أيث-روما 8
8
جّْهذ ن اَرُّوْح ن أَربِّـي يخدّْمن ذِي ثُوْذَارْث ن ڒْمُوْمِنِين
1إِذن فَا ڒخُّو، وَار يدْجِي بُو لْحِسَاب ذ لْعِقَاب خ يِنِّي يدْجَان ذ يجَّن اَك عِيْسَى لْمَسِيح. 2لِأَنَّا ذِي عِيْسَى لْمَسِيح، طَّبِيعَا ن اَرُّوْح إِݣ يتِيشّن ثُوذَارْث ثْفكّ-يشك-د زِي طَّبِيعَا ن ڒْمُعْصِيّث ذ ڒْموْث. 3شُوْف، أَربِّـي يݣَّا مِين وَار ثْزمَّر اَذ تݣّ شَّرِيعَا ن مُوْسَى، مَايمِّي؟ عْلَاحْسَاب ضُّعف ن دَّات نّغ إِي ذَاس يكّْسن جّْهذ إِ شَّرِيعَا. أَربِّـي، وَامِي إِي د يسّكّ مِّيس يمثّل-يث-يذ اَم دَّات ن بْنَاذم يعْصَان، ئِسّكّ-يث-يذ ذ لْفِدْيَا خ ڒْمُعْصِيّث نّغ. أَمُّو يحَاسب يعَاقب ڒْمُعْصِيّث إِݣ يدْجَان ذِي دَّات ن بْنَاذم 4بَاش اَذ يتْوَاكمّڒ مِين ثْخس زَّاينغ شَّرِيعَا ن مُوْسَى. نشِّين، يعْنِي ذ يِنِّي إِݣ يݣُّوْرن ذݣ وبْرِيذ ن اَرُّوْح، وَار نْتݣّ اَرَّاي إِ نّفْس نّغ.
5شُوْف، يِنِّي يتْعِيشن عْلَاحْسَاب طَّبِيعَا ثَعفَّانْت نْسن خدّْمن س ڒْخَاضَر نْسن ذِي ثْمسْڒَايِين ن طَّبِيعَا ثَعفَّانْت نْسن. وَلَكِن يِنِّي يتْعِيشن عْلَاحْسَاب اَبْرِيذ ن اَرُّوْح خدّْمن س ڒْخَاضَر نْسن ذِي ثْمسْڒَايِين ن اَرُّوْح. 6أَقَا يِنِّي يخدّْمن س ڒْخَاضَر نْسن ذِي ثْمسْڒَايِين ن طَّبِيعَا ثَعفَّانْت نْسن اَتَاف اَذ مّْثن. وَلَكِن يِنِّي يخدّْمن س ڒْخَاضَر نْسن ذِي ثْمسْڒَايِين ن اَرُّوْح اَتَاف اَذ دَّرن، أَغَارْسن يِيڒِي ڒهْنَا. 7أَقَا ڒْخَاضَر يخدّْمن ذِي ثْمسْڒَايِين ن طَّبِيعَا ثَعفَّانْت ن بْنَاذم يتْعَرَّاض أَربِّـي. وَار يتْطِيعِي شَا شَّرِيعَا ن أَربِّـي، أُو ذ صَّح وَار يزمَّر شَا. 8أُو يِنِّي يتْطَاعَان إِ طَّبِيعَا ثَعفَّانْت نْسن وَار زمَّرن شَا اَذ سَارْضَان أَربِّـي.
9أَمَّا كنِّيو، مڒَا يزدّغ ذَايْوم اَرُّوْح ن أَربِّـي، أَتَاف اَذ تْعِيشم خ وبْرِيذ ن اَرُّوْح اَتَاف وَار تݣّم اَرَّاي إِ طَّبِيعَا ثَعفَّانْت نْوم. أُو ونِّي وَار غَار يدْجِي اَرُّوْح ن لْمَسِيح، وَار يدْجِي شَا زِي لْمَسِيح. 10ثُمَّا لْمَسِيح مڒَا اَقَاث ذَايْوم، دَّات نْوم وَاخَّا ثمُّوْث س سَّبَاب ن ڒْمُعْصِيّث، أَرُّوْح نْوم يدَّر س سَّبَاب ن صُّلْح. 11ثُمَّا مڒَا يزدّغ ذَايْوم اَرُّوْح ن أَربِّـي إِي د يسكَّرن عِيْسَى زِي ڒْموْث، أَتَاف ونِّي إِي د يسكَّرن عِيْسَى زِي ڒْموْث اَذَايْوم د يَارّ ثُوْذَارْث ؤُڒَا ذِي دَّات نْوم يفنَّان يعْنِي س اَرُّوْح نّس إِي ذَايْوم يزدّْغن.
12خ مَانَاينِّي آي اَيثْمَا، ئِتْخصَّا-يَانغ أَ نݣّ لْوَاجِب، وَلَكِن مَاشِي حمَا أَ نݣّ اَرَّاي إِ طَّبِيعَا ثَعفَّانْت نّغ. 13لِأَنَّا كنِّيو مڒَا تݣّم اَرَّاي إِ طَّبِيعَا ثَعفَّانْت نْوم، أَذ تمّْثم. مڒَا ثْنقّم ڒفْعَاير ن دَّات نْوم س اَرُّوْح ن أَربِّـي، أَذ تدَّرم. 14أُو يِنِّي يذفَّارن اَرُّوْح ن أَربِّـي، ذ يِنِّي إِي يدْجَان ذ ثَارْوَا ن أَربِّـي. 15لِأَنَّا اَرُّوْح إِي ذَاوم د يمُّوْشن وَار كنِّيو يتَارِّي شَا ذ يسمْغَان حمَا اَذ تْعِيشم عَاوذ ذِي ثِيݣّْوْذِي؛ لَّا، ئِمُّوْش-اَوم-د اَرُّوْح يقدّْسن حمَا اَذ تِيڒِيم ذ ثَارْوَا ن أَربِّـي. س اَرُّوْح نِّي إِي غَا نْڒَغَا: أَبَّا، يعْنِي، أَ بَابَا ينُو. 16يعْنِي اَرُّوْح ن أَربِّـي س يِيخف نّس إِݣ يصَّاحن ذِي اَرُّوْح نّغ بلِّي نشِّين ذ ثَارْوَا ن أَربِّـي. 17أُو نشِّين مڒَا اَقَانغ ذ ثَارْوَا ن أَربِّـي، أَتَاف أَ نْوَارث. يعْنِي أَ نْوَارث زِي أَربِّـي، أَ نْوَارث اَك لْمَسِيح. وَلَكِن يخصَّا-يَانغ أَ نْشَرش اَكِذس ذݣ وعدّب نّس حمَا أَ نْشَرش اَكِذس عَاوذ ذِي لْعَظَمَا نّس.
لْعَظَمَا إِي ذَانغ يتْرَاجَان
18شُوْف، نش تْوَاڒِيغ اَعدّب-أَ إِي خَانغ يتكّن ذِي دُّنشْت-أَ نتَّا وَار يدْجِي ذ وَالُو بَاش اَذ يمثّل اَك لْعَظَمَا إِي ذَانغ د غَا يمظْهَارن. 19أَقَا مَارَّا مِين د يتْوَاخڒْقن ذَايْسن مزْڒِي#8.19 مزْڒِي قَّارن-ث إِ يمزْڒِي. ذ اَمقّْرَان تْرَاجَان اَذ ࢲرن ثْسَعَّات نِّي إِي ذِي د غَا بَانن ثَارْوَا ن أَربِّـي. 20لِأَنَّا مَارَّا مِين د يتْوَاخڒْقن نْصَابن س لْفَشَل. وَلَكِن مَاشِي س اَرَّاي نْسن، س اَرَّاي ن ونِّي إِي ثن يصَابن. أُو مَانَاينِّي ذِي لْأَمَال. 21لْأَمَال، يعْنِي، بلِّي مَارَّا مِين د يتْوَاخڒْقن اَذ تْوَافكّن زِي لْفَنَا ن ڒْموْث، أَذ شَرْشن ذِي لْحُرِّيَا ن لْعَظَمَا إِي غَارْسن غَار ثَارْوَا ن أَربِّـي.
22شُوْف، نشِّين نسّن بلِّي مَارَّا مِين د يتْوَاخڒْقن اَقَاثن اَڒ نْهَارَا عَاذ تْنزْبَارن اَمشْنَاو ثَمْغَارْث نِّي إِي ذِي يدْجَا ڒحْرِيق ن ثَارْوَا. 23أُو مَاشِي نِثْنِي وَاهَا، ؤُڒَا ذ نشِّين ؤُمِي يمُّوْش اَرُّوْح يقدّْسن ذ اَمزْوَارُو نْنهّك ذݣ يِيخف نّغ. ذَايْنغ مزْڒِي، نشِّين نتْرَاجَا زِي أَربِّـي اَذ د يسْبيّن بلِّي نشِّين ذ ثَارْوَا نّس، يعْنِي اَذ يفكّ دَّات نّغ. 24أَقَا ذِي مزْڒِي-يَا نشِّين ننْجم. شُوْف، مڒَا صَافِي نُوْفَا مزْڒِي نِّي إِي نْرزُّو، أَتَاف صَافِي وَار ذَايْنغ يتِيڒِي بُو مزْڒِي عَاذ. مَا أَ نْرَاجَا عَاذ مزْڒِي نِّي مڒَا صَافِي نُوْفِي-ث؟ 25لَّا، وَلَكِن مڒَا عَاذ وَار ث نُوْفِي شَا اَتَاف اَث نْرَاجَا س صّْبَر.
26فَا اَمُّو اَرُّوْح يقدّْسن يتْعَاوَان-اَنغ ذِي ضُّعف نّغ. نشِّين وَار نسِّين شَا مْلِيح مِينْخف غَا نࢲَّادْج، وَلَكِن اَرُّوْح يقدّْسن س يِيخف نّس يتْطَلَاب-اَس إِ أَربِّـي خ سَّبَاب نّغ س ونْهَاك وَار يتْسمِيعن. 27ثُمَّا أَربِّـي نتَّا يتْوَاڒَان مِين يدْجَان ذݣ وُوْڒَاون ن بْنَاذم، ئِسّن مِين يتخْس اَرُّوْح يقدّْسن. لِأَنَّا اَرُّوْح عْلَاحْسَاب ڒْخَاضَر ن أَربِّـي يتْطَلَاب خ ڒْمُوْمِنِين صَّالِحِين.
28فَا نشِّين نسّن بلِّي مَارَّا مِين يتوْقِيعن قَاع يتَارَّا-ث أَربِّـي ذ تِّيسِير إِ يِنِّي إِي ث يتخْسن، يعْنِي ذ يِنِّي ؤُمِي إِي د يڒَغَا عْلَاحْسَاب لْغَرَض نّس. 29لِأَنَّا يِنِّي إِي تُوْغَا يسّن-يثن زِي قْبڒ، ئِزمّم-يثن زِي قْبڒ حمَا اَذ يڒِين خ صِّيفث ن مِّيس اَذ يڒِين اَم نتَّا. أَمُّو اَذ يِيڒِي نتَّا ذ مِّيس اَمنْزُو#8.29 أَمنْزُو نتَّا ذ يفْخدِّي. قَّارن-ث إِ وحنْجِير إِي د غَا يخڒْقن ذ اَمزْوَارُو. ن وَاطَّاس ن أَيثْمَاس. 30ثُمَّا يِنِّي إِي تُوْغَا يزمّم زِي قْبڒ، ئِڒَاغَا-د خَاسن. ثُمَّا يِنِّي ؤُمِي د يڒَاغَا، ئِسمْصْڒَاح-يثن اَكِذس. ثُمَّا يِنِّي يسمْصْڒَاح اَكِذس، يُوْشَا-اَسن اَمْشَان ذِي لْعَظَمَا نّس.
ڒمْحِبّث ن أَربِّـي ذِي لْمَسِيح
31إِيوَا، مِين غَا نِينِي منْبَعْد إِ مَارَّا مَانَايَا؟ مڒَا أَربِّـي اَقَاث اَكِذْنغ، ؤُو يزمَّرن اَذ يِيڒِي ضد نّغ؟ 32سِيذِي أَربِّـي وَار يسْعِيزّ شَا مِّيس خَانغ، ئِقدّم-يث إِ ڒْموْث خَانغ مَارَّا. مَا اَذ تقِّيم شَان ڒْحَاجث وَار ذَانغ-ت يتِيشّ شَا اَكِذس؟ 33وِي يزمَّرن اَذ يتَاهم يِنِّي إِي يخْضَر أَربِّـي؟ ؤُڒَا ذ يجّن! أَربِّـي س يِيخف نّس نتَّا إِݣ يسمْصْڒَاحن اَكِذس يوْذَان. 34وِي يزمَّرن اَخَاسن يحْكم؟ ؤُڒَا ذ يجّن! لِأَنَّا نتَّا عِيْسَى لْمَسِيح إِݣ يمُّوْثن. أُو كْتَار، يكَّر-د زِي ڒْموْث أُو ذ نتَّا إِي يدْجَان خ وفُوْسِي ن أَربِّـي، ئِتْشَافَاعن ذَايْنغ. 35وِي ذَانغ غَا يعزْڒن زِي ڒمْحِبّث ن لْمَسِيح؟ ؤُڒَا ذ يجّن! ڒَا ذ اَزيَّار، ڒَا ذ تَمَارَا، ڒَا ذ اَعدّب، ڒَا ذ بُوْهيُّوْف، ڒَا ذ ثُوْعَرْيَانْت، ڒَا ذ لْخَطَر، ؤُڒَا ذ سِّيف. 36مَامّش يقَّار لْكِتَاب:
<نشِّين خ سَّبَاب نّش شك نتْوَاجَاه ڒْموْث نْهَار يكْمَاڒ.
نشِّين نتْوَاحْسَاب اَمشْنَاو يحُوْڒِيْين ؤُمِي غَا غَرْصن.>
37وَلَكِن ذِي مَارَّا مَانَايَا نشِّين نتْوَاحْسَاب كْتَار زِي لْأَبْطَال خ وفُوْس ن ونِّي إِي ذَانغ يخْسن. 38-39أَقَا نش متْأَكّد بلِّي ؤُڒَا ذ يجّن ن ثْمسْڒَايْث زِي مِين د يتْوَاخڒْقن وَار ثْزمَّر اَذَانغ ثعْزڒ زِي ڒمْحِبّث ن أَربِّـي إِي د يمظْهَارن ذِي سِيذِيثْنغ عِيْسَى لْمَسِيح: ڒَا ذ ڒْموْث، ڒَا ذ ثُوْذَارْث، ڒَا ذ لمَلَائِكَاث، ڒَا ذ شَّيَاطِن، ڒَا ذ جْنُوْن، ڒَا ذ مِين يدْجَان ڒخُّو، ڒَا ذ مِين د غَا يَاسن، ڒَا ذ مِين يُوْعْڒَان، ڒَا ذ مِين يُوْدْجْغن، ؤُڒَا ذ شَا ن ڒْحَاجث نّغْنِي.
Currently Selected:
أيث-روما 8: ريف
Highlight
Share
Copy
Want to have your highlights saved across all your devices? Sign up or sign in
