1 कुरिन्थियों 11
11
1 #
1 कुरि 4:16; फिलि 3:17 थाँ मारे जस्यान चाल चालो जस्यान मूँ मसी की चाल चालूँ हूँ।
लुगायाँ के मातो ढाकबा को रिवाज
2मूँ थाँकी बड़ई करूँ हूँ काँके थाँ मने हारी चिजाँ में आद करो हो अन ज्या हिक में थाँने दिदी हे, वींको पालण करो हो। 3पण मूँ छावूँ हूँ के, थाँ ओ जाण लो के, लुगई को मातो वींको धणी हे, मनक को मातो मसी हे अन मसी को मातो परमेसर हे।
4अस्यो मनक ज्यो आपणो मातो ढाँकन परातना करे हे कन परमेसर का आड़ीऊँ बोले हे, वो मसी को मान गटावे हे। 5पण एक लुगई ज्या उगाड़े माते परातना करे कन परमेसर का आड़ीऊँ बोले हे, वाँ आपणाँ धणी को मान गटावे हे ज्यो वींको मातो हे, वाँ वणी लुगई के जस्यान हे जिंकी टाट कड़ई दिदी वे हे। 6यद्याँ कुई लुगई आपणाँ मातो ने ढाँके तो वा आपणाँ बाल कटई ले, पण यद्याँ लुगई के बाल काटबा की सरम की बात हे तो वींने मातो भी ढाकणो छावे।
7 #
उत्प 1:26,27 पण मनक का वाते आपणो मातो ढाकणो हव ने हे काँके वो परमेसर को रूप अन परमेसर की मेमा हे। पण एक लुगई आपणाँ धणी की मेमा ने बतावे हे। 8#उत्प 2:18–23मनक कणी लुगईऊँ ने पण पेली लुगई मनकऊँ बणी तकी हे। 9मनक लुगई का वाते ने रच्यो ग्यो पण लुगई मनक का वाते रच्यी गी हे। 10परमेसर मनक ने अदिकार दिदो हे अन वीं अदिकार ने दिकाबा का वाते, लुगई आपणो मातो ढाँके। वींने हरग-दुताँ का मस भी अस्यो करणो छावे।
11पछे भी परबू का गट-जोड़ में ने तो लुगई मनकऊँ अन ने मनक लुगईऊँ आजाद हे। 12काँके जस्यान लुगई मनकऊँ रची गी वस्यानीस अबे लुगईऊँ मनक पेदा वेवे हे, पण हारी चीज परमेसर का आड़ीऊँ आवे हे।
13थाँ खुद बच्यार करो, कई लुगई ने उगाड़े माते परमेसरऊँ परातना करणी हव हे? 14कई थाँ खुद ने जाणो हो के, यद्याँ कुई मनक आपणाँ बाल मोटा वेबा दे, तो आ वींका वाते हरम की बात हे। 15पण यद्याँ एक लुगई लम्बा बाल राके तो, वींका वाते हव हे, काँके बाल वींने ओढणी का वाते दिदा ग्या हे। 16पण यद्याँ कुई ईंको विरोद करणो छावे, तो मने केणो पड़ी के, आपणाँ अटे अन परमेसर की मण्डळ्याँ में अणी रिति-रिवाज ने छोड़न ओरी कई रीत ने हे।
परबू को आकरी जीमणो
17अबे आगलो आदेस देतो तको मूँ थाँकी बड़ई ने कररियो हूँ, काँके थाँ हाराई को भेळो वेणो नफो ने हे पण नकसाण हे। 18हाराऊँ पेल्याँ तो में ओ हुण्यो हो के, जद्याँ थाँ विस्वासी मनक मण्डली में भेळा वेवो, तो थाँकामें फुट पड़ जावे हे अन मूँ थोड़ो घणो ईंने हाँच भी मानूँ हूँ। 19काँके फुट तो थाँकामें वेई, अणीऊँ थाँका बंच में में ज्यो खरा मनक ठेराया ग्या हा, वीं हामे आ जाई।
20ईं वाते थाँ जद्याँ एक जगाँ भेळा वेवो हो तो परबू को जीमण जीम्बा का वाते भेळा ने वेवो हो। 21काँके जीम्बा की टेम थाँ एक-दूजाऊँ पेल्याँई जीम लेवो हो, अणीऊँ कुई तो भुको रे जावे अन कुई हेलो खा-पीन मस्त वे जावे हे। 22कई खाबा-पिबा का वाते थाँके घर ने हे? कन परमेसर की मण्डली ने बेकार हमजो हो अन जणा का नके ने हे वाँने लाजा मारो हो? मूँ थाँकाऊँ कई कूँ? कई अणी बातऊँ थाँकी बड़ई करूँ? मूँ हाँची में बड़ई ने करूँ।
परबू का जीमणा की विदी
23काँके ज्या हिक मूँ थाँने देरियो हूँ, वाँ मने परबू का आड़ीऊँ मली हे। परबू ईसू जीं रात ने धोकाऊँ पकड़वाया ग्या हा वीं रात वणा एक रोटी लिदी, 24अन धन्नेवाद देन वणा वींने तोड़ी अन क्यो, “ओ मारो डील हे, ज्यो थाँका वाते हे, मने आद करबा का वाते थाँ अस्यानीस करिया करज्यो।”
25 #
निर 24:8; यर 31:31–34;
निर 24:6–8
अन खाणो खाया केड़े अणीस तरियाँ वणा प्यालो लिदो अन क्यो, “यो प्यालो मारा लुई में एक नवो करार हे। जद्याँ भी थाँ ईंमेंऊँ पियो, तद्याँ मने आद करबा का वाते अस्यान करता रेज्यो।” 26काँके जद्याँ कदी भी थाँ या रोटी खावो अन अणी प्यालो मूँ पियो, तो जद्याँ तईं परबू पाच्छा ने आवे तद्याँ तईं परबू की मोत को परच्यार करता रेज्यो।
परबू का जीमणा में हव तरियाऊँ भेळो वेणो
27ईं वाते ज्यो कुई भी परबू की रोटी कन परबू का प्याला मूँ गलत तरियाऊँ खाई-पिई, वो परबू की देह अन वाँका लुई को गुनेगार मान्यो जावे हे। 28ईं वाते मनकाँ ने ओ करणो छावे के, वीं आपणाँ खुद ने परके अन तद्याँ वीं रोटी ने खावे अन वीं प्याला मूँ पिवे। 29काँके ज्यो कुई परबू की देह ने बना ओळक्या खावे-पीवे हे, वीं परमेसर का दण्ड ने नुतो देवे हे। 30अणीऊँ थाँकामूँ नरई कमजोर अन मान्दा हे अन कुई तो मर भी ग्या हे। 31यद्याँ आपीं आपणाँ खुद ने परक लेवा तो आपीं परमेसर का दण्ड ने ने पावाँ। 32पण परबू आपाँने सई राकबा का वाते दण्ड देवे हे, ताँके आपीं दनियाँ का हाते दोसी ने ठेराँ।
33ईं वाते हो मारा भायाँ, जद्याँ थाँ जीम्बा का वाते भेळा वो, तो एक-दूँजा की भी बाट नाळो। 34यद्याँ किंने हाँची में जोरऊँ भूक लागरी वे, तो वींने घरेइस खाणो खा लेणो छावे, ताँके थाँको वटे भेळो वेणो दण्ड को मस ने बणे अन दूजी बाताँ ने जद्याँ मूँ आऊँ तद्याँईस थाँने हमजाऊँ।
Currently Selected:
1 कुरिन्थियों 11: एम टी आर
Highlight
Share
Copy
Want to have your highlights saved across all your devices? Sign up or sign in
(c) 2010-2017, New Life Computer Institute. All rights reserved
