Spegan 32
32
Pnswayan Rudan Meniq Gnklaan Hido yayung Yarden
(Meg 3:12-22)
1Egu riyung ka tnbugan lqlaqi laqi Reuben ma Gad. Qtaan daha ka dxeral Yajer ma Gilad. Tai! Dxeral malu riyung tbugan tnbugan ka nii. 2Kiya de meyah Moseh, Elajar msapuh hiya ka dmpdudul kana seediq hiya ka lqlaqi laqi Reuben ma Gad. Rmengo: 3“Dxeral Atarot, Dibon, Yajer, Nimrah, Xesbon, Elaleh, Sebam, Nebo ma Beon we, 4kiya ka dxeral nsaan ta mangal mccebu meniq berah Utux Tmninun ma seediq Israel we, malu ngalun tmabu tnbugan kiya. Kiya de maha niqan tnbugan ka tnqliyan su uri da.” 5Rmengo dungal: “Nasi miyan mangal huwe meniq berah su, braho su bale biqi kenan ka dxeral nii. Iya miyan skguli ptaril hmrinas yayung Yarden ka yami.”
6Rmengo lqlaqi laqi Gad ma Reuben ka Moseh: “Mmaha mccebu ka dmtswai namu we, meeniq namu hini ka yamu peni? 7Hmuwa, ma namu pkuuwic lnglungan dseediq Israel ka yamu, ini namu osa mtaril ma uxe namu mpremux dxeral bnege Utux Tmninun kiya peni? 8Smnkagul ku rudan namu pneeyah Qades Barnea mnosa qmita dxeral kiya ciida we, so kiya ka dheya uri. 9Mnosa dehuk ayu Eskol qmnita dxeral kiya de, wada moda pskuuwic lnglungan dseediq Israel uri ma, ini sruwa mremux dxeral bnege Utux Tmninun. 10Ali ciida, mseang bale ka Utux Tmninun ma, smdehu rmengo: 11‘Kana hmrinas 20 knkawas na pneeyah Micrayim we, uxe mpqita dxeral sntangan mu Abraham, Yijxaq ma, Yakobu ka dheya. Ado wada ini pskingal lhebun daha smnegul kenan ka dheya. 12Wano Kaleb laqi Yepuneh dpusu rudan Qenijiy ma, Yehosua laqi Nun ka mpqita. Ado dheya we pskingal ba lhebun daha smnegul Utux Tmninun.’ 13Seang Utux Tmninun we mquri seediq Israel mseang. Kiya de betaq 40 knkawas tnooda tadus brenux ma, betaq wada mhuqil kana ka naqah seediq mneniq berah Utux Tmninun. 14Tai! Yamu dseediq niqan qnquwan noda nii, gisu namu lmutuc ndaan rdrudan namu ma, mpkrana namu seang Utux Tmninun mquri seediq Israel ka yamu da. 15Nasi namu tbrinah Utux Tmninun ma, ini namu snegul heya de, lixun namu na bobo tadus brenux ka yamu da. So kiya de, ririh yamu ka mphuqil seediq nii da.”
16Mosa smdaling Moseh ka dheya ma, rmengo: “Mksmalu miyan tibu tnbugan ma lualang dlqlaqi hini ka yami. 17Yami we maadis miyan hlmadac meniq miyan berah seediq Israel ma, mpdudul miyan dheya betaq dehuk dxeral kiya. Lqlaqi miyan we meniq alang msdehu hini ma qduriq dseediq gaga meniq hini. 18Uxe miyan meeyah sapah, asi ka betaq mangal dxeral daha ka kana dseediq Israel. 19Uxe miyan maangal pnaasu dxeral hiya ka yami. Ado dxeral miyan we gisu nklaan hido yayung Yarden ka nami.” 20Rmengo dheya ka Moseh: “Nasi namu bale ba mooda so nii ge, nasi namu madis hlmadac namu mosa mccebu meniq berah Utux Tmninun de, 21kana dseediq namu gaga dmoi hlmadac we asi ka mtaril yayung Yarden kana meniq berah Utux Tmninun. Betaq wada lwaqun berah Utux Tmninun kana ka pais. 22Bobo wada glekun berah Utux Tmninun ka dxeral kiya de, tduwa namu mbrinah meyah ka yamu da. Nasi so kiya de, uka qnquwan noda namu Utux Tmninun ma Israel. Dxeral nii we mpnamu meniq berah Utux Tmninun uri. 23Nasi namu ini oda so nii, tai! Niqan namu qnquwan noda Utux Tmninun ka yamu da. Klai bale meeyah nak sunan ka qnquwan noda namu. 24Saya, malu namu smalu lualang dlqlaqi namu ma, smalu tibu tnbugan namu. Kiya de, kari rnengo namu we, asi ka mpbale kana.” 25Rmengo Moseh ka lqlaqi laqi Gad ma Reuben: “Tnqliyan su we mpuyu miyan rnengo su moda kana. 26Lqlaqi nami, mqedil, dapa ma miric ma, kana tnbugan we htiun miyan lualang Gilad hini. 27Kiya de, tnqliyan su, kiya ka kana madis hlmadac maha mccebu na we, mpuyu kari su mptaril yayung Yarden maha miyan mccebu meniq berah Utux Tmninun.”
28Kiya de, Moseh we mosa rmengo Elajar msapuh, Yehosua laqi Nun ma, kana dmpdudul seediq Israel ka heya. 29Rmengo ka Moseh: “Lqlaqi laqi Gad ma Reuben, kiya ka kana madis hlmadac mosa mccebu meniq berah Utux Tmninun na. Nasi mtheyaq yamu mtaril yayung Yarden ka dheya ma, bobo wada namu ngalun de, asi namu ka sbege dheya ka dxeral Gilad ka yamu. 30Nasi ini adis hlmadac smnegul yamu mtaril ka dheya de, maha mangal dxeral ckceka Kenaan ka dheya.” 31Rmengo ka lqlaqi laqi Gad ma Reuben: “Hmuwa mesa tmnugesa ka Utux Tmninun de, maha miyan muyu so kiya ka yami. 32Madis miyan hlmadac nanak ma, mptaril miyan meniq berah Utux Tmninun mpremux dxeral Kenaan. Kiya de maha nnami ka dxeral gisu meniq yayung Yarden hini.”
33Kiya de Moseh ge, saasu na mege lqlaqi laqi Gad ma Reuben ma, dmeka pnswayan rudan Menaseh laqi Yosehu ka qlhangan ma lualang qnlhangan Sixon qbsuran paru Amori ma, qnlhangan Og qbsuran paru Basan. 34Lqlaqi laqi Gad we smnalu lualang Dibon, Atarot, Aroer, 35Atrot Sopan, Yajer, Yuebiha, 36Bet Nimrah ma Bet Haran. Nii ge lualang msdehu riyung ma niqan ka snlmean daha tibu miric uri. 37Lqlaqi laqi Reuben we smnalu lualang Xesbon, Elaleh, Qiryatayim, 38Nebo, Baal Meon (wada brahan tmngayan hiti) ma Sibmah. Wada daha brahun tmngayan ka lualang snmalu daha. 39Makir laqi Menaseh we mosa dxeral Gilad mangal dxeral hiya ma, wada na lwaqun ka seediq Amori. 40Moseh we sbege na Makir laqi Menaseh ka dxeral Gilad. Kiya de meniq hiya ka dheya. 41Mnangal lualang Gilad ka Yair laqi Menaseh. Kiya de Habuc Yair kesun na tmngayan ka ngayan na. 42Mnangal dxeral Qenat ma lualang Qenat ka Nobax. Kiya de tnyanun na ngayan na nanak ma Nobax kesun na ka Qenat.
Currently Selected:
Spegan 32: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
