1 أيث-سلونيك 1
1
لْمُقَدِّمَا
1نش ذ بُوْلُس، أَكِذِي سِيلَاس ذ تِيْمُوْتَاوُس. نْتَارِي ثَبْرَات-أَ غَار جْمَاعث ن ڒْمُوْمِنِين ن أَيث-سَلُوْنِيك إِي يُوْمْنن زِي أَربِّـي بَابَاثْنغ ذ عِيْسَى لْمَسِيح سِيذِيثْنغ. أَكِذْوم يِيڒِي اَرْضَا ذ ڒهْنَا.
بُوْلُس ذ سِيلَاس ذ تِيمُوْتَاوُس تْشكَّرن أَربِّـي
2نشِّين ڒبْدَا نتْشكَّر أَربِّـي خَاوم مَارَّا، نْتتَّار إِ أَربِّـي خَاوم بْڒَا مَا ٱ نْبدّ. 3نتْخمَّام زَّاث ن أَربِّـي يدْجَان ذ بَابَاثْنغ مشْحَاڒ يخدّم لْإِيمَان نْوم، مشْحَاڒ ثربّڒ ڒمْحِبّث نْوم، أُو مشْحَاڒ يصبَّر لْأَمَال نْوم ذِي سِيذِيثْنغ عِيْسَى لْمَسِيح.
4آي أَيثْمَاثْنغ يِنِّي يعِيزّن خ أَربِّـي، نسّن قَا نتَّا يخْضَر-يكنِّيو. 5لِأَنَّا لْإِنْجِيل إِي نتْبشَّار وَار د يُوْسِي شَا غَارْوم س وَاوَاڒن وَاهَا، يُوْسَا-د غَارْوم س ثْزمَّار ذ أَرُّوْح يقدّْسن ذ يِج وقنَّاع يمْغَر. أَقَا ثسّْنم مَامش تُوْغَا نتْعِيش جَارَاوم عْلَاحْسَاب كنِّيو. 6كنِّيو ثبْذَام تݣّم مَامش نْتݣّ نشِّين ذ مَامش يتݣّ سِيذِيثْنغ لِأَنَّا كنِّيو ذِي ڒْوسْط ن وَاطَّاس ن تَمَارَا ثْقبْڒم اَوَاڒ نّغ س ڒفْرَاحث إِي د يُوْسِين زِي أَرُّوْح يقدّْسن. 7أَمُّو ثْذوْڒم ذ يجّن ن لْمِثَال اَث ذفَّرن مَارَّا ڒْمُوْمِنِين إِݣ يدْجَان ذِي لْإِقْلِيم ن مَاسِدُوْنْيَا ذ لْإِقْلِيم ن ؤُخَايَا. 8زَّايْوم كنِّيو إِي د يفّغ صُّوْت ن وَاوَاڒ ن سِيذِيثْنغ. مَاشِي يفّغ-د ذِي مَاسِدُوْنْيَا ذ ؤُخَايَا وَاهَا؛ لَّا، يفّغ-د ڒخْبَر-أَ خ لْإِيمَان نْوم زِي أَربِّـي غَار يِوْذَان ذِي مَارَّا يمُوْشَان. خ مَانَايَا وَار ذَانغ يتْخصِّي شَا اَخَاس نسِّيوڒ مِينْزِي يوْذَان تسْڒَان خَاوم. 9ئِوْذَان نِّي س يِيخف نْسن سُوْفُوْغن خَاوم ڒخْبَار خ مَامش إِي ذَانغ ثْقبْڒم ذ مَامش إِي ثْسمْحم ذِي لْأَصْنَام بَاش اَذ تْعبْذم أَربِّـي يدَّرن إِي يدْجَان ذ صَّح. 10حمَا اَذ تْرَاجَام مِّيس إِي د غَا يَاسن زݣ وجنَّا ونِّي إِي د يسكَّر أَربِّـي زݣ يمتِّينن يعْنِي عِيْسَى إِي ذَانغ يسنْجَامن زݣ وغْضَاب نِّي إِي د غَا يَاسن.
Currently Selected:
1 أيث-سلونيك 1: ريف
Highlight
Share
Copy
Want to have your highlights saved across all your devices? Sign up or sign in
