Pntuura 21
21
Bgurah Karac ma Bgurah Dxeral
1Taan mu dungal 1 bgurah karac ma bgurah dxeral. Ado wada ka tgplaale karac ma tgplaale dxeral da, uka ka rcilung uri da. 2Taan mu dungal alang mrtaso, bgurah Yerusalem mntuting pneeyah Utux Baro hiya. Mhedu psramal da, mntena weewa mhedu pndpingan ma nii tmara rseno na. 3Mbahang ku paru hrenang pneeyah tluungan, rmengo:
“Tai, ga msuupu meniq ckceka seediq ka kobu Utux Baro!
Heya we mpsuupu meniq dheya,
dheya we mpseediq na.
Utux Baro we mpsuupu dheya.
4Utux Baro we sresun na kana rusuq doriq daha.
Mpkuuka ka hhuqil,
mpkuuka ka tnsdamac, llingis ma, hnlidan mqraqil.
Ado wada kana ka tgplaale na.”
5Rmengo ka ga tleung tluungan: “Tai, wada mu sbgrahun kana da!” Heya we rmengo dungal: “Ptsani isu ka nii, ado kari nii we bale ba snhiyun ma bale ba.” 6Rmengo kenan ka heya dungal: “Mttuku da! Yaku ka Arhwa, yaku ka Umiga. Yaku ka pnrading, yaku ka qnhdean. Qsiya hrean knuudus we tseengan mu mege seediq ga mhqeni. 7So ka wada mbeyax we maha maangal so nii. Yaku we mpuUtux Baro na, heya we mmaha mlaqi mu. 8Quri so dseediq miicu, ini snhii, naqah, phuqil seediq, mmhemuc msuupu, pstuutux naqah, thmuku tikung ma, kana mberiq we, maha psqmaun ckceka rcilung srana puniq ka ngalun daha. Nii we kiya ka tg2 hhuqil.”
Bgurah Yerusalem
9Ckceka 7 snkgulan baro ga dmnoi 7 pngerah ga stenge 7 qnhdean pqrqilan we, niqan 1 rmengo yaku: “Aguh, pqtaun su weewa pstrengun, kiya ka mqedil wawa miric.” 10Pdaun ku Bgihur Utux de, desun ku na 1 dgiyaq paru. Spqita ku na ga hiya ka Utux Baro ma, Yerusalem alang mrtaso mntuting pneeyah baro. 11Alang nii we niqan knledax Utux Baro. Knledax na we mntena so mtumun btunux qrari, mntena so mtumun tqwilaq, lmedax so qrari. 12Alang nii we bbaro ma paru ba ka harac na. Niqan 12 rhengun. Niqan 12 snkgulan Utux Baro ma ga spatis ngayan 12 klegan pnswayan rudan lqlaqi Israel. 13Quri nklaan hido we, niqan 3 rhengun, quri daya we 3 rhengun, quri toma we 3 rhengun, quri pryaxan hido we 3 rhengun. 14Harac alang we niqan 12 pusu na. 12 pusu nii we niqan ngayan snkgulan wawa miric.
15Kiya ka snkgulan baro ga rmengo kenan we, ga dmoi seengan snmalu king brhengil. Mpseung alang, rhengun ma, harac alang. 164 muxi alang we, mntena ka qndisan na ma knuglahang na. Snkgulan baro we dmoi brhengil ssengun na ka alang kiya. Kiya de 1 mang 20'00 stati. Mntena ka qndisan, knuglahang ma, knbbaro na. 17Kiya de seengun na ka harac. Spooda na sseung seediq smeung snkgulan baro nii. Kiya de 1'44 sese bbaro. 18Harac we snmalu mtumun mgqliyang. Alang we snmalu bale ba king mntena so gagi knsleexan ledax na. 19Kana pusu harac qnalang alang we ga pdpingan lmlamu btunux qrari. Tgkingal pusu we mtumun mgqliyang. Tg2 we btunux mtlawa, tg3 we mtumun rako mgsama, tg4 we btunux mpadiq, 20tg5 we btunux rako mtanah, tg6 we btunux mtanah, tg7 we btunux mhada, tg8 we mtumun sklhagan mgsama, tg9 we mtumun mgceyas, tg10 we mtumun mgsama, tg11 we mtumun rako mgsarung, tg12 we qrari mkdiyuc. 2112 rhengun we kiya ka 12 mtumun bhege, knkingal rhengun we snmalu 1 mtumun bhege. Elu alang we bale ba king mntena gagi knslexan na.
22Ini mu qtai alang hiya ka Sapah Mrtaso Thmkuwan. Ado Bukung, Utux Baro Mdoi Kana Beyax we wawa miric we kika Sapah Mrtaso Thmkuwan hiya. 23Alang nii we ani uka ka hido ma idas pledax hyaan, ado knledax Utux Baro ka ledax na, wawa miric ka camo na. 24Mpkesa ckceka ledax alang nii ka kana seediq qnlhangan. Dqbsuran paru dxeral we maha daha sbege alang kiya ka knledax daha. 25Diyan we ini lebi klaali ka rhengun na, ado mpuuka hiya ka keeman. 26Seediq we sbege na alang kiya ka knledax ma pnspruwan. 27Kana ini kbhege, meepah naqah ma, moda mberiq we, uxe mpteme alang kiya. Wano ga spatis patis knuudus wawa miric we kiya ka mpteme hiya.
Currently Selected:
Pntuura 21: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
