Romans 7

Sa Napuḵayan Taḵu Si Lintog

1Susunudḵu ḵan Kristu, igammuḵe maawatanyu da annae ibagaḵ te igammuyu mipanggob atte lintog. Igammuyu we sa lintog anna ḵaḻabbongana'tte tagu si matattaguwanae abus. 2Isun da an-asawa, nu angasawa bubai, adimpun ni lintog iyunude idangana asawana nu sissiyae matattagu. Yaḵon nu matoy asawana, mapuḵayan atte lintog ḵad maḵwa ḵasin angasawa nu piona. 3Pun nu sissiyae matattagu asawana ya niḵamboḻoy si sabali ye laḻaḵi, naḵabasuḻ atte dagdagas. Yaḵon nu matoy asawana, mapuḵayan atte sadi ye lintog ḵad nu ḵasin angasawa, daḵampun aḵ dagdagas.

4Ḵad isuna bos ḵan diḵayu susunudḵu ḵan Kristu, napuḵayan ḵayu si ḵaḻabbongan ni lintog mipagapu'tte natoyan Kristu we nidatun para ḵan ditaḵu woḵ nidoga ḵayu ḵan siya si nataguwana. Pun sinsana, nawaya taḵu we anserbi ḵan siya'ḵ madayawan Apudyus. 5Sa awe ye nangunudan taḵu'tta pion da long-ag taḵu, inigammu taḵu ḵad lintog amo amaamayon taḵu we angwa'ḵ basuḻ. Pun siya gapunae ḵoon taḵu da ambanag si matoyan taḵu ḵan misinaan taḵu ḵan Apudyus aḵ inggana. 6Yaḵon sinsana, gapu'tte nidog-an taḵu ḵan Kristu si natoyana, napuḵayan taḵu si lintog Moses we namabaḻud ḵan ditaḵu. Ḵad anserbi taḵu ḵan Apudyus ya daḵampun ogon aḵ sa dadaane lintog yaḵon sa baru we biyage naḻpu si Ispiritu Santu.

Sa Angipaḵaawatan Ni Lintog Atte Basuḻ

7Ngai ibaga taḵu nu? Maḵwa ḵad ain ibaga taḵu we lawweng lintog? Naid! Yaḵon nu naippun lintog, adipun maawatan basuḻ. Isun ni amaamay, adiḵpun oḵyan inigammu we lawweng nu adin ni lintog imbaga ḵanane, “Adim amaamayon ḵuḵuwan da udum.”#7:7 Exodus 20:17; Deuteronomy 5:21. 8Yaḵon gapu ta anna lintoge angipaigammu mipanggob si basuḻ, amo nitoḵwaḻ da losane kalasin di ḵamommode anna ḵan saḵon. Nu naippun oḵyan lintog, sa amaamaye bumasuḻ adipun madog-an. 9Sa naḻaḵpuse aḻgaw, nat-opaḵ si nantataguḵ te adiḵpun inigammu ustu we pion ni lintog ḵanan. Yaḵon naawataḵ ḵad piona ḵanan, naawataḵ ose gagangaye ḵabasbassuḻanaḵ ya isuḵ natoye nisina ḵan Apudyus. 10Sinsadi, sa lintoge nangikari ye angitod si biyag antaḻgodaḵe matataguwaḵ aḵ inggana, sadi amo gapun ni matoyaḵ ḵan misinaaḵ ḵan Apudyus aḵ inggana. 11Te sa basuḻ, ginundawayana lintog woḵ inallelawna saḵone nambanag si matoyaḵ. 12Pun sa lintog ḵabaḻuwan. Isuna da biline ustuustuda ḵan ḵabaḻuwanda te isunae maḻpuda ḵan Apudyus.

13Piona ḵad ain ḵanane sa ambaḻu we lintog siya gapun ni matoyaḵ? Naid! Te sa mismu we basuḻḵu gapun ni matoyaḵ. Mipagapu si ambaḻu we lintoge igammu taḵu we ḵoon taḵu we lawweng, basuḻ ḵad ambanag si ḵatoy. Ḵad mipagapu si bilin mipaila ummamdane basuḻ taḵu.

Sa Masaliduduwan Ni Somsomoḵ Taḵu

14Igammu taḵu we sa lintog naispirituwan. Yaḵon taguwaḵe abus, ninginae isun di musassun ni basuḻ. 15Adiḵpun maawatan da mismu we ḵooḵ te sa ambaḻu we pioḵ ḵoon, sadi adiḵpun ḵoon. Yaḵon sa sasangngaaḵ ḵoon, sadi da ḵooḵ. 16Sinsadi nu ḵooḵ da adiḵpun pion, umapyuwaḵe sa lintog ambaḻu. 17Pun daḵampun ogon aḵ saḵon angwa'ḵ lawweng yaḵon sa amaamayḵu we bumasuḻ siya gapun ni angwaaḵ si basuḻ. 18Te igammuḵe naippun ambaḻu'ḵ gagangaye ugalin di tagu we anna ḵan saḵon. Te taḵon ay nu pioḵe angwa'tta ambaḻu, adiyaḵpun maḵaḵwa. 19Te sa ambaḻu we pioḵ ḵoon siya adiḵpun ḵoon yaḵon sa adiḵpun pion ḵoon, amo siya ḵooḵ. 20Sinsadi nu ḵooḵ adiḵpun pion ḵoon, piona ḵanan daḵampun ḵan saḵon nangwa yaḵon sa basuḻe anna ḵan saḵon.

21Pun sa maawataḵ atte mataguwan taḵu nu pioḵe ḵoon ambaḻu, amo siya ḵooḵ lawweng. 22Te sa somsomoḵḵu, amod de ayatḵu si Lintog Apudyus. 23Yaḵon sa basuḻe angituray atte long-agḵu, siya bumusuḻ si somsomoḵḵu we anuttuwa si lintoge pinion Apudyus. Ḵad sa basuḻe nangituray ḵan saḵon, nambalinonaḵ aḵ baḻud. 24Ḵaddaguwaḵ! Ngai nin anaḻaḵnib ḵan saḵon atte annae long-age siya gapun ni matoyaḵ? 25Anggappiyaaḵ ḵan Apudyus te siya abus aḵ anagu ḵan saḵon mipagapu ḵan Jesu Kristu we Apu taḵu. Pun sa annae ḵasasaadḵu, sa somsomoḵḵu pioḵe anserbi'tte Lintog Apudyus yaḵon sa long-agḵu piona anserbi'tte lintog ni basuḻ.

Currently Selected:

Romans 7: kml

Highlight

Copy