أيث-ݣلاطيا 5
5
1غَار لْحُرِّيَا يضْڒق-اَنغ-د لْمَسِيح بَاش أَ نِيڒِي حُرّ ذ صَّح. بدّث نِيشَان بَعْدَا، وَار تجَّاث شَا اَخَاوم يبسّڒ عَاوذ يجّن ن دْقڒ ن ثْزَايْڒُوْت ن يسمْغَان.#5.1 يعْنِي ذَانِيتَا اَرَّسُوْل بُوْلُس يتْشَابَّاه ثْزَايْڒُوْت ن يسمْغَان ذِي شَّرِيعَا ن سِيذْنَا مُوْسَى، ثْبسّڒ خ أَيث-إِسْرَائِيل اَم يِجّن ن دْقڒ يقْسح.
لْحُرِّيَا ن صَّح ذِي لْمَسِيح
2صنّْطث! نش ذ بُوْلُس قَّارغ-اَوم مڒَا ثݣِّيم طَّهَارث ن مُوْسَى، أَتَاف لْمَسِيح وَار كنِّيو ينفّع س وَالُو. 3أَذَاوم عَاوْذغ، أَذ ينِيغ إِ كُڒ اَرْيَاز ونِّي إِي غَا يݣّن طَّهَارث ن مُوْسَى، ئِتْخصَّا لَابُد اَذ يطَاع إِ شَّرِيعَا ن مُوْسَى اَمن-ثكْمَاڒ. 4كنِّيو إِي يرزُّوْن صُّلْح س شَّرِيعَا نِّي اَك أَربِّـي، أَقَا ثتْوَاحَرّْمم زِي لْمَسِيح ثْبعّْذم خ اَرْضَا نّس. 5قَا نشِّين لَّا، نتْرَاجَا أَربِّـي اَذَانغ يسمْصْڒَاح اَكِذس س لْإِيمَان، أُو لْأَمَال-أَ نّغ نتَّا س جّْهذ ن أَرُّوْح يقدّْسن. 6لِأَنَّا ذِي عِيْسَى لْمَسِيح يعْنِي بْنَاذم مڒَا يݣَّا طَّهَارث نِغ وَار ت يݣِّي شَا، مَانَايَا وَار ينفّع س وَالُو. مِين ينفّْعن؟ ئِنفّع لْإِيمَان إِݣ يخدّْمن شّْغڒ نّس س ڒمْحِبّث.
7تُوْغَا كنِّيو ثدْجَام ذݣ يِجّن ن وبْرِيذ غَار زَّاث مْلِيح. وِي كنِّيو يسْبدّن بَاش وَار تݣّم شَا اَرَّاي إِ لْحَقِيقَا؟ 8أَرَّاي-أَ إِي تݣّم كنِّيو زَعْمَا مَاشِي زِي أَربِّـي إِي ذَاوم د يتْڒَاغَان. 9غِير ذْرُوْس ن ؤُنْتُوْن#5.9 أَنْتُوْن نتَّا ذ اَمْثُوْن. يسْݣَعَّاذ-د مَارَّا ڒْعَاجْنث ن ؤُرشْثِي.#5.9 أَرشْثِي يعْنِي نتَّا ذ اَرِيْثِي. 10نش غَارِي تِّقث ذِي أَربِّـي وَار ثْقبّْڒم بُو شَان ن اَرَّاي نّغْنِي. وَلَكِن ونِّي إِي كنِّيو يسْخرْوَاضن، مِين مَا يعْنَى نتَّا اَث يحَاسب س لْعِقَاب نّس. 11آي أَيثْمَا، نش مَعْلِيك عَاذ سڒْمَاذغ طَّهَارث ن مُوْسَى زَعْمَا، إِيوَا مَايمِّي عَاذ ذَايِي تْعدَّابن نِثْنِي؟ مَعْلِيك لَابُد طَّهَارث-أَ، أَتَاف صَافِي وَار يتِيڒِي بُو وحݣَّار ن صَّلِيب. 12أُو يِنِّي إِي كنِّيو يهدْجْشن خ طَّهَارث-أَ تْمنِّيغ اَذ رَاحن نِثْنِي اَذ قسّن يخف نْسن!
13شُوْف آي أَيثْمَا، ئِڒَاغَا-يَاوم-د أَربِّـي بَاش اَذ تِيڒِيم حُرّ. وَلَكِن وَار تجَّاث شَا لْحُرِّيَا-يَا نْوم اَذ تِيڒِي ذ يجّن ن وبْرِيذ إِي زِي غَا ثْسعِّيفم شّهْوث ن طَّبِيعَا ثَعفَّانْت نْوم؛ لَّا، أَذ تْسخَّارم إِ وَايَاوْيَا س ڒمْحِبّث. 14أَقَا مَارَّا ڒُوْصِيَاث ن شَّرِيعَا ن مُوْسَى مُوْننْت-يد ذَانِيتَا: <أَذ تخْسذ اَجَّار نّش اَمشْنَاو يخف نّش.> 15وَلَكِن مڒَا تْمرْمَاشم اَيَاوْيَا اَم ڒُوْحُوْش وَا يتتّ وَا، حْضَام يخف نْوم اَذ تْسغْڒِيم اَيَاوْيَا.
أَرُّوْح يقدّْسن ذ طَّبِيعَا ن بْنَاذم
16فَا نِّيغ-اَوم، تْعِيشث عْلَاحْسَاب ڒْخَاضَر ن أَرُّوْح يقدّْسن ثُمَّا وَار تْسعِّيفم شَا شّهَاوَاث ن طَّبِيعَا ثَعفَّانْت نْوم. 17لِأَنَّا مِين ثْرزُّو طَّبِيعَا ثَعفَّانْت نّغ نتَّا ضد ن مِين يرزُّو أَرُّوْح يقدّْسن. أُو اَمنِّي مِين يرزُّو أَرُّوْح يقدّْسن نتَّا ضد ن مِين ثْرزُّو طَّبِيعَا ثَعفَّانْت نّغ. تْعَارَّاضن إِ وَايَاوْيَا سّنِّي وَار تݣّم شَا ثِمسْڒَايِين-أَ إِي ثخْسم اَذ تݣّم. 18أُو مڒَا ڒْخَاضَر ن أَرُّوْح يقدّْسن ينْده-يكنِّيو، أَتَاف وَار خَاوم ثْحكِّيم شَا شَّرِيعَا.
19ڒخْذَايم ن طَّبِيعَا ثَعفَّانْت نّغ اَقَا تْبَاننْت-يد يعْنِي لْفَسَاذ ذ مِين يسخْنِيزن ذ ڒقْبَاحث، 20ذ لْعِبَادَا ن لْأَصْنَام ذ سّْحُوْر ذ لْعَدَاوَا ذ ؤُمنْغِي ذ لْغِيرَا ذ ؤُغْضَاب ذ لْأَنَانِيَا ذ لْخِلَافَاث ذ لْأَحْزَاب، 21ذ ڒحْسذ ذ وَاطَّاس ن شْرب ذ لْمَدلَّا ن سّكْرَا ذ مِين يتْشَابَّاهن ذِي مَانَايَا. عدْجْمغ-اَوم-د ڒخُّو مَامش تُوْغَا ذَاوم عڒْمغ زِي قْبڒ: يِنِّي يتݣّن ڒخْذَايم-أَ وَار تْوَارِيثن شَا ڒْمُلْك ن أَربِّـي.
22فَا مِين د يتَارو أَرُّوْح يقدّْسن؟ ئِتَارو-د ڒمْحِبّث ذ ڒفْرَاحث ذ ڒهْنَا ذ تَّاسِع ن ڒْخَاضَر ذ ڒْخِير ذ وُوْڒ اَشمْڒَاڒ ذ بْنَاذم ذِي يدْجَا تِّقث 23ذ تَّوَاضُع ذ بْنَاذم يحكّْمن خ شّهْوث نّس. وَار ثدْجِي بُو شَان ن شَّرِيعَا إِݣ يسْبدَّان ثِمسْڒَايِين-أَ. 24أُو يِنِّي يدْجَان ن عِيْسَى لْمَسِيح صَافِي صلّْبن طَّبِيعَا نِّي ثَعفَّانْت نْسن اَكذ شّهْوث ذ ڒْخَاضَر ن طَّبِيعَا-يَا. 25مڒَا نتْعِيش س أَرُّوْح يقدّْسن، أَتَاف لَابُد أَ نُوْيُوْر س ڒْخَاضَر نّس. 26وَار نْسمْغَار شَا يخف نّغ س تَّكبُّر، وَار ذَايْنغ يتِيڒِي شَا ڒحْسذ ذ ثْغنَّانْت جَارَانغ.
Currently Selected:
أيث-ݣلاطيا 5: ريف
Highlight
Share
Copy
Want to have your highlights saved across all your devices? Sign up or sign in
