1 कुरिन्थियों 4

मसी का खन्दाया तका चेला

1माकाँ बारा में कणी मनक ने अस्यान होचणो छावे के, माँ मसी का दास हा। परमेसर के भेद की बाताँ का भण्डारी हा। 2अन पछे जीं ईं भेद की बाताँ का भण्डारी हे, वाँकी भी आ जिमेदारी हे के, वीं विस्वास जोगा रेवे। 3मने ईंकी थोड़ीक भी चन्ता ने हे के, थाँ मारो न्याव करो कन कुई पंचात करे। मूँ खुद भी आपणो न्याव ने करूँ हूँ। 4काँके मारो मन साप हे, पण अणीऊँ ओ पको ने वेवे हे के, मूँ हाँची में निरदोस हूँ। वीं परबू तो एकीस हे ज्यो मारो न्याव करे हे। 5ईं वाते जद्याँ तईं परबू ने आवे वणीऊँ पेल्याँ किंको भी न्याव मती करो। वीं तो अदंकार में हपी तकी बाताँ ने भी उजिता में दिकाई अन मना की बाताँ भी हामे लाई अन वणी दाण परमेसर का आड़ीऊँ हरेक की बड़ई वेई।

6हो विस्वासी भायाँ में ईं बाताँ ज्यो थाँने हिकई हे वीं आपणाँ खुद अन अपुलोस का ऊपरे लागू किदी हे, ताँके थाँ अणी कावत को अरत जाणन हिक सको के, “थाँ सास्तर में लिकी तकी बाताँ ने उलाँगो कोनी” अन एक मनक को पकस लेन कणी दूजाँ का विरोद करता तका मेपणाऊँ ने भर जावो। 7थाँने दूजाऊँ कणी खास बणाया हे? अन थाँका नके ज्यो कई हे वो कई थाँने परमेसर ने दिदो? तो अस्यान काँ मेपणो करे हे के, थाँ कदी कणीऊँ कई लिदोई कोयने?

8अस्यान लागरिया हो के, थाँ तो धापग्या हो अन थाँ रिप्यावाळा वेग्या हो! कई थाँ माँके बना राज किदो हे? पण भलो वेतो के, थाँ राज करता, तो माँ भी थाँका हाते राज करता। 9काँके मने अस्यान लागरियो हे के, परमेसर माँ खन्दाया तका ने मोत को दण्ड दिदो जा चुक्या मनकाँ का जस्यान हाराईऊँ अंत में राक्या हे, काँके आपाँ आकी दनियाँ अन हरग-दुताँ अन मनकाँ का वाते तमासो बणा हा। 10माँ मसी का वाते बेण्डा बणग्या हाँ, पण थाँ मसी में ग्यानवाळा हो, माँ कमजोर हाँ पण थाँ तागतवर हो। माँको मान गटायो जावे हे पण थाँको मान किदो जावे हे। 11ईं टेम तईं माँ तो भूका तरिया हा। फाटा तका गाबा पेरता हा। माकाँ हाते मार-कूट किदी जावे हे अन माँ बेघर हा। 12#थर 18:3माकाँ हाताऊँ काम करता तका माँ मेनत-मजदूरी करा हाँ। जद्याँ माँने कुई हराप देवे हे तो माँ वींने आसिरवाद देवाँ हाँ। अन जद्याँ माँने हतावे तो माँ वींने सेण करा हाँ। 13माँ गाळ्याँ हुणन भी नरमाईऊँ जवाब दा हाँ। माँ अणी दनियाँ का कचरोऊँ बड़न ने हाँ। माँ अबाणू भी अणी दनियाँ का मेल हमज्या जावा हाँ।

चेतावणी

14मूँ थाँने लाजा मरबा का वाते ईं बाताँ ने लिकरियो हूँ। पण आपणाँ लाड़ला छोरा-छोरी के, जस्यान थाँने चेतावणी देरियो हूँ। 15काँके यद्याँ मसी में थाँने हिकाबावाळा दस हजार भी वे, तद्याँ भी थाँका बापू नरई ने हे। काँके हव हमच्यार हुणाबाऊँ अन ईसू मसी में मूँ थाँको बापू बण्यो हूँ। 16#1 कुरि 11:1; फिलि 3:17ईं वाते मूँ थाँकाऊँ अरज करूँ हूँ के, मारा जस्यान चाल चालो। 17ईं वाते मूँ तिमुतियुस ने ज्यो परबू का गट-जोड़ में लाड़लो अन मारा विस्वास जोगो बेटो हे, वींने थाँका नके खन्दायो हे, वो थाँने ईसू मसी में मारा वेवार का बारा में बताई, जिंने में हरेक जगाँ अन हरेक मण्डळ्याँ में हिकऊँ हे।

18थाँकामूँ कुई मनक तो यो होचन मेपणो करिया हे के, जस्यान अबे मने थाँका नके आणोईस ने हे। 19पण परबू छाई तो मूँ थाँका नके फटाकऊँ आऊँ, अन पछे वणा मेपणो करिया हा वणा मनकाँ की बाताँ नेईस ने पण वाँकी तागत ने भी जाण लेऊँ। 20काँके परमेसर को राज खाली बाताँ में ने, पण परमेसर की तागत में हे। 21थाँ कई छावो हो के, कई मूँ थाँका नके कामड़ी लेन अऊँ कन परेम अन दया की आत्मा का हाते अऊँ।

Currently Selected:

1 कुरिन्थियों 4: एम टी आर

Highlight

Copy