1 तिमुतियूस 5

विस्वास्याँ का वाते जिमेदारी

1दाना मनकाँ ने कदी तापड़ज्ये मती, पण वाँकाऊँ आदर-मान का हाते बोलज्ये, जस्यान खुद का बापूऊँ बोले हे। मोट्यार ने खुद का भई का जस्यान हमजज्ये। 2दानी लुगायाँ ने बई के जस्यान अन मोट्यार लुगायाँ ने पुरी खरई का हाते बेन हमजन हमजाज्ये।

3वणा विदवा लुगायाँ को मान करज्ये, जणाकी देक-रेक करबावाळो हाँची में कुई ने हे। 4पण यद्याँ कणी विदवा का छोरा-छोरी कन पोता-पोती वेवे तो, वाँने हाराऊँ पेली छावे के, वीं आपणाँ घराणा का हाते भगती-भाव को वेवार राके, अन आपणाँ बई-बापू, दादा-दादी की सेवा करन आपणो हक पूरो करे, काँके अस्यान करबाऊँ परमेसर राजी वेवे हे। 5वाँ ज्यो हाँची में विदवा लुगई हे, जिंका नके वींकी देक-रेक करबावाळो कुई ने हे, अन ज्या परमेसर पे आस राके हे अन रात-दन अरज करन वींकी मदत माँगे हे। 6पण ज्या विदवा लुगई मोज-मस्ती में पड़गी, वाँ जीवती तकी भी मरगी तकी हे। 7हाराई विस्वास्याँ ने ईं बाताँ बता, जणीऊँ वाँका पे कुई कळंक ने लागे। 8पण यद्याँ कुई आपणाँ हगा-होई की, अन खास तरियाऊँ आपणाँ परवारवाळा की देक-रेक ने करे, तो वो आपणाँ विस्वासऊँ फरग्यो हे अन वो एक बना विस्वासवाळाऊँ हेलो बुरो वेग्यो हे।

9बेस वणी विदवा लुगई को नामइस सेवा करबा की पोती में लिकज्यो, ज्या हाठ वराऊँ कम ने वेवे, अन वणी एक दाणइस ब्याव किदो तको वेवे। 10अन जिंको हव काम करबा में नाम मान्यो तको वे, अन ज्या आपणाँ बाळकाँ ने हव तरिया पालण किदो वे, जणी अणजाण की भी सेवा किदी वे, परमेसर का लोगाँ की आपणाँ घर में आवभगत किदी वे, दकी मनकाँ की मदत किदी वे, अन जणी खुद हाराई भला काम करबा में आपणो मन लगायो वे।

11पण मोट्यार विदवा लुगायाँ को नाम सेवा करबा की पोती में मती लिकज्ये, काँके जद्याँ वीं आपणी देह की मरजी का वाते ब्याव करणी छावे, तो वीं मसी का गेलाऊँ भटक जावे हे। 12अन वाँ परमेसर का हाते किदा तका आपणाँ पेल्याँ का वादाऊँ पलटन पापी बण जावे हे। 13अन वाँ घर-घर फरन आपणो टेम बगाड़णो हिक जावे हे, अन अणीऊँ भी हेलो वाँ फोकट की बाताँ करणी अन दूजाँ का काम में टाँग अड़ाणी हिक जावे हे। जणा बाताँ का बारा में बात ने करणी छावे, वाँका बारा में बाताँ करे हे। 14ईं वाते मूँ छावूँ हूँ के, मोट्यार विदवा लुगई ब्याव करन बाळक जनमे, अन आपणाँ घर की देक-रेक करे, जणीऊँ वाँ आपणाँ दसमणा ने आपणाँ खिलाप बुरो केवाँ को मोको ने देवे। 15मूँ यो ईं वाते केरियो हूँ के, काँके थोड़ीक मोट्यार विदवा लुगायाँ पेल्याँऊँ विस्वासऊँ फरन सेतान की चाल में आन वींके पाच्छे चालबा लागगी हे।

16यद्याँ कणी विस्वासी लुगई का परवार में विदवा लुगई वे, तो वीं वींकी देक-रेक करे, ताँके मण्डली पे वींको बोज ने पड़े, जणीऊँ मण्डली वणा विदवा लुगायाँ की देक-रेक कर सके, ज्याको कुई ने हे।

17एक परदान का रूप में जतरा भी मोतबीर मनक हव काम करे हे, वीं दुणा आदर-मान के जस्यान हमज्या जावे, खास तरियाऊँ वीं ज्यो परच्यार अन हिकाबा में घणी मेनत करे हे। 18#वे.वि 25:4; मत्ती 10:10; लूका 10:7काँके पुवितर सास्तर में लिक्यो तको हे के, “थाँ किंकाई पेट पे लात मती देज्यो” अन “दानक्याँ ने आपणी दानकी पाबा को हक हे।” 19#वे.वि 17:6; 19:15कणी भी मोतबीर मनक के खिलाप दो कन वणीऊँ हेला गवा का बना वींपे लगाया ग्या दोस मती हूणज्यो। 20ज्यो पाप करे, वींने हाराई का हामे तापड़ जणीऊँ दूजाँ पाप करबाऊँ दरपे।

21मूँ थने परमेसर, मसी ईसू अन पुवितर हरग-दुत की मोजुदगी में केवूँ हूँ के, थूँ खुला मनऊँ अणा आदेस ने मानज्ये अन ज्यो कई भी थूँ करे, वींने बना पकसपात के करज्ये।

22लोगाँ का माता पे आसिरवाद देबा का वाते हात मेलन वाँने परमेसर की सेवा में देबा का वाते आगत मती करज्ये। दूजाँ का पाप में भेळो मती वेज्ये, खुद ने खरो बणान राकज्ये। 23पाणीइस मती पिया कर, पण पेट अन आकोदाण वेबावाळी मांदकी की वजेऊँ थोड़ो दारू भी पिया कर।

24थोड़ाक मनकाँ का पाप खुलातोरऊँ चोड़े वे जावे हे अन वाँका जस्यानीस वाँको न्याव भी वेई, पण किंका बुरा काम का पतो थोड़ाक टेम केड़े पड़े हे। 25अस्यानीस हव काम भी हामे आवे हे अन ईं छाने भी ने रे सकी।

Currently Selected:

1 तिमुतियूस 5: एम टी आर

Highlight

Copy