इब्रानियों 4

1ईं वाते जद्याँ वींके रईम्बावाळी जगाँ में आबा को वादो अबाणू तईं हे, तो आपाँने ध्यानऊँ रेणो छावे, अस्यान ने वे के, थाँकामूँ कुई भी वणीऊँ चूक जावे। 2काँके आपाँने वाँके जस्यानीस हव हमच्यार हुणायो ग्यो हे, पण हुण्या तका बचनऊँ वाँने कई नफो ने व्यो, काँके वीं हूणबावाळा वींने विस्वास के हाते ने हुण्यो हो। 3#भज 95:11अबे देको, आपीं ज्यो विस्वासी हा, वीं रईम्बावाळी जगाँ में जा सक्या हा। जस्यान के परमेसर भी क्यो हो,

“में गुस्सा में अणीऊँइस होगन खान क्यो हो के,

‘वीं कदी भी मारी रईम्बावाळी जगाँ में ने जा सकी।’”

जद्याँ के, दनियाँ की रचना के टेमऊँइस वींको काम पूरो वेग्यो हो। 4#उत्प 2:2काँके हातवे दन का बारा में वणी सास्तर में कटे यो क्यो हो के, “परमेसर हातवे दन आपणाँ हाराई काम ने पूरो करन रईम्बो लिदो।” 5#भज 95:11अन वटे वणी पाछो यो क्यो हे के, “वीं कदी भी मारी रईम्बावाळी जगाँ में ने जा सकी।” 6ज्याँने पेल्याँ हव-हमच्यार हुणायो ग्यो हो, वीं आग्याने ने मानन रईम्बावाळी जगामें ने जा सक्या हा, ईं वाते अबाणू भी थोड़ाक मनकाँ का वाते रईम्बावाळी जगाँ को कमाड़ खुल्यो तको हे। 7#भज 95:7,8ईं वाते परमेसर पछे एक खास दन ने ठेरान अन वींको नाम दिदो, “आज” थोड़ाक वरा केड़े दाऊदऊँ परमेसर वीं दन का बारा में सास्तर में बतायो हे, जिंका बारा में पेल्याँ क्यो हो के,

“यद्याँ थाँ आज परमेसर की अवाज हुणो,

तो आपणाँ मन ने गाटो मती करज्यो।”

8 # वे.वि 31:7; यहो 22:4 अन यद्याँ यहोसु वाँने रईम्बावाळी जगाँ में लातो, तो वींका केड़े परमेसर ने कस्या दूजाँ दन का बारा में केवा की जरुतई ने वेती। 9ईं वाते जाण लो, परमेसर का मनकाँ का वाते एक अस्यो रईम्बो वाट नाळरियो हे, जस्यो हातवे दन परमेसर रईम्बो लिदो हो। 10#उत्प 2:2काँके ज्यो भी परमेसर का रईम्बा में आयो हे, वणी आपणाँ करमाऊँ रईम्बो पायो हे। जस्यान परमेसर आपणाँ कामाँ ने पूरा करन रईम्बो लिदो हो। 11ईं वाते आवो, आपाँ भी रईम्बावाळी जगाँ में जाबा का वाते कोसीस करा, कटे अस्यान वे के, कुई मनक वाँके जस्यान आग्याने ने मानन वीं रईम्बावाळी जगाऊँ चूक जावे।

12परमेसर का बचन तो जीवता अन काम करबावाळा हे, वीं कस्यी तीकी तरवारऊँ भी तिका हे। अन परमेसर को बचन पराण, आत्मा, हन्ट अन गुदा ने अलग करन आर-पार वेवे हे अन मन की मनसा अन बच्यार ने जाँचे हे। 13दनियाँ की कस्यी भी चीज परमेसरऊँ हपी तकी ने हे, वाँकी आक्याँ का हामे हारी चिजाँ खुली अन बना परदा की हे। वाँका हामे आपाँने आपणो लेको देणो हे।

मायाजक ईसू

14ईं वाते परमेसर को बेटो ईसू एक अस्यो मोटो मायाजक हे, जीं हरग में ग्यो, तो ज्याँ बात आपीं मानाँ हा, वींमें आपाँने मजबूत रेणो छावे। 15काँके आपणाँ नके ज्यो मायाजक हे, वो अस्यो ने हे ज्यो आपणी कमजोरी ने मेसूस ने कर सके। वो हारी बाताँ में आपणे जस्यान परक्यो ग्यो अन बना पाप को निकळ्यो। 16ईं वाते आवो, आपीं हिम्मत का हाते परमेसर की दया की गादी का आड़ी चाला, ताँके आपाँ पे दया वे अन करपा पावा, ज्या जरूत की टेम में आपणी मदत करे।

Currently Selected:

इब्रानियों 4: एम टी आर

Highlight

Copy