1 أيث-كورينث 7
7
أَرَّسُوْل بُوْلُس يتْوصَّا ڒْمُوْمِنِين خ ڒمْڒَاش
1فَا ڒخُّو أَ نْسِّيوڒ خ ثْمسْڒَايِين إِي خف ثُوْرِيم كنِّيو. مَثَالَان، مْلِيح اَرْيَاز مڒَا وَار يتْحِيذِي شَا ثَمْغَارْث. 2وَلَكِن حْسن مڒَا كُڒ يجّن اَغَارس ثِيڒِي ثمْغَارْث نّس، كُڒ يشْتن اَغَارس يِيڒِي ورْيَاز نّس حمَا وَار يتِيڒِي شَا لْفَسَاد. 3أُو لَابُد اَرْيَاز اَذ يُوْش ڒْحَقّ ن ڒمْڒَاش إِ ثمْغَارْث نّس. أَمُّو عَاوذ أُو لَابُد ثَمْغَارْث اَذ تُوْشّ ڒْحَقّ ن ڒمْڒَاش إِ ورْيَاز نّس. 4ڒَاحقَّاش ثَمْغَارْث وَار تْرَايِـي شَا خ دَّات نّس وَاحْذس، ئِتْرَايَا خَاس ؤُڒَا ذ اَرْيَاز نّس. أَمُّو عَاوذ اَرْيَاز وَار يتْرَايِي شَا خ دَّات نّس وَاحْذس، تْرَايَا خَاس ؤُڒَا ذ ثَمْغَارْث نّس.
5ئِتْخصَّا وَار ثْقطّْعم شَا خ وَايَاوْيَا إِلَّا مڒَا ثْتَافْقم اَك وَايَاوْيَا يجّن ن لْمُدَّا وَاهَا حمَا اَذ تُوْشم ڒْوقْث نِّي إِ ثْࢲَادْجِيث نْوم. منْبَعْد اَذ تْمُوْنم حمَا وَار كنِّيو يتْغَارِّي شَا شِّيطَان ڒَاحقَّاش اَتَاف وَار ثْزمَّرم شَا اَذ تْحكْمم مْلِيح خ شّهْوث نْوم. 6وَلَكِن مَانَايَا مَاشِي ذ يجّن ن ڒُوْصِيّث، قَّارغ-اَوم-ت اَم يِجّن ن تّسْرِيح. 7رزُّوْغ مَارَّا يرْيَازن اَذ يڒِين اَم نش. وَلَكِن كُڒ يجّن غَارس ثِزمَّار إِي ذَاس يُوْشَا أَربِّـي، ئِجّن غَارس ثِين، ئِجّن غَارس ثَا.
8فَا ڒخُّو اَذ سِّيوْڒغ خ يِنِّي وَار يمْڒِيشن شَا ذ ثَاجَّاڒِين. يعْنِي مْلِيح مڒَا قِّيمن اَم نش. 9وَلَكِن مڒَا وَار زمَّرن شَا اَذ حكْمن خ شّهْوث نْسن أُو لَابُد اَذ مڒْشن. ڒَاحقَّاش مڒَا مڒْشن حْسن زِي مڒَا قِّيمن حرّْقن ذِي شّهْوث نْسن.
10فَا يِنِّي يمڒْشن، ئِوصَّا خَاسن سِيذِيثْنغ مَاشِي ذ نش: ممْنُوْع ثَمْغَارْث اَذ تسْمح ذݣ ورْيَاز. 11مڒَا ثَمْغَارْث ثسْمح ذݣ ورْيَاز نّس يتْخصَّا-يَاس وَار تْمدْجش شَا عَاوذ، نِغ اَذ تْمصْڒَاح اَك ورْيَاز نّس. ممْنُوْع عَاوذ اَرْيَاز اَذ يدْجف إِ ثمْغَارْث نّس.
12فَا يِنِّي نّغْنِي، قَّارغ-اَسن نش (يعْنِي وَار ت يقَّار شَا سِيذِيثْنغ، غِير نش): مڒَا شَان ؤُمَاثْنغ غَارس ثَمْغَارْث مَاشِي ذ ڒْمُوْمنَا ثقْبڒ اَكِذس ثْعِيش، ممْنُوْع اَذَاس يدْجف. 13عَاوذ ثَمْغَارْث، مڒَا غَارس اَرْيَاز مَاشِي ذ ڒْمُوْمن يقْبڒ اَكِذس يعِيش، ممْنُوْع اَذَاس ثدْجف. 14شُوْف، أَرْيَاز مَاشِي ذ ڒْمُوْمن اَقَاث سْوَادَّاي إ لْعِنَايَا ن أَربِّـي س ثمْغَارْث نّس. ثَمْغَارْث مَاشِي ذ ڒْمُوْمنَا اَقَات سْوَادَّاي ن لْعِنَايَا ن أَربِّـي س ورْيَاز نّس. مڒَا مَاشِي اَمنِّي، ثَارْوَا نْوم اَذ يڒِين س بَارَّا ن لْعِنَايَا ن أَربِّـي. وَلَكِن ڒخُّو اَقَاثن سْوَادَّاي إِ لْعَنَايَا نّس.
15إِنَّمَا، ونِّي نِغ ثنِّي وَار يُوْمِينن شَا مڒَا يسْمح، صَافِي اَذ يسْمح. يعْنِي ڒْمُوْمن-أَ ذ ڒْمُوْمنَا-يَا غَارْسن لْحُرِّيَا س ظُرُوْف-أَ لِأَنَّا يڒَاغَا-يَاوم-د أَربِّـي اَذ تْعِيشم ذِي ڒهْنَا. 16شُوْف آ ثَمْغَارْث، مَانِيس ثسّْنذ شم زَعْمَا بَاش اَذ تسْنجْمذ اَرْيَاز نّم؟ ئِي شك آي اَرْيَاز، مَانِيس ثسّْنذ شك زَعْمَا بَاش اَذ تسْنجْمذ ثَمْغَارْث نّش؟
17كُڒ يجّن اَذ يعِيش ثُوْذَارْث نّس مَامش ذَاس ت يُوْشَا سِيذِيثْنغ، مَامش ذَاس د يڒَاغَا أَربِّـي. أَمُّو إِي تْوصِّيغ نش مَارَّا ثِجُوْمَع ن ڒْمُوْمِنِين. 18شَان يجّن، مڒَا يڒَاغَا-يَاس-د أَربِّـي أُو نتَّا تُوْغَا ݣِّين-اَس طَّهَارث،#7.18 طَّهَارث نتَّاث ذ اَحجّم نِغ ذ اَخْثَان نِغ ذ لْخِتَام. مَاشِي اَذ يرَاح اَذ يكّس طَّهَارث نِّي. شَان يجّن، مڒَا يڒَاغَا-يَاس-د أَربِّـي تُوْغَا وَار ذَاس ݣِّين شَا طَّهَارث، مَاشِي اَذ يرْزُو اَذ يݣّ طَّهَارث. 19مڒَا يتْطهَّار نِغ وَار يتْطهِّير شَا، مَانَاينِّي يتْوَاحْسَاب ذ وَالُو. مڒَا يتݣّ س ڒُوْصِيَاث ن أَربِّـي ذ مَانَاينِّي إِݣ يتْوَاحْسَابن. 20كُڒ يجّن اَذ يقِّيم ذِي لْحَالَا إِي ذِي تُوْغَا يدْجَا زِي قْبڒ مَا ذَاس د يڒَاغَا أَربِّـي. 21شك مَا ذ يسْمغ وَامِي ذَاش د يڒَاغَا؟ إِيوَا بْڒَا ٱش يشْقَا مَانَايَا. وَلَكِن مڒَا غَارك لْفُرْصَا اَذ تْربْحذ لْحُرِّيَا نّش، اݣّ-يت. 22لِأَنَّا ونِّي تُوْغَا يدْجَان ذ يسْمغ وَامِي ذَاس د يڒَاغَا سِيذِيثْنغ، نتَّا ڒخُّو غَارس يجّن ن لْحُرِّيَا زِي سِيذِيثْنغ. أَمنِّي عَاوذ ونِّي تُوْغَا يدْجَان غَارس لْحُرِّيَا، نتَّا ڒخُّو يذْوڒ ذ يسْمغ ن سِيذِيثْنغ. 23صَافِي، يسْغِي-كنِّيو س يِجّن ن تَّمَن، وَار تَارَّام شَا يخف نْوم ذ يسمْغَان ن بْنَاذم. 24آي اَيثْمَا، أَذ يقِّيم كُڒ يجّن ذِي لْحَالَا نِّي إِي ذِي ذَاس د يڒَاغَا أَربِّـي.
25فَا ڒخُّو اَذ سِّيوْڒغ خ ثْحَرْمُوْشِين وَار يمْڒِيشن شَا. وَار غَارِي بُو ڒُوْصِيّث زِي سِيذِيثْنغ؛ لَّا، قَّارغ مَانَايَا س اَرَّاي ينُو. تيّْقم ذَايِي عْلَاحْسَاب اَرَّاحْمث ن سِيذِيثْنغ. 26عْلَاحْسَاب ڒْوقْث-أَ يقسْحن، يعْنِي مْلِيح مڒَا يقِّيم بْنَاذم مَامش يدْجَا. 27شك، مَا غَارك ثَمْغَارْث؟ وَار رزُّو شَا اَذ تْسمْحذ ذِي مَانَايَا. شك، مَا وَار غَارك بُو ثمْغَارْث؟ وَار رزُّو شَا خ ثمْغَارْث. 28وَلَكِن شك مڒَا ثْمڒْشذ مَعْلِيش، وَار ثعْصِيذ شَا. عَاوذ ثَحَرْمُوْشْت مڒَا ثمْڒش مَعْلِيش، وَار ثعْصِي شَا. وَلَكِن يِنِّي يمڒْشن اَغَارْسن يڒِين لْمَشَاكِل ذِي دُّنشْت-أَ. نش رزُّوْغ اَخَاوم سْبعّْذغ مَانَاينِّي.
29فَا آي اَيثْمَا، مِين رزُّوْغ اَذ ينِيغ؟ ڒْوقْث اَقَا ثْقَارّب-د. سَّا ٱڒ ثْسَاونْت يِنِّي يمڒْشن اَذ عِيشن اَخْمِي وَار مْڒِيشن شَا، 30ذ يِنِّي يتْخيَّاقن اَخْمِي وَار تْخيِّيقن شَا، ذ يِنِّي يفَرّْحن اَخْمِي وَار فَرّْحن شَا، ذ يِنِّي يسَّاغن اَخْمِي مَانَاينِّي وَار زَّايس تْملِّيكن شَا، 31ذ يِنِّي ينفّْعن زِي دُّنشْت-أَ اَخْمِي مَانَاينِّي وَار زَّايس نفّْعن شَا. مَايمِّي؟ مِنْزِي طَّبِيعَا ن دُّنشْت-أَ وَار تْدُوْمِي شَا.
32فَا رزُّوْغ اَذ تِيڒِيم بْڒَا اَمْنُوْس. ونِّي وَار يمْڒِيشن شَا غَارس يجّن ن لْمُهِيمَا إِ شّْغڒ ن سِيذِيثْنغ، مَامّش غَا يݣّ اَخَاس يَارْضَا سِيذِيثْنغ. 33-34وَلَكِن اَرْيَاز يمڒْشن غَارس يجّن ن لْمُهِيمَا إِ شّْغڒ ن دُّنشْت-أَ، مَامّش غَا يݣّ اَخَاس ثَارْضَا ثمْغَارْث نّس. نتَّا لْمُهِيمَاث نّس فَرّْقنْت خ ثْنَاين.
ثَمْغَارْث وَار يمْڒِيشن شَا ذ ثنِّي إِݣ يدْجَان ذ ثَعْزْرِيث غَارْسنْت يجّن ن لْمُهِيمَا إِ شّْغڒ ن سِيذِيثْنغ، مَامّش غَا ݣّنْت اَذ عبْذنْت سِيذِيثْنغ س دَّات نْسنْت ذ وُوْڒ نْسنْت. ثَمْغَارْث يمڒْشن غَارس يجّن ن لْمُهِيمَا إِ شّْغڒ ن دُّنشْت-أَ، مَامّش غَا ثݣّ اَخَاس يَارْضَا ورْيَاز نّس. 35مَانَايَا قَّارغ-ث بَاش اَكنِّيو نفْعغ، مَاشِي اَكنِّيو سْحسْڒغ. لَّا، رزُّوْغ اَذ تْعِيشم س لْمَعْقُوْل اَذ تْعبّْذم سِيذِيثْنغ مَاشِي س شَان ن لْمُهِيمَا نّغْنِي.
36فَا ونِّي يخظْبن، مڒَا وَار يزمَّر شَا اَذ يصْبَر خ ثْحنْجِيرْث نِّي يعْنِي وَار يحكّم شَا مْلِيح خ شّهَاوَاث نّس، صَافِي يتْخصَّا-ٱس اَذ يݣّ لْوَاجِب نّس يعْنِي اَذ يمْڒش اَكِذس. مَعْلِيش نتَّا وَار يعصِّي شَا. 37أَمَّا ونِّي يعوّْڒن مْلِيح ذݣ وُوْڒ نّس اَذ يفْسخ اَك ثنِّي إِݣ يخْظب. مڒَا يعمّذ خ مَانَايَا ذݣ وُوْڒ نّس وَار ذِنِّي حتَّا ذ شَا ن ڒْحَاجث اَخَاس ثْزيَّار يعْنِي يحكّم خ شّهْوث نّس، مَعْلِيش يݣَّا مْلِيح. 38خ مَانَايَا ونِّي يمڒْشن اَك ثنِّي إِݣ يخْظب، مَعْلِيش يݣَّا مْلِيح. أُو ونِّي وَار كِذس يمْڒِيشن شَا، يݣَّا حْسن عَاذ.
39ثَمْغَارْث يمڒْشن نتَّاث ثقّن غَار ورْيَاز نّس مڒَا يدَّر. وَلَكِن مڒَا يمُّوْث، نتَّاث غَارس ڒْحَقّ اَذ تمْڒش اَك ونِّي ثْخس نتَّاث مڒَا نتَّا ذ ڒْمُوْمن زِي سِيذِيثْنغ. 40وَلَكِن مَامّش تْوَاڒِيغ نش، أَذ تْفَرح كْتَار مڒَا ثقِّيم مَامّش ثدْجَا. وَاه، تْفكَّرغ بلِّي ؤُڒَا ذ نش اَكِذِي اَرُّوْح ن أَربِّـي ذِي مَانَايَا.
Currently Selected:
1 أيث-كورينث 7: ريف
Highlight
Share
Copy
Want to have your highlights saved across all your devices? Sign up or sign in
