أيث-ؤفسوس 5
5
1فَلِيهَذَا ݣّم مَامش يتݣّ أَربِّـي مِينْزِي كنِّيو ذ ثَارْوَا نّس يمْعِيزّن. 2عِيشم ذِي ڒمْحِبّث مَامش يݣَّا لْمَسِيح وَامِي ذَانغ يحِبّ يصدّق خَانغ يخف نّس اَم يِجّن ن صّذْقث ثُفُوْح ذ يجّن ن دْبِيحث إِ أَربِّـي.
3وَا لَابُد وَار يتِيڒِي وَالُو جَارَاوم زِي لْفَسَاد نِغ ذ مِين يسخْنِيزن نِغ ذ طّْمَع ڒَاحقَّاش مَانَايَا مَاشِي مَعْقُوْل إِ صَّالِحِين. 4أُو لَابُد عَاوذ وَار يتِيڒِي شَا جَارَاوم اَوَاڒ اَعفَّان نِغ ذ وَاوَاڒ يخْوَان نِغ ذ نُّكْتَا ذ ثَعفَّانْت؛ لَّا، ئِتْخصَّا اَذ يِيڒِي شُّكر إِ أَربِّـي. 5لِأَنَّا ونِّي يتݣّن لْفَسَاد نِغ ذ مِين يسخْنِيزن نِغ ذ مِين يسظْمَاعن، يعْنِي نتَّا ذ ونِّي يعبّْذن لْأَصْنَام، أَقَا تسّْنم بْڒَا شّكّ بلِّي مَارَّا يِنِّي يتݣّن مَانَايَا وَار غَارْسن بُو لْوَارث ذِي ڒْمُلْك ن لْمَسِيح نِغ ذِي أَربِّـي. 6وَار تجَّاث شَان حَدّ اَكنِّيو يشْمث س وَاوَاڒن نّس يخْوَان. لِأَنَّا خ سَّبَاب ن ثْمسْرَايِين-أَ إِ د يهوَّا وغْضَاب ن أَربِّـي خ يِنِّي إِي ث يعصَّان. 7إِذن وَار تمْعَشَارث شَا اَكِذْسن.
8شُوْف، ذݣ يِجّن ن ڒْوقْث كنِّيو تُوْغَا ذ ثَادْجسْت، ڒخُّو كنِّيو ثْذوْڒم ذ يجّن ن نُّوْر ذِي سِيذِي أَربِّـي. إِيوَا عِيشث اَم ثَارْوَا ن نُّوْر. 9أَقَا نُّوْر يتَارو-د مِين يدْجَان ذ اَصبْحَان ذ مِين يدْجَان نِيشَان ذ مِين يدْجَان ذ لْحَقِيقَا. 10ميّْزث عَاوذ مِين ذَاس يتعْجِيبن إِ سِيذِي أَربِّـي. 11وَار شَرّْشم شَا ذِي ڒخْذَايم ن ثَادْجسْت وَار تَارْونْت شَا، فضْحم-ثنْت. 12يِنِّي وَار يتْطِيعِين شَا. مڒَا نسِّيوڒ خَاسن يجّن ن وَاوَاڒ وَاهَا خ مِين تݣّن س ثْنُوْفْرَا اَتَاف أَ نسذْحَا. 13وَلَكِن مِين د ينْفضْحن س نُّوْر اَذ د يمظْهَار 14مِينْزِي ذ نُّوْر إِي د يسْمظْهَارن مَارَّا. خ مَانَايَا يقَّار لْكِتَاب:
<فَاق شك آ ونِّي يتطّْصن كَّار-د زِي ڒْموْث،
أَخَاك يشعْشع لْمَسِيح س نُّوْر نّس.>
15إِذن فَا، رَجْعَاث يخف نْوم خْزَرث مَامّش إِي غَا ثْعِيشم. مَاشِي اَذ تْعِيشم اَم يِنِّي إِي ذِي ثدْجَا ڒقْفَاڒث؛ لَّا، عِيشم اَم يِنِّي إِي ذِي ثدْجَا ڒفْهَامث. 16سْتَغلَّام ڒْوقْث نْوم مْلِيح لِأَنَّا نْهُوْرَاث-أَ ذ يعفَّانن. 17إِيوَا وَار تِيڒِيم شَا بْڒَا ڒَعْقڒ؛ لَّا، فهْمث مِين يخس سِيذِي أَربِّـي. 18وَار سْكَرث شَا س شْرب إِݣ يتَاوِين غَار لْمَدلَّا ن سّكْرَا؛ لَّا، شَّارم س أَرُّوْح يقدّْسن. 19سِيوْڒم اَݣ وَايَاوْيَا س وَاوَاڒن ن زَّبُوْر ذ لْأَمْدَاح ذ يِيزْڒَان رُوْحِيَا. غنّْجم، ݣّم لْمُوْسِيقَا إِ سِيذِي أَربِّـي ذݣ وُوْڒَاون نْوم. 20شكَّرم ڒبْدَا أَربِّـي بَابَاثْنغ خ مَارَّا ثِمسْڒَايِين ذݣ يِيسم ن سِيذِيثْنغ عِيْسَى لْمَسِيح. 21طَاعم إِ وَايَاوْيَا عْلَاحْسَاب ڒُوقَّر نْوم إِ لْمَسِيح.
يرْيَازن ذ ثمْغَارِين
22آ ثِمْغَارِين، طَاعنْت إِ يرْيَازن نْكنْت مَامّش إِي ثْطَاعَانْت إِ سِيذِيثْنغ. 23ڒَاحقَّاش اَرْيَاز يتْرَايَّا خ ثمْغَارْث نّس مَامْش عَاوذ يتْرَايَّا لْمَسِيح خ جْمَاعث ن ڒْمُوْمِنِين. جْمَاعث-أَ يسنْجمْ-يت لْمَسِيح أُو ذ نتَّاث إِݣ يدْجَان ذ دَّات نّس. 24أُو مَامّش ثْطَاعَا جْمَاعث ن ڒْمُوْمِنِين إِ لْمَسِيح، أَمنِّي إِي غَا طَاعنْت ثمْغَارِين إِ يرْيَازن نْسنْت ذِي مَارَّا.
25-26آي يرْيَازن، حِبّم ثِمْغَارِين نْوم مَامّش يحِبّ لْمَسِيح جْمَاعث ن ڒْمُوْمِنِين يصدّق خَاس يخف نّس حمَا اَت يسِّيصْفَا. يَارِّي-ت ذ ثَمنْقَاوِيث وَامِي ت يسِيرذ س وَامَان ذ وَاوَاڒ نّس. 27حمَا لْمَسِيح اَذ يقدّم جْمَاعث ن ڒْمُوْمِنِين إِ يِيخف نّس تْشعْشِيع ذ ثَمْقدّسْت وَار تْوسِّيخ وَار تشْنِيق وَار ذَايس يتِيڒِي بُو شَا ن ڒْعِيب نّغْنِي. 28أَمنِّي كِيف-كِيف لَابُد يرْيَازن اَذ حِبّن ثِمْغَارِين نْسن مَامش تْحِبَّان دَّات نْسن. ونِّي يتْحِبَّان ثَمْغَارْث نّس ذ يخف نّس إِي يتْحِبَّا. 29شُوْف، عمَّارْص وَار يدْجِي حَدّ يتْعِيفَّا دَّات نّس: لَّا، ئِتْذبَّر-د خَاس يتْحَوَاڒ خَاس. أَمنِّي إِي يتݣ لْمَسِيح اَك جْمَاعث ن ڒْمُوْمِنِين. 30لِأَنَّا نشِّين ذ طْرُوْفَاث ن دَّات نّس.
31 لْكِتَاب يقَّار: <خ مَانَايَا اَرْيَاز اَذ يسْمح ذِي بَابَاس ذ يمَّاس اَذ يمُوْن اَك ثمْغَارْث نّس، ثْنَاين إِذْسن اَذ ذوْڒن ذ يجّن.> 32ذݣ وَاوَاڒ-أَ مِيخف نسَّاوَاڒ ذَايس يجّن ن ڒْمَعْنَا ينُوْفَّرن يُودْجغ اَطَّاس. قَّارغ نش بلِّي ڒْمَعْنَا-يَا يسَّاوَاڒ خ لْمَسِيح اَك جْمَاعث ن ڒْمُوْمِنِين. 33إِنَّمَا، لَابُد كُڒ يجّن زَّايْوم اَذ يحِبّ ثَمْغَارْث نّس اَم مَامّش يتْحِبَّا يخف نّس. ثَمْغَارْث أُو لَابُد اَذ تْوقَّر اَرْيَاز نّس.
Currently Selected:
أيث-ؤفسوس 5: ريف
Highlight
Share
Copy
Want to have your highlights saved across all your devices? Sign up or sign in
