1 कुरन्थीयो 6

आपसरी का तू-तू मे-मे को निपटारो

1ज थारै मऊँ कोईसाको दुसरा बिस्वासी भाई क सागै मनमुटाव ह। जणा थे बिका सुळजेटा ताँई परमेसर का मिनखा क कनै जाबा की बजाय कचेरी जाबा की हिमत करो हो? 2के थे ओ कोनी जाणो क परमेसर का मिनख जगत का मिनखा को न्याय करसी? परमेसर का मिनख जद सगळा जगत का मिनखा को न्याय करसी जणा आ छोटी-छोटी बाता को सुळजेटो कोनी कर सको के? 3अर थे ओ कोनी जाणो के आपा दुता को न्याय करस्यां? जणा इ जीवन की आ छोटी-छोटी बाता को काँई खेबो? 4ज थारै मांय अंय्यां की बाता होवै जणा थानै अंय्यां का मिनखा क कनै नइ जाणो चाए जाको बिस्वासी मंडळीऊँ कोई लेणदेण कोनी। 5थानै सरम आणी चाए! के साच्याई थारै मालो कोई ज्ञानी मिनख कोनी? जखो थारी तू-तू मे-मे को सुळजेटो कर सकै। 6पण थे जखा बिस्वासी भाई होर एक दुसरा क खिलाप मुकदमो करो हो अर थारी बाता को न्याय बिस्वास नइ करबाळा मिनखा कनै करवार्या हो।

7सचाई तो आ ह क थे आपसरी म एक दुसरा प मुकदमाबाजी करर्या हो जखी थारी हारनै दरसावै ह। इऊँ चोखो तो ओ होवै क थे अन्याय सेल्यो अर थे थारी हानी उठाल्यो। 8पण थे तो खुद अन्याय करो हो अर एक दुसरानै लूटो हो अर दुसरा मसी भाईड़ानै बी!

9के थे पक्काई कोनी जाणो क बुराई करबाळा मिनख परमेसर का राज का वारिस कोनी होसी? बावळा मना बणो! गंदा काम करबाळा, मूरतीपुजा करबाळा, कुकरमी, लुच्चा काम करबाळा अर लुच्चा-लफंगा#6:9 लुच्चा काम करबाळा अर लुच्चा-लफंगा लुच्चा काम करबाळा अ अंय्यां का मोट्यार हीं जखा पिसा लेर एक रांड को सो काम करीं हीं। अर लुच्चा-लफंगा अंय्यां का मोट्यार जानै मोट्यार क सागै रेह्णो चोखो लागै ह।, 10चोर लूटेरा, लालची, दारूखोर्या, भिड़ाबाळा, अर ठग परमेसर का राज का वारिस कोनी होसी। 11अर थारै म बी पेल्या क्युंक मिनख अंय्यां का हा, पण इब थानै परबु ईसु मसी अर परमेसर की पबितर आत्मा क जरिए पापऊँ धोर पबितर कर परमेसर क सागै सई होबा ताँई परमेसरनै सूप दिओ गयो ह।

परबु की मेमा ताँई थारी कायानै काम म ल्यो

12 # 1 कुरन्थी 10:23 कोई खे सकै ह, “मनै सक्यु करबा की छुट ह।” हाँ पण सक्यु थारै ताँई चोखो कोनी। म खे सकूँ हूँ क, “मनै सक्यु करबा की छुट ह” पण म कोई चिज क बस म कोनी। 13खेबत म आवै ह क, “रोटी पेट ताँई अर पेट रोटी ताँई होवै ह” पण परमेसर आ दोन्यानैई नास कर देसी। अर आपणी काया कुकरम करबा ताँई कोनी पण परबु की सेवा करबा ताँई ह। अर काया ताँई परबु बंदोबस्त करै ह। 14परमेसर परबु ईसुनैई जिंदो कोनी कर्यो पण बो आपकी सक्‍तिऊँ आपानै बी ओज्यु जिंदो करसी। 15के थे जाणो हो थारी काया परबु ईसुऊँ जुड़ेड़ी ह? जणा पाछै म आ अंगानै जखा मसी का हीं, आनै रांड का अंग कोनी बणबा द्‌युँ। 16थे कोनी जाणो के जखो मिनख रांड क सागै रेह्‍वै ह बो बिकै सागै एक तन होज्यावै ह? क्युं क पबितर सास्तर म मंडेड़ो ह क, “बे दोन्यु एक काया हो होज्यासी।” 17पण जखो परबु म मगन रेह्‍वै ह बो परबु की आत्मा क सागै एक होज्यावै ह।

18कुकरम मना करो। क्युं क इकै अलावा जत्ता बी पाप मिनख करै ह बो आपकी काया क बारनैऊँ करै। पण जखो मिनख कुकरम करै ह बो आपकी काया क सागै ही पाप करै ह। 19#1 कुरन्थी 3:16; 2 कुरन्थी 6:16अर थे ओ कोनी जणो के थारी काया पबितर आत्मा को मनदर ह आ आत्मा थारै मांयनै रेह्‍वै ह जिनै परमेसर थानै दिओ ह। थे खुदका कोनी हो, पण परमेसर का हो। 20क्युं क परमेसर थारी किमत चुकार थानै मोल लिआ ह। इ ताँई थे थारी कायाऊँ परमेसर की मेमा कर्या करो।

Currently Selected:

1 कुरन्थीयो 6: एस डब्लु वी

Highlight

Copy