2 ಕೊರಿಂಥ್ಯೆರೆಗ್ 9
9
ದೇವಜನೊಕುಲೆಗ್ ಕಾಣಿಕೆ
1ದೇವಜನೊಕುಲೆಗಾದ್ ಕಾಣಿಕೆ ಕೂಡಾವುನ ಸೇವೆದ ಸಂಗತಿಡ್ ಯಾನ್ ನಿಕ್ಲೆಗ್ ಬರೆಪಿನ ಅಗತ್ಯ ಇಜ್ಜಿ. 2ನಿಕುಲು ಸಹಾಯ ಮಲ್ಪೆರೆ ತಯಾರ್ ಆದುಲ್ಲರಂದ್‌ದ್ ಎಂಕ್ ತೆರಿದುಂಡು. ಒಂಜಿ ವರ್ಸದ ಪಿರವು ಅಖಾಯೊಡುಪ್ಪು ನಿಕುಲು ಸಹಾಯ ಮಲ್ಪೆರೆ ತಯಾರಾದುಲ್ಲರ್ ಅಂದ್‌ದ್ ಯಾನ್ ಮಕೆದೋನ್ಯದಾಕುಲೆ ಎದುರುಡು ನಿಕ್ಲೆನ್ ಪುಗರೊಂದುಲ್ಲೆ. ನಿಕ್ಲೆನ ಆಸಕ್ತಿ ಅಕ್ಲೆಡ್ ಮಸ್ತ್ ಜನೊಕುಲೆಗ್ ಉಮೇದ್ ಕೊರ್ತುಂಡು. 3ಆಂಡಲಾ ಯಾನ್ ನಿಕ್ಲೆನ್ ಪುಗರಿನ ಪೊಕ್ಕಡೆ ಆವಂದೆ, ಯಾನ್ ನಿಕ್ಲೆಗ್ ಪಂಡಿಲೆಕ್ಕ ನಿಕ್ಲೆನ ಕಾಣಿಕೆ ತಯಾರಾದುಪ್ಪೊಡು ಅಂದ್‌ದ್ ಯಾನ್ ಆ ಸಹೋದ್ರೆರೆನ್ ಕಡುಪುಡುದು ಕೊರಿಯೆ. 4ಇಜ್ಜಾಂಡ ಒಂಜಿ ವೇಳೆ ಮಕೆದೋನ್ಯದಾಕುಲು ಎನಡೊಪ್ಪ ಬನ್ನಗ ನಿಕ್ಲೆನ ಕಾಣಿಕೆ ತಯಾರಾದುಪ್ಪಂದಿನೆನ್ ತೂಯೆರ್ಡ ಎಂಕುಲು ನಿಕ್ಲೆನ ಮಿತ್ತ್ ಇಂಚಿನ ಭರವಸೆ ದೀಯಿನೆಡ್ದ್ ಎಂಕ್ಲೆಗ್ ನಾಚಿಗೆ ಆವು ಅಂಚೆನೆ ನಿಕ್ಲೆಗ್ಲಾ ನಾಚಿಗೆ ಆವು. 5ಅಂಚಾಯಿನೆಡ್ದ್ ಈ ಸಹೋದ್ರರೆನ್ ದುಂಬತ್ತ ನಿಕ್ಲೆನಡೆಗ್ ಬತ್ತ್‌ದ್ ನಿಕುಲು ಸುರುಟ್ಟೆ ವಾಗ್ದಾನ ಮಲ್ತಿನ ಕಾಣಿಕೆನ್ ತಯಾರ್ ಮಲ್ಪೆರೆ ನಿಕ್ಲೆಗ್ ಸಹಾಯ ಮಲ್ಪುಲೆಕ್ಕ ಅಕ್ಲೆನ್ ಒತ್ತಾಯ ಮಲ್ಪುನವು ಅವಶ್ಯ ಅಂದ್‌ದ್ ಯಾನ್ ಎನ್ನಿಯೆ. ಅಂಚ ಈ ಕಾಣಿಕೆ ಸುಲಿಗೆ ಅಂದ್‌ದ್ ಆವಂದೆ, ಅವು ಮನಪೂರ್ವಕದ ಕಾಣಿಕೆ ಪಂಡ್ದಾಪುಂಡು.
6ಆಂಡ ಉಂದೆನ್ ಪನ್ಪೆ, ಒಂತೆನ್ ಬಿತ್ತುನಾಯೆ ಒಂತೆನೇ ಕೊಯ್ಪೆ; ದಿಂಜ ಬಿತ್ತುನಾಯೆ ದಿಂಜನೇ ಕೊಯ್ಪೆ. 7ಪ್ರತಿ ಒರಿಲಾ ಅಕ್ಲೆ ಅಕ್ಲೆ ಉಡಲ್‌ಡ್ ನಿಚ್ಚಯ ಮಲ್ತೊನಿಲೆಕ್ಕನೇ ಕೊರಡ್. ಏರ್ಲಾ ಒತ್ತಾಯಡಾವಡ್ ದುಃಖೊಡು ಆವಡ್ ಕೊರಿಯೆರೆ ಬಲ್ಲಿ; ದಾಯೆ ಪಂಡ ಸಂತೋಷೊಡು ಕೊರ್ಪಿನಾಯನ್ ದೇವೆರ್ ಪ್ರೀತಿ ಮಲ್ಪುವೆ. 8ನಿಕುಲು ಏಪಲಾ ಮಾತೆಟ್ಲಾ ಸಮೃದ್ಧಿದಾಕುಲಾದಿತ್ತ್‌ದ್ ಮಾತ ಎಡ್ಡೆ ಕಾರ್ಯೊಲೆಗ್ ಧಾರಾಳವಾದ್ ಕೊರಿಯೆರೆ ಆಪಿಲೆಕ್ಕ ದೇವೆರ್ ನಿಕ್ಲೆಗ್ ಮಾತ ದಯೊನು ತೋಜಾವೆ.
9“ಆಯೆ ಬಡವೆರೆಗ್ ಮಿತಿ ಮೀರ್‌ದ್ ಕೊರಿಯೆ. ಆಯನ ನೀತಿ ಏನಿತ್ಯೇನಿಗ್ಲಾ ಒರಿಯುಂಡು.” ಅಂದ್‌ದ್ ಶಾಸ್ತ್ರೊಡು ಬರೆತ್ಂಡತ್ತಾ?
10ದೇವೆರ್ ಬಿತ್ತುನಾಯಗ್ ಬಿತ್ತ್‌ಲಾ, ತಿನ್ಪಿನಾಯಗ್ ನುಪ್ಪುಲಾ ಕೊರ್ದು ಅಂಚೆನೇ ನಿಕ್ಲೆಗ್ ಬಿತ್ತೆರೆ ಬಿತ್ತ್‌ನ್ ಕೊರ್ದು ಅವೆನ್ ಹೆಚ್ಚ್ ಮಲ್ತ್‌ದ್ ನಿಕ್ಲೆ ನೀತಿದ ಫಲ ಹೆಚ್ಚಾಪಿಲೆಕ್ಕ ಮಲ್ಪುವೆ. 11ಇಂಚಾದ್ ನಿಕುಲು ಮಾತ ಸಂಗತಿಡ್ಲಾ ಐಶ್ವರ್ಯವಂತೆರಾದ್ ಉದಾರಾದ್ ಕೊರಿಯೆರೆಗ್ ಶಕ್ತೆರಾಪರ್. ಉಂದತ್ತಂದೆ ನಿಕ್ಲೆ ಕಾಣಿಕೆಲು ಎಂಕ್ಲೆಡ್ದ್ ಬೇತೆಕ್ಲೆಗ್ ತಿಕ್ಕ್‌ನಗ, ಅವು ದೇವೆರೆಗ್ ಉಪಕಾರ ಸ್ತುತಿ ಉಂಡು ಮಲ್ಪುಂಡು. 12ಈ ದಾನದ ಸೇವೆಡ್ದಾದ್ ದೇವಜನೊಕುಲೆ ಕೊರತೆ ಕಡಿಮೆ ಆಪುಂಡು. ಅವತ್ತಂದೆ ದೇವೆರೆಗ್ ಮಸ್ತ್ ಉಪಕಾರ ಸ್ತುತಿ ಸಂದಾಯೆರೆ ಕಾರಣ ಆಪುಂಡು. 13ನಿಕುಲು ಮಲ್ತ್‌ದಿನ ಸಹಾಯೊಡ್ದು ನಿಕ್ಲೆನ ಯೋಗ್ಯಭಾವೊನು ಜನೊಕುಲು ತೂನಗ, ನಿಕುಲು ಮಲ್ತ್‌ದಿನ ಕ್ರಿಯೆಗ್ ಸರಿಯಾದ್, ಕ್ರಿಸ್ತನ ಸುವಾರ್ತೆನ್ ಕೈಕೊನುನೆಡ್ದ್‌ಲಾ ಅಕ್ಲೆಗ್ಲಾ ಬೊಕ್ಕ ಮಾತೆರೆಗ್ಲಾ ನಿಕುಲು ಉದಾರಾದ್ ಸಹಾಯ ಮಲ್ಪುನೆಡ್ದ್‌ಲಾ ದೇವೆರೆಗ್ ಮೈಮೆ ಸಂದಾವರ್. 14ಉಂದತ್ತಂದೆ ನಿಕ್ಲೆಗ್ ದೇವೆರ್ ಕೊರ್ತಿನ ವಿಶೇಷ ದಯೊಡ್ದು ಅಕುಲು ನಿಕ್ಲೆನ್ ಉಡಲ್‌ಡ್ದ್ ಬಯಕೊಂದು ನಿಕ್ಲೆಗಾದ್ ದೇವೆರೆಡ ಪ್ರಾರ್ಥನೆ ಮಲ್ಪುವೆರ್. 15ಪನಿಯೆರೆ ತೀರಂದಿನ ವರೊಕ್ಲೆಗಾದ್ ದೇವೆರೆಗ್ ಉಪಕಾರ.
Currently Selected:
2 ಕೊರಿಂಥ್ಯೆರೆಗ್ 9: ತುಳು
Highlight
Share
Copy
Want to have your highlights saved across all your devices? Sign up or sign in
New Life Literature
