أيث-كولوس 4
4
1آي أَيثْبَاب ن يسمْغَان، ذبَّرم خَاسن خ يسمْغَان نْوم س مِين يدْجَان نِيشَان ذ ڒْحَقّ نْسن اَقَا كنِّيو ثسّْنم إِلَّا غَارْوم بَاب نْوم ذݣ وجنَّا.
ڒُوْصِيَاث ثِنݣُّوْرَا
2تݣّم لْمجْهُوْد س ثْࢲَادْجِيث نْوم، إِڒِيم عْلَابَال ذِي ثْࢲَادْجِيث نْوم شكَّرم أَربِّـي. 3ذِي نّفْس ن ڒْوقْث تَّارم-اَس إِ أَربِّـي خَانغ بَاش اَذ يرْزم ثَوَّارْث إِ وَاوَاڒ نّغ أَ نْبشَّر س ڒْمَعْنَا ينُوْفَّرن ن لْمَسِيح إِي خف إِي دْجِيغ نش ذِي ڒحْبس. 4تَّارم-اَس إِ أَربِّـي بَاش اَزَّايس سْفهْمغ مْلِيح إِ يِوْذَان عْلَاحْسَاب مِين لَابُد اَذ ينِيغ. 5عِيشث س ڒفْهَامث اَك يِنِّي يدْجَان غَار بَارَّا نْوم وَار يُوْمِينن شَا، سْتَغلَّام ڒْوقْث نْوم مْلِيح. 6أُو لَابُد اَوَاڒ نْوم اَذ يِيڒِي ڒبْدَا يشُّوْر س اَرْضَا يمدْجْحن س ڒمْڒح بَاش اَذ تسّْنم مَامش غَا ثَارّم خ كُڒ يجّن.
لْخِتَام ن ثبْرَات-أَ
7ؤُمَاثْنغ تُوْشِيق اَكنِّيو يخبَّر خ مَارَّا مِين تݣّغ ذَانِيتَا. نتَّا يعِيزّ خَافِي، ئِتْسخَّار إِ أَربِّـي س يِجّن ن تِّقث. نتَّا ذ اَخدَّام يتمْعَشَارن اَكِذِي ذِي ڒْخذْمث ن سِيذِيثْنغ. 8سّكّغ-ث-يذ غَارْوم خ شّْغڒ-أَ وَانِيتَا بَاش اَذ تسّْنم مَامش ندْجَا نشِّين اَذ يشجّع ؤُڒَاون نْوم. 9أَكِذس ؤُمَاثْنغ وَنِيسَامُو نتَّا إِي خَانغ يعِيزّن ذَايس تِّقث، نتَّا زِي ثْمُوْرْث نْوم. يِيْنَا اَكنِّيو خبَّرن مَارَّا مِين يوقْعن ذݣ ومْشَان-أَ.
10ئِسَاوَّاض-اَوم-د سْڒَام أَرِسْتَارْخُوْس ونِّي إِي كِذِي يدْجَان ذِي ڒحْبس-أَ. ئِسَاوَّاض-اَوم-د سْڒَام ؤُڒَا ذ مَرْقُس مِّيس ن عْزِيزس ن بَرْنَابَاس. تُوْغَا وصِّيغ-كنِّيو خ مَرْقُس-أَ مڒَا يُوْسَا-د غَارْوم رحّْبث زَّايس. 11ئِسَاوَّاض-اَوم-د سْڒَام عَاوذ عِيْسَى ونِّي ؤُمِي قَّارن يُوْسْتُوْس. ذ يِيْنَا وَاهَا إِݣ يدْجَان ذ يسْرَائِيلِيْين زݣ يِنِّي يتمْعَشَارن اَكِذِي ذِي ڒْخذْمث-أَ عْلَاحْسَاب ڒْمُلْك ن أَربِّـي، تْشجَّاعن-اَيِي اَطَّاس.
12ئِسَاوَّاض-اَوم-د سْڒَام پَـافْرَاس نتَّا إِݣ يدْجَان زِي ثْمُوْرْث نْوم، نتَّا ذ يجّن ن وخدَّام ن عِيْسَى لْمَسِيح. ڒبْدَا يتَاحڒ ذِي ثْࢲَادْجِيث عْلَاحْسَاب كنِّيو بَاش اَذ تْبدّم خ دْسَاس اَذ تِيڒِيم ثمْغَرم ذِي لْإِيمَان نْوم وَار غَارْوم يتِيڒِي بُو شّكّ ذِي مَارَّا مِين يخس أَربِّـي. 13نش شهّْذغ خَاس يربّڒ خَاوم مْلِيح ذ يِنِّي عَاوذ يدْجَان ذِي ثنْدِينْت ن لَاوْدُكْيَا ذ يِنِّي يدْجَان ذِي ثنْدِينْت ن يِيرَاپُـلِيس.
14ئِسَاوَّاض-اَوم-د سْڒَام اَمْعِيزّ نّغ لُوْقَا إِݣ يدْجَان ذ اَضْبِيب، أَكِذس دِيمَاس. 15سِيوْضم-اَسن سْڒَام ينُو إِ أَيثْمَاثْنغ إِي يدْجَان ذِي ثنْدِينْت ن لَاوْدُكْيَا ذ وُوْتْشْمَاثْنغ نُوْمِيبْـيَا ذ جْمَاعْث ن ڒْمُوْمِنِين إِي يدْجَان ذِي ثدَّارْث نّس.
16خْمِي غَا ثغرم ثَبْرَات-أَ كنِّيو جَارَاوم، عَاوذ خْزَرم جْمَاعث ن ڒْمُوْمِنِين اَت غَرن ذِي لَاوْدُكْيَا. خْزَرم عَاوذ كنِّيو ثَبْرَات نْسن زِي لَاوْدُكْيَا اَت تغَرم.
17إِنِيم-اَس إِ أَرْكِيپُّـوْس أُو لَابُد اَذ تْكمّْڒذ لْوَاجِب ن ڒْخذْمث إِي ثْقبْڒذ زِي سِيذِيثْنغ.
18قَا نش ذ بُوْلُس س ثِيرَا ن وفُوْس ينُو إِي زِي ذَاوم د سَاوَّاضغ سْڒَام ڒخُّو. فقْذم-اَيِي-د س سْنَاسڒ ينُو ن ڒحْبس-أَ. أَكِذْوم يِيڒِي اَرْضَا.
Currently Selected:
أيث-كولوس 4: ريف
Highlight
Share
Copy
Want to have your highlights saved across all your devices? Sign up or sign in
