Romans 6

Sa Natoyan Taḵu Atte Basuḻ Yaḵon Natagu Taḵu Ḵan Kristu

1Tuttuwae amod de ḵinabaḻun Apudyus ḵan ditaḵu. Pun ngai ḵanan taḵu nu? Pagapagatupan taḵu ḵad aine bumasuḻ ta amo madogdog-an ḵinabaḻun Apudyus ḵan ditaḵu? 2Adipun maḵwa! Te naabuse natoy taḵu mipanggob atte basuḻ, ngai inonae sissiya taḵu we bumasubasuḻ? 3Adiyupun ḵamman igammu we losan taḵu we nabonyagan ḵan Jesu Kristu nidoga taḵu bos atte natoyana?#6:3 1 Corinthians 12:13; Galatians 3:27. 4Pun sa nabonyagan taḵu, nidoga taḵu ḵan Jesu Kristu si natoyana ya nilibonana ta matagu taḵu'tte baru we antatagu we isun ni ummuliyan Jesu Kristu mipagapu'tte nakaskasdaawe ḵabooḻan Apudyus.

5Te nu nidoga taḵu ḵan Jesu Kristu atte natoyana, midoga taḵu bos ḵan siya si ummuliyana. 6Igammu taḵu we sa dadaane ḵinatatagu taḵu nidoga nipattoḻ atte kros ta madadail amaamay taḵu we angwa'ḵ basuḻ ḵad daḵantaḵupun ogon aḵ ammusassun ni basuḻ. 7Te nu natoy tagu, napuḵayan atte ḵabooḻan ni basuḻ. 8Gapu ta naḵaḵatoy taḵu ḵan Kristu, amati taḵu we midoga taḵu bos ḵan siya matagu'ḵ inggana. 9Igammu taḵu we gapu ta ummuli'ḵ Jesu Kristu, adipun ogon matoy te naippun ogon ḵabooḻan ni ḵatoy ḵan siya. 10Natoy ta madusa para'tta basuḻ taḵu. Namingsane abus natoy ḵad adipun paat miḵasiḵasin. Yaḵon sinsana natagu'ḵ inggana ta midayawan Apudyus. 11Pun ḵasapuḻane ibelang taḵu da long-ag taḵu'ḵ natoy si basuḻ ta ippun ogon ḵabooḻana ḵan ditaḵu. Yaḵon gapu'tte nidog-an taḵu ḵan Jesu Kristu, matagu taḵu'ḵ inggana ta midayaw aḵ Apudyus mipagapu'tte biyag taḵu.

12Pun adi taḵu iyunude sa basuḻ angituray ḵan ditaḵu ta adi taḵu ḵoon da pion da long-ag taḵu. 13Ḵad adi taḵu usaron ngaimane ḵamangay da long-ag taḵu we angwa'ḵ lawwenge isun ni dagus taḵu ḵingwa si daan taḵu amatiyan woḵ nibelang taḵu'ḵ nanattoye patilayun angwa'ḵ basuḻ. Yaḵon idatun taḵu da long-ag taḵu ḵan Apudyus we angwa'tta maun-unane panggobna te sinsadi innatod Apudyus ḵan ditaḵu baru we biyage anserbi ḵan siya. 14Te daḵampun ogon aḵ sa basuḻ angituray ḵan ditaḵu te sinsadi, sa mibatayan ni mataguwan taḵu daḵampun si anuttuwaan taḵu'tte lintog yaḵon sa ḵinabaḻun Apudyus.

Sa Simmusassu Ḵan Ditaḵu

15Ngai ḵad ain pion ni sana ḵanan? Nu matagu taḵu gapu'tte ḵinabaḻun Apudyus we daḵampun si anuttuwaan taḵu'tte lintog, pagatupan taḵu ḵad aine bumasuḻ? Adipun maḵwa! 16Adiyupun ḵamman igammu we nu ngai angittanyu'tta long-agyu ya tuttuwaonyu, siya simmusassu ḵan diḵayu? Nu sa basuḻ angittanyu'tta long-agyu, ambanag atte matoyanyu. Yaḵon nu ittonyu da long-agyu'ḵ tumuttuwa ḵan Apudyus, siya simmusassu ḵan diḵayu ya siya angwa si maun-unanyu. 17Yaḵon anggappiyaaḵ ḵan Apudyus te taḵon ay nu musassun ni basuḻ diḵayu'tte awe, sinsana tuttuwae insisimoḵyu tuttuwaon ḵatuttuwaane nituttudu ḵan diḵayu. 18Napuḵayan ḵayu'tte basuḻ ḵad nambalin ḵayu'ḵ musassun ni maun-unan. 19An-ugudaḵ atte allasu we maawatan da tagu we daampun aḵ maangsan. Sa awe, iyyunudyu da long-agyu'ḵ nammusassu'tta angwaanyu'tta ngaimane lawweng ḵan maḵabasuḻanyu'ḵ amod. Pun sinsana, iyunudyu da long-agyu'ḵ ammusassu we angwa'tta naun-unan ta mitotoḵḵon ḵayu'ḵ taguna ta bumaḻu ugaliyu.

20Sa awe ye musassun diḵayu'tte basuḻ, adipun ḵasapuḻane ḵoonyu da naun-unan. 21Yaḵon ngai ginanabyu we dam-on nangwa'tta ḵassadi ye siya mabainanyu sinsana? Sa ambanagan da ḵassadi ye ḵoḵoḵḵon, matoyan ḵan misinaan ḵan Apudyus aḵ inggana! 22Yaḵon sinsana napuḵayan ḵayu'tte basuḻ ya nambalin ḵayu'ḵ musassun Apudyus. Ḵad sa ginanabyu, mitotoḵḵon ḵayu'ḵ taguna ta bumaḻu ugaliyu ḵad sa ambanagana awad ḵan diḵayu biyag aḵ inggana. 23Te sa bayad ni basuḻ siya ḵatoy. Yaḵon sa libli ye atod Apudyus siya biyag aḵ inggana mipagapu si niyossaanan taḵu ḵan Jesu Kristu we Apu taḵu.

Currently Selected:

Romans 6: kml

Highlight

Copy