूजाँ परदा का पाच्छे वो कमरो हो, ज्यो खास पुवितर जगाँ केवातो हो। 4#निर 30:1–6; निर 25:10–16; निर 16:33; निर 25:16; वे.वि 10:3–5अन पछे मयने खुसबु आबा का वाते धुप-ध्यान करबा होना की वेदी अन होनाऊँ मढी तकी करार की पेटी ही। अन ईं पेटी का मयने होनाऊँ मढ्यो तको एक ठामड़ो हो, जिंमें मन्ना हो अन हारून की वाँ लाकड़ी भी जिंके कूँपळा फुटगी ही अन करार लिक्या तका भाटा हा। 5#निर 25:18–22करार की पेटी का ऊपरे परमेसर की मेमामय हाजरी का वाते करूब नाम का हरग-दुताँ की मूरत्याँ बणी तकी ही, जी मापी की जगाँ पे छाया कररिया हा। पण ईं टेम में माँ अणा बाताँ की हेली चरचा ने कर सका हाँ।

6तम्बू को हारोई काम सई तरियाऊँ पूरो व्या केड़े याजक पेला ओवरा में रोज जान आपणी सेवा को काम करता हा। 7पण मयने का ओवरा में मायाजक साल में एक दाण जातो हो। वो बना वीं लुई के कदी ने जातो हो, जिंने वो खुद अन आपणाँ मनकाँ का अणजाण में किदा ग्या पापाँ का वाते परमेसर के भेंट चड़ातो हो। 8अणीऊँ पुवितर आत्मा योईस बतावे हे के, जद्याँ तईं तम्बू को पेलो ओवरो ऊबो तको हे, तद्याँ तईं खास पुवितर जगाँ को गेलो परगट ने वेई। 9अन यो तम्बू अबाणू की टेम का वाते एक केणी हे, जिंमें अस्यी भेंट अन बलीदान चड़ाया जावे हे, जणीऊँ आरादना करबावाळा का मन पुरी तरियाँ सुद ने वे सके हे। 10ईं हारी चिजाँ तो खाबा-पिबा, नावा-धोबा का सुद वेबा का मनकाँ का अलग अलग नेम हे। अन ईं नेम जद्याँ तईं परमेसर को आगलो क्रम लागू ने वेजावे, वतरे लागू रेई।

मसी को लुई

11पण मसी अणा हव हव चिजाँ को मायाजक बणन आयो हे। तो वीं हात का बणाया तका तम्बू में ने, पण अणीऊँ भी मोटा अन सिद तम्बू में सेवा करे हे। मतलब वो तम्बू अणी दनियाँ को भाग ने हे। 12अन बकरा अन पाडो का लुईऊँ ने पण आपणाँ खुद का लुईऊँ एकीस दाण पुवितर जगाँ में ग्यो अन आपणाँ वाते हमेस्यान को छुटकारो पाको कर दिदो। 13काँके जद्याँ बकरा अन पाडा का लुई अन पाडी की भभूत वाँका पे छाटी जावे, ज्यो रिति-रिवाज का जस्यान असुद ने सुद बणावे हे, ताँके वीं देह का हस्याबूँ सुद वे सके। 14आ बात हाँची हे तो मसी को लुई कतरो जोरावर वेई? जणी अनंत आत्माऊँ खुद ने निरदोस बली का रूप में हमेस्या वाते परमेसर के चड़ा दिदो। वींके अस्यान करबाऊँ अन वींके लुईऊँ आपाँने मोत का आड़ीऊँ लेन जाबावाळा करमाऊँ आपणाँ मन सुद कर करी, ताँके आपाँ जीवता परमेसर की सेवा कर सका।

15ईं वाते मसी एक नुवा करार को बिचोलिया हे, ताँके जीं बुलाया ग्या हे, वीं अनंत उतरादिकार पा सके, जिंको वादो परमेसर किदो हो। अबे देको, जी पेला करार का जस्यान जणा पापाँ किदो हो, वाँने पापाऊँ छुड़ाबा की वाते मरन किमत चुकई अन वाँने आजाद किदा।

16काँके जटे वसीयतनामो लिक्यो जावे हे वटे वसीयतनामो बणाबावाळा की मोत की मोत को सबूत मलणो जरूरी हे। तद्याँईस वो काम करे हे 17काँके वसीयतनामो मरबा केड़ेईस लागू वेवे हे। अन जद्याँ तईं वसीयतनामो बणाबावाळो जीवतो रेवे हे, तद्याँ वो लागू ने वेवे हे। 18ईं वाते पेलो करार भी बना लुई के, लागू ने किदो ग्यो हो? 19#निर 24:6–8ईं वाते जद्याँ मूसे नेमा की हारी आग्या लोगाँ ने हुणई नाकी, तो वणी पाडा-पाडी अन बकरा को लुई पाणी में मलान लाल ऊन अन जुफा की डाळ्याऊँ वीं किताब पे अन हाराई लोगाँ पे छाँट दिदो। 20वणी क्यो हो, “यो वीं करार को लुई हे, जिंकी आग्या परमेसर थाँने दिदी हे।” 21अन अणी तरियाँ वणी तम्बू अन सेवा का हाराई समान पे लुई छाँट्यो। 22मूसा का नेमा का जस्यान हारी चिजाँ ने लुई छाटकन सुद किदी जावे हे अन बना लुई वेवाड़्याँ मापी ने मले हे।

मसी के बली वेबाऊँ पाप माप वेग्या

23ईं वाते ओ जरूरी हे के, जीं चिजाँ हरग का नकल का रूप में हे, वाँने जनावराँ का बलीऊँ पुवितर करणी छावे। पण हरग की चिजाँ तो अणाऊँ ओरी बड़िया बलीऊँ पुवितर किदी जावे हे। 24काँके मसी हात का बणई तकी पुवितर जगाँ में ने ग्यो, ज्या जगाँ हाँची पुवितर जगाँ की नकल का जस्यान हे, पण हरग में ग्यो हे, ताँके आपणाँ वाते परमेसर का हामें पेरवई वेवे। 25ईंको अरत ओ ने के, वो आपणाँ खुद ने बार-बार बली चड़ाबा का वाते हरग में ग्यो, जस्यान मायाजक हर साल दूजाँ को लुई लेन पुवितर जगाँ में बली चड़ाया करे हे। 26यद्याँ अस्यान वेतो तो दनियाँ का रचनाऊँ लेन वींने आकोदाण दुक जेलणो पड़तो, पण अबे जुग का अन्त में वो एकीस दाण परगट व्यो हे, ताँके आपणाँ बलीदानऊँ पाप ने छेटी कर दे। 27जस्यान मनकाँ का वाते एक दाण मरणो अन वींका केड़े न्याव वेणो पको हे। 28#यसा 53:12वस्यान मसी भी एक दाणइस नरई का पापाँ ने छेटी करबा का वाते बलीदान व्यो हे। वो अबे पापाँ ने छेटी करबा का वाते ने, पण ज्यो वींकी वाट नाळरिया हे वाँका छूटकारा का वाते दूजी दाण परगट वेई।

Currently Selected:

इब्रानियों 9: एम टी आर

Highlight

Copy