ಅಪೊ.ಕ್ರಿ 20

ಪೌಲು ಮಕೆದೋನ್ಯೊಡು ಬೊಕ್ಕ ಗ್ರೀಕ್ ದೇಶೊಡು

1ಗಲಾಟೆ ಉಂತಿ ಬೊಕ್ಕ ಪೌಲು ಶಿಷ್ಯೆರೆನ್ ಲೆಪುಡಾದ್ ಧೈರ್ಯ ಪಂಡ್ದ್ ಅಕ್ಲೆನ ಒಪ್ಪಿಗೆ ದೆತ್ತೊಂದು ಮಕೆದೋನ್ಯೊಗು ಪಿದಾಡಿಯೆ. 2ಆ ದೇಶೊಡು ಪ್ರಯಾಣ ಮಲ್ತ್‌ದ್ ಅಲ್ತಕಲೆನ್ ದಿಂಜ ಪಾತೆರೊಲೆಡ್ದ್ ಧೈರ್ಯ ಪಡೆಪಾದ್ ಗ್ರೀಕ್#20:2 ಗ್ರೀಕ್ ಪ್ರದೇಶೊಗು ಅಖಾಯ ಪಂಡ್‌ದುಂಡು. ದೇಶೊಗು ಬತ್ತೆ. 3ಅಲ್ಪ ಮೂಜಿ ತಿಂಗೊಲು ಇತ್ತೆ. ಬೊಕ್ಕ ಸುರಿಯ ಪ್ರದೇಶೊಗು ಕಡಲ್ ಸಾದಿ ಆದ್ ಪೋವೊಡು ಪಂಡ್ದುಪ್ಪುನಗ ಆಯಗ್ ವಿರೋಧಾದ್ ಯೆಹೂದ್ಯೆರೆಡ್ ಕುತಂತ್ರ ಆಂಡ್. ಅಂಚಾಯಿನೆಡ್ದ್ ಆಯೆ ಮಕೆದೋನ್ಯೊಗು ಪಿರ ಪೋವರೆ ಆಲೋಚನೆ ಮಲ್ತೆ. 4ಕೆಲವು ಜನೊಕುಲು ಪೌಲು ಒಟ್ಟುಗು ಇತ್ತೆರ್. ಅಕುಲು ಏರ್ ಪಂಡ ಪುರ್ರನ ಮಗೆ ಆಯಿ ಬೆರೋಯ ಪಟ್ಟಣದ ಸೋಪತ್ರೆಲಾ ಥೆಸ್ಸಲೋನಿಕದ ಅರಿಸ್ತಾರ್ಕೆಲಾ ಸೆಕುಂದೆಲಾ ದೆರ್ಬೆ ಊರುಡ್ದು ಗಾಯೆಲಾ ತಿಮೋಥಿಲಾ ಆಸ್ಯೊಡ್ದು ತುಖಿಕೆಲಾ ತ್ರೋಫಿಮೆಲಾ ಆಯನ ಒಟ್ಟುಗು ಪೋಯೆರ್. 5ಮೊಕುಲು ನಮಡ್ದ್ ದುಂಬೇ ಪೋದು ಎಂಕ್ಲೆಗಾದ್ ತ್ರೋವೊಡು ಕಾತ್ ಕುಲ್ಲುದಿತ್ತೆರ್. 6ಪುಳಿದಾಂತಿನ ರೊಟ್ಟಿದ ಪರ್ಬದ ದಿನ ಆಯಿ ಬೊಕ್ಕ ಫಿಲಿಪ್ಪಿಡ್ದ್ ಪಿದಾಡ್ದ್ ಕಪ್ಪಲ್‌ಡ್ ಐನ್ ದಿನದ ಪ್ರಯಾಣ ಮಲ್ತ್‌ದ್ ತ್ರೋವೊಗು ಬತ್ತ್‌ದ್ ಅಕ್ಲೆನ್ ಸೇರೊಂಡ. ಅಲ್ಪ ಏಳ್ ದಿನ ಇತ್ತ.

ಪೌಲು ತ್ರೋವೊಡು

7ವಾರದ ಸುರುತ್ತ ದಿನೊಟು ಎಂಕುಲು ರೊಟ್ಟಿ ಪೊಲ್ಪುನ ಆಚಾರೊಗಾದ್ ಸೇರ್ದಿತ್ತ. ಪೌಲು ಸಭೆಕ್ ಸೇರ್ದ್ ಬೈದಿನ ಜನೊಕುಲೆಗ್ ಮದ್ಯ ರಾತ್ರೆ ಮುಟ್ಟ ಪ್ರಸಂಗ ಮಲ್ತಿನಿ ದಾಯೆ ಪಂಡ ಮನದಾನಿ ಅಲ್ತ್‌ಡ್ದ್ ಪಿದಾಡ್ದ್ ಪೋವೊಡು ಅಂದ್‌ದ್ ಆಲೋಚನೆ ಮಲ್ತ್‌ದಿತ್ತೆ. 8ಎಂಕುಲು ಸೇರ್ದಿನ ಉಪ್ಪರಿಗೆಡ್ ಸುಮಾರ್ ತುಡರ್‌ಲು ಇತ್ತ್ಂಡ್. 9ಯೂತುಕೆ ಪನ್ಪಿ ಒರಿ ಜವನ್ಯೆ ಕಂಡಿಡ್ ಕುಲ್ಲೊಂದು ಜೋರು ನಿದ್ರೆದ ಅಮಲ್‌ಡ್ ಇತ್ತೆ, ಪೌಲು ನನಲಾ ಪ್ರಸಂಗ ಮಲ್ತೊಂದುಪ್ಪುನಗ ನಿದ್ರೆದ ಅಮಲ್ ಹೆಚ್ಚಾದ್ ಮೂಜನೇ ಮಾಳಿಗೆಡ್ದ್ ನೆಲಕ್ ಬೂರಿಯೆ. 10ಆಯನ್ ತೂನಗ ಸೈತ್ ಪೋದಿತ್ತೆ. ಆಂಡ ಪೌಲು ಜತ್ತ್‌ದ್ ಪೋದು ಆಯನ ಮಿತ್ತ್ ಬೂರ್ದು ಅರ್ಂಟ್ ಪತ್ತ್‌ದ್, “ಚಿಂತೆ ಮಲ್ಪಡೆ, ಆಯೆ ಜೀವೊಡು ಉಲ್ಲೆ,” ಅಂದ್‌ದ್ ಪಂಡೆ. 11ಬೊಕ್ಕ ಆಯೆ ಮಿತ್ತ್ ಪೋದು ರೊಟ್ಟಿ ತುಂಡು ಮಲ್ತ್‌ದ್ ವಣಸ್ ಮಲ್ತ್‌ದ್ ಪುಲ್ಯ ಮುಟ್ಟ ಪಾತೆರಿ ಬೊಕ್ಕ ಪಿದಾಡ್ದ್ ಪೋಯೆ. 12ಅಕುಲು ಜೀವಾದ್ ಬತ್ತಿನ ಜವನ್ಯನ್ ಲೆತ್ತೊಂದು ಬನ್ನಗ ಅಕ್ಲೆಗ್ ದಿಂಜ ಸಮಾಧಾನ ಆಂಡ್.

ಪೌಲು ತ್ರೋವೊಡ್ದು ಮಿತುಲೇನೆಗ್ ಪೋಪಿನವು

13ಬೊಕ್ಕ ಎಂಕುಲು ದುಂಬು ಕಪ್ಪಲ್ ಮಿತ್ತಾದ್ ಅಸ್ಸೊಸುಗು ಪೋದು ಅವುಲು ಪೌಲುನು ಸೇರಾವೊನುಡು ಅಂದ್‌ದ್ ಇತ್ತ. ಪೌಲು ತಾನ್ ನಡತೊಂದು ಪೋಯೆರೆ ಮನಸ್ ಇತ್ತಿನೆಡ್ದ್ ಇಂಚೆನೆ ಎಂಕ್ಲೆಗ್ ಅಪ್ಪಣೆ ಕೊರಿಯೆ. 14ಅಸ್ಸೊಸುಡು ಆಯೆ ಎಂಕ್ಲೆಗ್ ತಿಕ್ಕಿನಪಗ ಆಯನ್ ಲೆತ್ತೊಂದು ಮಿತುಲೇನೆಗ್ ಬತ್ತ. 15ಅಲ್ತ್‌ಡ್ದ್ ಪಿದಾಡ್ದ್ ಮನದಾನಿ ಖೀಯೊಸ್ ದ್ವೀಪದ ಕೈತಲ್‌ ಇತ್ತಿನ ಜಾಗ್‌ಗ್ ಬತ್ತ. ಐತ ಮನದಾನಿ ಸಾಮೊಸು ಕೈತಲ್ ಬತ್ತ. ಐತ ಮನದಾನಿ ಮಿಲೇತ್‌ಗ್ ಸೇರಿಯ. 16ಪೌಲು ತನ್ಕ್ ಸಾದ್ಯ ಆಂಡ ಪಂಚಾಶತಮ ದಿನತ ಪರ್ಬೊಗು ಯೆರೂಸಲೇಮುಡು ಉಪ್ಪೊಡು ಅಂದ್‌ದ್ ಅಮಸರ ಮಲ್ತೊಂದು ಇತ್ತಿನೆಡ್ದ್ ಆಸ್ಯ ಪ್ರದೇಶೊಡು ಉಪ್ಪೆರೆ ಮನಸ್‌ದಾಂತೆ ಎಫೆಸ ಊರುನು ದಾಂಟ್‌ದ್ ಪೋವೊಡು ಅಂದ್‌ದ್ ತೀರ್ಮಾನ ಮಲ್ತೆ.

ಎಫೆಸೊಡು ಕಡೆತ ಬುದ್ಧಿ ಪಾತೆರ

17ಆಯೆ ಮಿಲೇತುಡ್ದು ಎಫೆಸೊಗು ಜನ ಕಡಪುಡ್ದು ಅಲ್ತ ಸಭೆತ ಹಿರಿಯೆರೆನ್ ಲೆಪ್ಪುಡಾಯೆ. 18ಅಕುಲು ಆಯನ ಕೈತಲ್‌ ಬತ್ತಿನಪಗ ಅಕ್ಲೆಗ್ ಆಯೆ ಪಂಡಿನಿ, “ಯಾನ್ ಆಸ್ಯ ಪ್ರದೇಶೊಡು ಸುರುತ್ತ ದಿನೊಡ್ದಿಂಚಿ ನಿಕ್ಲೆನ ನಡುಟು ಮಾತ ಸಮಯೊಡು ಎಂಚ ಇತ್ತೆ ಪನ್ಪಿನೆನ್ ನಿಕುಲೇ ತೆರಿದರ್. 19ಯಾನ್ ಬಾರಿ ತಗ್ಗ್‌ತನೊಡ್ದು ಕಣ್ಣೀರ್ ಪಾಡ್ದ್ ಕರ್ತವ ಚಾಕ್ರಿ ಮಲ್ತೊಂದಿತ್ತೆ. ಯೆಹೂದ್ಯೆರೆನ ಕುತಂತ್ರೊಡ್ದು ಆದುಪ್ಪುನ ಭಂಗೊನು ತಾಳೊಂದಿತ್ತೆ; 20ಯಾನ್ ನಿಕ್ಲೆಗ್ ಉಪಯೋಗ ಆಪಿನ ಮಾತೆನ್ ಜನೊಕುಲೆನ ಎದುರುಲಾ ಇಲ್ಲ್ ಇಲ್ಲಡ್ಲಾ ಬೋಧನೆ ಮಲ್ಪುನೆಡ್ದ್ ಪಿರ ಜಾರ್ದಿಜಿ. 21ಯೆಹೂದ್ಯೆರೆಗ್ಲಾ ಗ್ರೀಕೆರೆಗ್ಲಾ ಪಶ್ಚಾತಾಪ ಪಡೆದ್ ದೇವೆರೆನ ಕೈತಲ್‌ ತಿರ್ಗೊಡು, ನಮ ಕರ್ತವೆ ಆದುಪ್ಪು ಯೇಸುನ ಮಿತ್ತ್ ನಂಬಿಕೆ ದೀವೊಡು ಅಂದ್‌ದ್ ಸಾಕ್ಷಿ ಕೊರಿಯೆ; ಉಂದು ಮಾತ ನಿಕ್ಲೆಗೇ ತೆರಿದ್‌ಂಡ್. 22ಇಂದಾ, ಯಾನ್ ಇತ್ತೆ ಆತ್ಮೊಗು ತಗ್ಗ್‌ದ್ ಯೆರೂಸಲೇಮುಗು ಪೋಪೆ. ಅಲ್ಪ ಬರ್ಪಿನ ಕಷ್ಟ ಎಂಕ್ ಗೊತ್ತಿಜ್ಜಿ. 23ನಿಕ್ಕ್ ಕೋಳಲಾ ಸಂಕಟಲಾ ಮಾತ ಪಟ್ಟಣೊಲೆಡ್ ಕಾತೊಂದುಂಡು ಅಂದ್‌ದ್ ಪರಿಶುದ್ಧಾತ್ಮೆ ಸಾಕ್ಷಿ ಕೊರ್ಪಿನ ಈತ್ ಮಾತ್ರ ತೆರಿದೆ. 24ಆಂಡ ಯಾನ್ ಎನ ಸ್ವಂತ ಜೀವದ ಸಂಗತಿಡ್ ಚಿಂತೆ ಮಲ್ಪುಜಿ. ದೇವೆರೆನ ದಯತ ಸುವಾರ್ತೆದ ಸಂಗತಿಡ್ ಸಾಕ್ಷಿ ಕೊರ್ಪಿನವೇ ಎನ ಬೇಲೆ ಆದುಂಡು. ಕರ್ತವೆ ಆದುಪ್ಪು ಯೇಸುಡ್ದು ತಿಕ್ಕಿ ಸೇವೆನ್ ಸಂತೋಷೊಡು ಪೂರೈಸುನವೇ ಎನ ಆಸೆ ಆದುಂಡು.

25“ಇಂದಾ, ಈತ್ ದಿನ ನಿಕ್ಲೆಡೊಪ್ಪ ಪ್ರಯಾಣ ಮಲ್ತ್‌ದ್ ದೇವೆರೆ ರಾಜ್ಯೊನು ಸಾರಿನಾಯೆ ಆದುಪ್ಪು ಎನ ಮೋನೆನ್ ನನ ಮಿತ್ತ್ ನಿಕುಲು ಒರಿಲಾ ತೂವಯರ್ ಅಂದ್‌ದ್ ತೆರಿದೆ. 26ಆ ಕಾರಣೊಡ್ದು ಯಾನ್ ಈ ಪೊರ್ತು ಪ್ರಮಾಣ ಮಲ್ತ್‌ದ್ ಪನ್ಪೆ, ಯಾನ್ ಮಾತೆರೆ ನೆತ್ತೆರ್‌ಡ್ ಶುದ್ಧದಾಯೆ ಪಂಡ್ದ್ ಇನಿತ ದಿನೊಟು ಸಾಕ್ಷಿ ಪನ್ಪೆ. ನಿಕ್ಲೆಡ ಏರಾಂಡಲಾ ನಾಶಾದ್ ಪೋಂಡ ಅವು ಎನ ಜವಾಬ್ದಾರಿ ಅತ್ತ್, 27ದಾಯೆಗಂದ್ಂಡ ಒಂಜೆನ್ಲಾ ಮದೆಮಲ್ಪಂದೆ ದೇವೆರೆ ಚಿತ್ತೊಲೆನ್ ಪೂರ ನಿಕ್ಲೆಗ್ ತೆರಿಪಾಯೆ. 28ದೇವೆರ್ ಸ್ವಂತ ನೆತ್ತೆರೆಡ್ದ್ ಪಡೆವೊಂದಿನ ಸಭೆಕ್ ನಿಕುಲು ಕುರುಬೆರಾದ್ ಉಲ್ಲರ್. ಐಡ್ದಾವರ ನಿಕ್ಲೆನ ಸಂಗತಿಡ್ಲಾ ಪರಿಶುದ್ಧಾತ್ಮೆ ನಿಕ್ಲೆನ ಪಾಲನೆ ವೈಸೊಂದಿನ ಪುಂಡುದ ಸಂಗತಿಡ್ಲಾ ಮಸ್ತ್ ಎಚ್ಚರಿಕೆಡ್ ಉಪ್ಪುಲೆ. 29ಯಾನ್ ಪೋಯಿ ಬೊಕ್ಕ ಚೆನ್ನನಾಯಿಲು ನಿಕ್ಲೆ ಉಲಯಿ ಬರ್ಪುಂಡು ಅಂದ್‌ದ್ ಯಾನ್ ತೆರಿದೆ. ಅವು ಪುಂಡುನು ನಾಶ ಮಲ್ಪಂದೆ ಬುಡ್ಪುಜಿ. 30ನಿಕ್ಲೆಡ ಕೆಲೆವೆರ್ ಸುಳ್ಳು ಬೋಧನೆ ಮಲ್ತ್‌ದ್ ಶಿಷ್ಯೆರೆನ್ ತನ್ಕುಲೆ ಪಿರವು ಒಯ್ತೊನುವೆರ್. 31ಅಂಚಾಯಿನೆಡ್ದ್ ಎಚ್ಚರಿಕೆಡ್ ಉಪ್ಪುಲೆ! ಯಾನ್ ಮೂಜಿ ವರ್ಸ ನಿಕ್ಲೆ ಒಟ್ಟುಗು ಇತ್ತೆ. ಯಾನ್ ರಾತ್ರೆ ಪಗೆಲ್ ಬೋಧನೆ ಮಲ್ತೊಂದು ನಿಕ್ಲೆಗಾದ್ ಕಣ್ಣೀರ್ ಜಪುಡಾವೊಂದು ನಿಕ್ಲೆಗ್ ಎಚ್ಚರಿಕೆ ಕೊರೊಂದು ಇತ್ತಿನೆನ್ ಮದತ್ ಬುಡಡೆ.

32“ಯಾನ್ ಇತ್ತೆ ನಿಕ್ಲೆನ್ ದೇವೆರೆಗ್ಲಾ ಆಯನ ದಯತ ಪಾತೆರೊಗ್ಲಾ ಒಚ್ಚಿದ್ ಕೊರ್ಪೆ. ಆಯೆ ನಿಕ್ಲೆನ್ ಬಲ ಪಡೆಪಾದ್, ಪರಿಶುದ್ಧ ಆದುಪ್ಪು ಮಾತೆರೆಡೊಪ್ಪ ನಿಕ್ಲೆನ್ ಬಾಧ್ಯಸ್ತಿಗೆ ಕೊರಿಯೆರೆ ಶಕ್ತಿ ಇತ್ತಿನಾಯೆ ಆದುಲ್ಲೆ. 33ಯಾನ್ ಏರೆನಲಾ ಬೊಳ್ಳಿ ಬಂಗಾರೊನಾವಡ್ ಅಂಗಿ ಕುಂಟುಲೆಗಾವಡ್ ಆಸೆ ಮಲ್ತ್‌ದಿಜಿ. 34ಈ ಕೈಬೇಲೆ ಮಲ್ತ್‌ದ್ ಎನ ಕೊರತೆನ್ಲಾ ಎನಡೊಪ್ಪ ಉಪ್ಪುನಾಕುಲೆನ ಕೊರತೆನ್ಲಾ ಉಪ್ಪಂದಿಲೆಕ್ಕ ಮಲ್ತಿನೆನ್ ನಿಕುಲು ನಿಕುಲಾದೇ ತೆರಿದುಲ್ಲರ್, 35ಮಾತ ವಿಚಾರೊಡು ಯಾನ್ ನಿಕ್ಲೆಗ್ ಮಾದ್ರಿ ತೋಜಾದೆ. ಎಂಕುಲುಲಾ ಅಂಚೆನೇ ಬೆಂದ್‌ದ್ ಬಲಹೀನೆರೆಗ್ ಉಪಕಾರ ಮಲ್ಪೊಡು, ‘ಬೊಕ್ಕ ದೆತ್ತೊನುನೆಡ್ದ್ ಕೊರ್ಪಿನವೇ ಮಲ್ಲ ಭಾಗ್ಯ,’ ಅಂದ್‌ದ್ ಕರ್ತವೆ ಯೇಸು ತಾನೇ ಪಂಡಿ ಪಾತೆರೊಲೆನ್ ನೆನೆಪುಡು ದೀವೊಂದುಪ್ಪೊಡು,” ಪಂಡೆ.

36ಆಯೆ ಈ ಪಾತೆರೊಲೆನ್ ಪಂಡಿ ಬೊಕ್ಕ ಮುಂಡುಬೂರ್ದು ಅಕ್ಲೆಡೊಪ್ಪ ಪ್ರಾರ್ಥನೆ ಮಲ್ತೆ, 37-38ಅಪಗ ಅಕುಲು ಮಾತೆರ್ಲಾ ದಿಂಜ ಬುಲ್ತೆರ್. ನಿಕುಲು ನನ ಎನ ಮೋನೆನ್ ತೂಪುಜರ್ ಅಂದ್‌ದ್ ಪೌಲು ಪಂಡಿನ ಪಾತೆರೊಗು ಅಕುಲು ದಿಂಜ ದುಃಖೊಡು ಆಯನ ಕೆಕ್ಕಿಲ್‌ನ್ ಅರ್ಂಟ್ ಪತ್ತ್‌ದ್ ಆಯಗ್ ಮುತ್ತು ಕೊರಿಯೆರ್. ಐಡ್ದ್ ಬೊಕ್ಕ ಅಕುಲು ಆಯಡೊಪ್ಪ ಪೋದು ಆಯನ್ ಕಪ್ಪಲ್‌ಡ್ ಕಡಪುಡ್ದು ಬುಡಿಯೆರ್.

Currently Selected:

ಅಪೊ.ಕ್ರಿ 20: ತುಳು

Highlight

Copy