Mikah 7
7
Knsburo Seediq Israel
1So smtali ku ba! Mntena ku heyi gnhiyan bobo rbagan qnbrungan,
dungal we mntena so knrngiyan bobo lnmuwan ka lipas,
uka ani kingal ka tduwa uqun,
uka ba ka so heyi nunuh hani mhada kmngalun mu.
2Wada mhuqil kana ka dseediq bale ba kmtama bobo dxeral,
uka seediq msderux ka seediq bobo dxeral.
Kana daha we gisu tmara pphuqil daha seediq,
mdoi tlenga qmerac mtswai daha nanak.
3Mkela ba qmeepah naqah ka baga daha,
mangal lnabu bnege ka qbsuran paru ma dmpsgao daha.
Ptuura knsrabang ngngalun lhebun daha ka dseediq gaga niqan beyax,
mddayo qmeepah naqah.
4Mkela bale ckceka daha we, mntena so srkunux.
Knsderux daha bale we, mntena so pako qnalang.
Ali tmara su ciida, kiya ka meeyah ka pkdira,
mprudu bale ka ddheya.
5Iya stama ssiyo sapah,
iya snhii dadal namu malu.
Ani gaga mtaqi berah su ka mqedil su we,
asi su ka gmukun uri ka quwaq su.
6Ado smbiciq qmita tama ka laqi rseno,
tbrinah bubu ka laqi mqedil,
ina we tbrinah pai uri,
pais seediq we kika tnsapah daha nanak.
7Quri so yaku we, mpstama ku Utux Tmninun,
mptara ku Utux Baro mu.
Ida mpsruwa kenan ka Utux Baro mu.
Pkuudus Dseediq Na ka Utux Tmninun
8Pais mu! Iya psparu quri kenan.
Ani ku mtakur, ida ku mptutuy na.
Ani ku gaga meeniq mnkuung, Utux Tmninun ka ledax mu.
9Maangal ku seang Utux Tmninun,
betaq dmayo rmengo kenan ka heya ma, ptuura uka qnquwan mu,
ado niqan qnquwan noda mu heya ka yaku.
Heya ka mdudul kenan mremux ledax,
ida ku mqita msderux noda na ka yaku.
10Ciida, mpqsiqa mita oda nii ka pais mu,
rmnengo kenan ka heya:
“Gaga inu ka Utux Tmninun, Utux Baro su ho?”
Kiya we mpqita ku doriq pkdraun ka heya,
saya, maha qqahun mntena dxeral ckceka elu ka heya.
11Dehuk ka ali psbgrahun su smmalu qnalang alang!
Betaq ali ciida, mpkrana ka ayus qnlhangan.
12Betaq ali ciida, mpeeyah Asur,
mpeeyah lualang Micrayim,
mpeeyah Micrayim betaq yayung Paru,
mpeeyah rcilung nii betaq rcilung kiya,
mpeeyah dgiyaq nii betaq dgiyaq kiya,
mosa mquri isu hiya kana.
13Kiya de, ririh dseediq nii,
ririh gnhean noda daha,
maha laxun ka dxeral nii.
Gmaalu Israel ka Utux Tmninun
14Braho su eeniq bbuyu Karumeru,
poda hukuc su tmabu dseediq su gaga murux,
kiya ka rahul miric pusu dnoi su.
Tai so mntena so cbeyo,
tbugun su Basan ma Gilad hiya.
15Mptuura ku sklwiun oda dheya,
mntena so mneeniq dxeral Micrayim ciida.
16Qmnita ka dqlhangan we, ani gaga niqan paru ba ka beyax we ida mpqsiqa.
Muubung quwaq daha, smepuy birac daha uxe mpqbahang.
17Mpcehak dxeral mntena so quyu,
dungal we mntena so camac mkkarang bobo dxeral,
asi skluwi mlatac kobu daha.
Mpkiicu Utux Tmninun, Utux Baro ta ka dheya,
ado mpkiicu isu uri.
18Utux ima ka mntena so isu, betaq su smruwa qnquwan noda,
smruwa su qnquwan noda dseediq mntngari pusu doi su ho?
Uxe mpkseang ani betaq knuwan, smkuxul gmaalu ka heya.
19Mpbrinah gmaalu ita ka heya,
qqahun na toma papak na ka qnquwan noda ta.
Saun na qmada toma rcilung ka kana qnquwan noda daha.
20Mpuyu su kari tnugesa su rdrudan miyan cbeyo,
mpbale su qmita Yakobu,
mpgaalu su quri Abraham.
Currently Selected:
Mikah 7: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
