इब्रानियों 7

याजक मलिकिसिदक

1 # उत्प 14:17–20 यो मलिकिसिदक सालेम को राजा हो अन मान परमेसर को याजक हो। जद्याँ अबराम च्यार राजावाँ ने हरान पाछो आरियो हो, वीं दाण यो याजक अबरामऊँ मल्यो अन वींने आसिरवाद दिदो। 2अन अबराम वींने वणा हाराई मूँ ज्यो युद में जीत्यो हो, वींको दसवो भाग दिदो। मलिकिसिदक का नाम को पेलो अरत हे के, “धारमिकता को राजा” अन वो सालेम को राजा हो, ईंको अरत हे, “सान्ती को राजा।” 3वींका बापू अन वींकी माँ कन पुरवजाँ को कई लेको ने मले हे, वींके जनम अन मोत को भी कटे ने लिक्यो तको हे। परमेसर का बेटा का जस्यान वो हमेस्यान का वाते याजक बण्यो तको हे। 4अबे ईं बात पे चेतो लगावो के, वो कतरो मान आदमी वेगा, जिंने आपणाँ वंस को खास पुरवज अबराम भी लड़ाई में जीतन ज्यो लायो वींको दसवो भाग दिदो हो। 5अन देको मूसा का नेमा के जस्यान लेवी बंस का याजक बणे हे। अन वाँने मनकाँऊँ मतलब यहूदी भई-बन्दाऊँ वेवस्ता का जस्यान दसवो भाग लेवा की आग्या मली हे, जद्याँ के वीं खुद भी अबराम का बंस का हे। 6पछे भी मलिकिसिदक ज्यो लेवी बंस को ने हो, अबरामऊँ दसवो भाग लिदो। अन वणी अबराम ने आसिरवाद दिदो, जिंका नके परमेसर का वादा हा। 7ईंमें कई सक ने के, मोटो फोरा ने आसिरवाद देवे हे। 8अन जटा तईं याजक की बात हे तो, दसवो भाग भेळो करबावाळा याजक मनकाँ का जस्यानीस हे जीं मरे हे। पण मलिकिसिदक का बारा में सास्तर केवे हे के, वो अबाणू भी जीवतो हे। 9ईं वाते आपाँ अस्यान भी के सका हा के, जीं लेवी दसवो भाग लेवे हे, वीं आपणाँ बड़ाबा अबराम का जरिये दसवो हिस्यो मलिकिसिदक ने दिदो हो। 10काँके जद्याँ मलिकिसिदक लेवी बंस का पेला मनक अबरामऊँ मल्यो, वीं दाण तईं तो लेवी बंस ने निकळ्यो हो। पण जिंमेंऊँ वो बंस निकळ्यो हो, वाँको बड़ाबा अबरामईस हो।

11लेवी के याजकपणा के आदार पे पुराणा टेम में परमेसर इजराएल का मनकाँ ने मूसा का नेम दिदा। पण लेवी बंस को याजकपणो परमेसर की नजरा में मनकाँने खरा ने बणा सक्यो। ईं वाते परमेसर ने दूजाँ याजकने खन्दाबा की जरूत पड़ी, वो याजकपणो लेवी बंस का याजक हारून का याजकपणा का जस्यान ने हो। पण वींको याजकपणो मलिकिसिदक की रिती का जस्यान हो। 12जद्याँ याजकपणो बदले जावे हे तद्याँ नेमा में भी बदलवा वेणो जरूरी हे। 13काँके जिंका बारा में ईं बाताँ किदी गी हे, वो दूँजी गोत को हो, अन वीं गोत मेंऊँ कणी भी मनक वेदी की कदी सेवा-चाकरी ने किदी। 14काँके यो तो पाको हे के, आपणाँ परबू यहूदा गोत का हा। अन मूसे ईं गोत मेंऊँ कुई याजक वेई अणी बारा में कई ने क्यो हो।

ईसू मलिकिसिदक का जस्यान हे

15ज्यो कई आपाँ क्यो हे, वो भी पाको हे, मलिकिसिदक के जस्यो एक दूजो याजक परगट वेवे हे। 16वो मनकाँ का नेमा अन आग्या का आदार पे कोयने, पण नास ने वेबावाळा जीवन की तागत के आदार पे याजक बण्यो हे। 17#भज 110:4काँके वींका बारा में सास्तर में या गवई दिदी गी हे के, “थूँ मलिकिसिदक का रिती जस्यान हमेस्यान को याजक हे।” 18पुराणी आग्या ईं वाते रद वेगी ही, काँके वाँ कमजोर अन बेकार ही। 19काँके मूसा का नेमा किंने भी पूरो सिद ने किदो, पण एक बड़िया आस की हेंद-पेचाण करई हे, जणीऊँ आपीं परमेसर का नके जा सका हाँ।

20ईंवातेइस परमेसर ईसू ने होगन खान मायाजक बणायो हो। जद्याँ के दूजाँ ने बना होगन खान मायाजक बणाया हा। 21#भज 110:4पण ईसू तद्याँ होगन का हाते याजक बण्या हा, जद्याँ परमेसर वणीऊँ क्यो हो,

“परबू होगन खादा हे,

‘थूँ हमेस्यान याजक बण्यो रेई।’

अन वो अणीऊँ आपणो मन कदी ने बदली।”

22ईं होगनऊँ ईसू एक ओरी हव करार की गारन्टी देबावाळा बणग्या हे।

23अस्या तो नरई याजक बण्या हा, जणा ने मोत आपणाँ पद पे ने बण्या तका रेवा दिदा। 24पण ईसू हमेस्यान हे, ईं वाते वाँको याजकपणो भी हमेस्यान हमेस्यान बण्यो तको रेई। 25अन ज्यो वणीऊँ परमेसर हुदी जावे हे, वीं वाँने पूरो छुटकारो देवा का वाते ताकड़े हे, काँके वो वाँका वाते अरज करबा का वाते हमेस्यान जीवे हे।

26अस्या मायाजकइस आपणी जरूत ने पुरी कर सके हे, जी पुवितर हे, बना दोस का वेवे, सुद वे, पापी मनकाँऊँ अलग हे, हरगऊँ भी ऊँचे उटायाग्या वेवे। 27ज्याँका वाते दूजाँ मोटा याजकाँ के जस्यान यो जरूरी ने हे के, वीं रोज पेल्याँ आपणाँ पापाँ का वाते अन पछे लोगाँ का पापाँ का वाते बली चड़ावे। वणी तो हमेस्या हमेस्या का वाते मनकाँ का पापाँ का वाते आपणाँ खुद ने बली कर दिदो। 28काँके मूसा का नेम तो कमजोर मनकाँ ने मायाजक बणावे हे, पण वीं होगन जीं मूसा का नेमा के केड़े खादा ग्या हा, वणा बेटा ने मायाजक बणायो, ज्यो हमेस्या हमेस्या का वाते सिद बणग्यो।

Currently Selected:

इब्रानियों 7: एम टी आर

Highlight

Copy