2 थिसलूनिकी 3
3
म्हारै ताँई बी अरदास कर्या करो
1मेरा लाडला बिस्वास्यो, आखीर म, म्हें एकोर बात थारूँ चावां हां क थे करो, म्हारै ताँई बी अरदास कर्या करो, जिऊँ परबु को चोखो समचार जंय्यां थारै बिचमै फेल्यो हो बंय्यांई तावळो ओर मिनखा म बी फेलै अर आदरमान पावै। 2अरदास कर्या करो क परबु म्हानै बेकार अर बुराई करबाळा मिनखाऊँ बचावै। क्युं क हरेक मिनख परमेसर प बिस्वास कोनी राखै। 3पण परबु बिस्वास जोगो ह। बोई थानै ताकत देसी अर सेतानऊँ बचासी। 4परबु म म्हानै थार प पक्को बिस्वास ह क म्हें थानै जंय्यां करबा ताँई आदेस दिन्यो हो थे बंय्यांई करर्या हो अर करता रेहस्यो। 5परबु थारा हियानै परमेसर का परेमनै समजबा की अर मसी की जंय्यां बरदास करबा की सक्ति देवै।
काम करबा की जबावदारी
6मेरा लाडला बिस्वास्यो, म्हें थानै परबु ईसु मसी म ओ आदेस देवां हां क, हरेक अंय्यां का बिस्वासी भाईड़ाऊँ नाकैई रेहज्यो जखो कामऊँ जी चुरावै ह। अर जखी सीख म्हें बिनै दिनी ह बिकै गेल कोनी चालै। 7थे खुद जाणो हो क थे म्हारी मिसाल प कंय्यां चाल सको हो, क्युं क जद म्हें थारै सागै हा जणा कमारई खाता हा, 8अर कोईकिई फोकट की रोटी कोनी खाई; पण रात-दिन मेनत अर दुख उठार काम-धंधो करता हा, जिऊँ थार प बोज कोनी बण्या। 9अंय्यां करबा क पिछै आ बात कोनी ही क थारै कनैऊँ म्हानै खाबा को हक कोनी हो; पण म्हें चावां हां क थे म्हानै देखर सीखो अर म्हारी जंय्यां जीओ। 10क्युं क जद म्हें थारै सागै हा जणा ओ आदेस दिओ हो क, “ज कोई काम कोनी करै बिनै खाबा ताँई बी मना द्यो।”
11म्हें सुण्या हा क थारै मांयनै क्युंक मिनख सई गेलै कोनी चालै अर काम-धंधो कोनी करै। पण दुसरा का कामा म टांग अड़ावै। 12अंय्यां का मिनखानै परबु ईसु मसी म म्हें आदेस देवां हां अर समजावां हां क, बे हद म रेह्वै अर खुद कमार खावीं। 13ओ मेरा लाडला बिस्वास्यो, थे भला काम करबा ताँई कदैई हिमत मना हारज्यो।
14ज कोई म्हारी इ चिठी म मांडेड़ी बातानै कोनी मानै बापै निगा राखो अर बाका संगराऊँ दूरई रह्यो जिऊँ बाको सीर निचो होज्यावै। 15पण बिनै बेरी मना जाणज्यो, पण सागे भाई-भाण जा'णर चेताओ।
चिठी की आखरी बाता
16परबु जखो खुद स्यांती को दातार ह बो हर टेम थारै सागै रेह्वै अर थारा हर हाल म थानै स्यांती देवै।
17चिठी का इ भाग म, म पोलुस, मेरै खुदका हातऊँ थानै जे मसी मांडूँ हूँ। अर अंय्यां चिठी का आखरी भाग म मेरै हात की लिखावटई तो मेरी चिठ्या की पिछाण ह, क आनै भेजबाळो मई हूँ।
18थारै सगळा प आपणा परबु ईसु मसी की दया होती रेह्वै।
Currently Selected:
2 थिसलूनिकी 3: एस डब्लु वी
Highlight
Share
Copy
Want to have your highlights saved across all your devices? Sign up or sign in
(c) 2010-2017, New Life Computer Institute. All rights reserved
