أيث-كولوس 3
3
لْقَوَانِين ن يِجّن ن ثُوْذَارْث ذ جْذِيذ
1إِذن فَا وَامِي تْوَاسْنكَّارم كنِّيو اَك لْمَسِيح أُو لَابُد اَذ ترْزُوْم س وُوْڒَاون نْوم ثِمسْڒَايِين نِّي يدْجَان ذݣ وجنَّا مَانِي يقِّيم لْمَسِيح غَار وفُوْسِي ن أَربِّـي. 2رزُّوْث س وُوْڒَاون نْوم ثِمسْڒَايِين نِّي يدْجَان ذݣ وجنَّا، مَاشِي ثِنِّي ذِي ثْمُوْرْث. 3مِينْزِي زَعْمَا كنِّيو ثمُّوْثم، ثُوْذَارْث نْوم اَقَا ثْنُوْفَّر اَك لْمَسِيح ذِي أَربِّـي. 4خْمِي د غَا يمظْهَار لْمَسِيح يعْنِي ونِّي يدْجَان ذ ثُوْذَارْث نْوم، ڒخْدّنِّي اَكِذس تْمظْهَارم ؤُڒَا ذ كنِّيو ذِي لْعَظَمَا.
5خ مَانَايَا نْغث مِين يدْجَان ذَايْوم ذِي طَّبِيعَا نْوم ن دُّنشْت-أَ يعْنِي لْفَسَاد ذ مِين يخنْزن ذ شّهْوث ذ ڒْخَاضَر اَعفَّان ذ طْمَاع إِݣ يدْجَان نتَّا اَم لْعِبَادَا ن لْأَصْنَام. 6عْلَاحْسَاب ثِمسْڒَايِين-أَ إِي د غَا يَاسن نْهَار ن وغْضَاب ن أَربِّـي. 7تُوْغَا قْبڒ ثُوْيُوْرم خ يبْرِيذن-أَ ثْعِيشم ذَايْسن. 8وَلَكِن ڒخُّو ثِمسْڒَايِين نِّي يتْخصَّا اَخَاوم ثنْت ثسْبعّْذم قَاع يعْنِي اَعصَّاب ذ وغْضَاب ذ شَّرّْ ذ ڒْبَاطڒ ذ وَاوَاڒن يعفَّانن إِي ثقَّارم س وقمُّوْم نْوم. 9وَار سْخرِّيقم شَا خ وَايَاوْيَا ڒَاحقَّاش ثْبدّْڒم طَّبِيعَا نِّي نْوم تُوْغَا غَارْوم قْبڒ ذَايس يخَرْوِيضن وَاهَا. 10ڒخُّو كنِّيو ثݣِّيم يجّن ن طَّبِيعَا نّغْنِي ذ جْذِيذ عَاذ تْذوَّاڒ-د ذ جْذِيذ، ڒْمَعْرِيفَا نّس اَم صِّفث ن لْخَالِق نّس. 11وَار يتْغِيمِي بُو ويُوْنَانِي نِغ ذ اَئِسْرَائِيلِي، نِغ ذ ونِّي يطهَّارن نِغ ذ ونِّي وَار يطهِّيرن شَا، نِغ ذ اَبَرْبَرِي نِغ ذ اَوحْشِيو،#3.11 حَرْفِيَان اَوَاڒ-أَ اَوحْشِيْو نتَّا ذ اَسْقُوْثِي يعْنِي شَان يِوْذَان ذ يهَمَاجِيْين تُوْغَا زدّْغن غَار شَّمَال ن لْيُوْنَان ذ لْإِيرَان. نِغ ذ يسْمغ نِغ ذ ونِّي يدْجَان حُرّ. لَّا، لْمَسِيح نتَّا ذ مَارَّا، أَقَاث ذِي مَارَّا.
12إِذن كنِّيو ذ شَّعْب مُقدّس يخْضَر-يكنِّيو أَربِّـي ثْعِيزّم خَاس. لَابُد اَذَايْوم ثِيڒِي لْحَنَانَا ذ ڒْخِير ذ تَّوَاضُع ذ صّْبَر أُو مَارَّا بْڒَا تَّكبُّر. 13صْبَارث اَك وَايَاوْيَا. مڒَا شَان يِجّن زَّايْوم غَارس شَان لْمُشْكِل إِي زَّايس غَا يشثْشَا خ ونّغْنِي، ئِتْخصَّا يجّن اَذ يسْمح إِ ونّغْنِي. مَامّش ذَاوم يغْفَر أَربِّـي إِ كنِّيو، أَمنِّي إِي غَا ثْسمْحم إِ يِوْذَان. 14كْتَار مَارَّا زِي ثْمسْڒَايِين-أَ ثِيْنَا يتْخصَّا اَذ تسْخذْمم ڒمْحِبّث جَارَاوم مِينْزِي ڒمْحِبّث-أَ تَاس-د اَم يِجّن ن وسْغُوْن إِݣ يسْمُوْنن مَارَّا ثِمسْڒَايِين-أَ ذݣ يِشْتن.
15اجّم ڒهْنَا ن لْمَسِيح اَذ يحْكم ذݣ وُوْڒَاون نْوم مِينْزِي كنِّيو ذ يجّن ن جْمَاعث يڒَاغَا-يَاوم-د اَڒ ڒهْنَا-يَا. كنِّيو عَاوذ شكَّرم أَربِّـي. 16اجّم اَوَاڒن ن لْمَسِيح اَذَايْوم زذْغن س مَارَّا لْبَرَكَا نْسن. س مَارَّا ڒفْهَامث يتْخصَّا يجّن اَذ يسفْهم ونّغْنِي، ئِجّن اَذ ينْهَا ونّغْنِي. غنّْجم س وَاوَاڒن ن زَّبُوْر ذ لْأَمْدَاح ذ يِيزْڒَان رُوْحِيَا اَكِذس ثݣّم يجّن ن شُّكر ذݣ وُوْڒَاون نْوم إِ أَربِّـي. 17مَارَّا مِين تݣّم س وَاوَاڒن نِغ س لْحَسَانَاث، ئِتْخصَّا اَذ تݣّم مَانَايَا مَارَّا عْلَاحْسَاب يسم ن سِيذِيثْنغ عِيْسَى اَزَّايس تْشكَّرم أَربِّـي بَابَاثْنغ.
ڒُوْصِيَاث ن ڒْمُوْمِنِين يتْذفَّارن لْمَسِيح
18آ ثِمْغَارِين، طَاعنْت إِ يرْيَازن نْكنْت مِينْزِي مَانَايَا إِݣ يدْجَان ذ لْمَعْقُوْل زِي أَربِّـي.
19آي يرْيَازن، حِبّم ثِمْغَارِين نْوم وَار يدْجِي اَكِسنْت تْوَاقْسْحم.
20آي يحنْجِيرن، طَاعم إِ لْوَالِدِين نْوم ذِي مَارَّا ثِمسْڒَايِين مِينْزِي مَانَايَا يتْعجِيب-اَس إِ سِيذِي أَربِّـي.
21آي يبَابَاثن، وَار تْقهَّارم شَا ثَارْوَا نْوم بَاش وَار تفْشِيڒن شَا.
22آي يسمْغَان، طَاعث إِ أَيثْبَاب نْوم ن دُّنشْت-أَ ذِي مَارَّا ثِمسْڒَايِين. طَاعم-اَسن مَاشِي غِير خْمِي ذَاوم تْبدَّان غَار وزدْجِيف وَاهَا حمَا اَذَاسن تْعجْبم؛ لَّا، طَاعم-اَسن س ڒْخَاضَر نْوم اَكِذْوم ثِيڒِي يجّن ن ثِيݣّْوْذِي ذِي سِيذِيثْنغ. 23مَارَّا مِين تݣّم، تݣّم-ث س ڒْخَاضَر نْوم مَامّش ذَاس ثْخدّْمم إِ سِيذِيثْنغ مَاشِي إِ يرْيَازن. 24كنِّيو ثسّْنم لْجَائِزَا نْوم اَذ تِيڒِي ذ يجّن ن لْوَارث زِي سِيذِيثْنغ. نتَّا ؤُمِي ثْخدّْمم نتَّا ذ سِيذِيثْنغ لْمَسِيح. 25شُوْف، ونِّي يضدْجْمن اَتَاف اَذ يشّ اَعْمُوْذ خ مِين يضدْجم. أَربِّـي وَار يتݣّ بُو س وُوْذمَاون جَار يِوْذَان.
Currently Selected:
أيث-كولوس 3: ريف
Highlight
Share
Copy
Want to have your highlights saved across all your devices? Sign up or sign in
