1 कुरिन्थियों 3

मण्डळ्याँ में गुट-बन्दी की बात

1हो भायाँ, मूँ थाँकाऊँ वस्यान बात ने कर सक्यो जस्यान आत्मिक मनकाँऊँ करूँ हूँ, पण मने थाँकाऊँ वस्यान बात करणी पड़ी जस्यान सांसारिक मनक करे हे अन ज्यो अबाणू मसी में नवा विस्वासी हे। 2#इब्रा 5:12,13में थाँने दूद पायो, अन्न ने खुवायो, काँके थाँ वींने खाबा का वाते त्यार ने हो, पण अबाणू भी ने खा सको हो। 3काँके थाँ अबाणू तईं दनियाँ का मनकाँ का जस्यान हो, ईं वाते थाँकामें रिस्याँ बलणो अन कळेस मोजुद हे, तो कई थाँ दनियाँ का सांसारिक मनक ने हो अन थाँ सांसारिक मनकाँ के जस्यान वेवार करो हो? 4#1 कुरि 1:12जद्याँ थाँकामूँ कुई केवे हे के, “मूँ पोलुस को हूँ” अन दूजो केवे हे, “मूँ अपुलोस को हूँ।” तो कई थाँ दनियाँ के जस्यान वेवार ने करो हो?

5ओ बतावो अपुलोस कूण अन पोलुस कूण हे? बेस माँ तो परबू का सेवक हाँ, ज्याँके वजेऊँ थाँ विस्वास किदो हो। माकाँ मूँ हाराई बेस वोईस काम कर हे ज्यो परबू माने हूँप्यो हे। 6#थर 18:4–11; थर 18:24–28में बीज वायो अन अपुलोस वींने पाणी पायो, पण परमेसर वींने बड़ायो। 7ईं तरियाँ ने तो बोवावाळा मोटो हे अन ने वींने पाणी पाबावाळो मोटो हे, पण मोटा तो परमेसर हे जणा वींने बड़ायो।

8बोवावाळो अन पाणी पाबावाळो दुई एक जस्या हे, पण हरेक मनक आपणाँ मेनत के जस्यान दानकी पाई। 9काँके माँ परमेसर का वाते काम करबावाळा हाँ।

थाँ परमेसर का खेत हो अन परमेसर का मन्दर हो। 10परमेसर की वीं दया के जस्यान, ज्यो मने दिदी गी हे, में एक हूँस्यार कारीगर के जस्यान नीम नाकी, पण वींपे सणई करबावाळो तो कुई ओरी हे। पण हरेक मनक ने ध्यान राकणो हे के, वीं कस्यान काम कररिया हे। 11काँके ज्याँ नीम नाकी हे वाँ खुद ईसू मसी हे अन वींकी जगाँ पे दूजी नीम ने नाकी जा सके हे। 12अन यद्याँ कुई ईं नीम में होनो, चाँदी अन हिरा-मोती, टिण्डका, चारो अन खाँकळो काम लेन सणई करे हे। 13तो हाराई का काम का गुण हामे आ जाई, काँके अन्त की टेम यो वादीऊँ हामे आई अन वादी हाराई का काम की परक करी के, वणी कस्यान काम किदो। 14जिंको काम वादी में, नीम पे टक्यो तको रेई, वो ईनाम पाई। 15अन यद्याँ किंको काम बळ जाई तो वीं नकसाण उटाई, पण वो वादी की लपटाऊँ खुद बळतो बळतो बंच जाई।

16 # 1 कुरि 6:19; 2 कुरि 6:16 कई थाँ ने जाणो के, थाँ परमेसर का मन्दर हो अन परमेसर की आत्मा थाँकामें वास करे हे। 17यद्याँ कुई परमेसर का मन्दर ने नास करी तो परमेसर वींने नास करी, काँके परमेसर को मन्दर पुवितर हे अन वो मन्दर थाँ हो।

18थाँ आपणाँ खुद ने धोका मती दो। यद्याँ थाँकामूँ कुई ईं दनियाँ में आपणाँ खुद ने ग्यानवाळो हमजे तो वींने बना अकल को बणणो छावे के, वो ग्यानवाळा वे जावे। 19काँके ईं दनियाँ को ग्यान परमेसर का हामे बेण्डोपणो हे। जस्यान के सास्तर में लिक्यो हे के, “परमेसर ग्यानवाळा मनकाँ ने वाँका खुद का ग्यान में फसा देई।” 20#भज 94:11अन पछे, “परबू जाणे हे, ग्यानवाळा का हाराई बच्यार बेकार हे।” 21ईं वाते मनक खुद पे मेपणो ने करे, काँके हारोई थाँकोईस हे। 22पछे पलई पोलुस वे, अपुलोस वे कन केफा हो पलई दनियाँ वे, जीवन वे कन मोत, पलई ईं आज की बाताँ वे कन आबावाळा दन की वी, हारोई थाँकोईस हे। 23अन थाँ मसी का हो अन मसी परमेसर को हे।

Currently Selected:

1 कुरिन्थियों 3: एम टी आर

Highlight

Copy