Matay 2
2
Dseediq Niqan Knkela Pneeyah Nklaan Hido
1Qbsuran paru Hrodes ciida, mtuting Betlexem dxeral Yudaya ka Yesu. Niqan ka dseediq niqan knkela pneyah nklaan hido we dehuk Yerusalem, smiling: 2“Gaga mtuting inu ka mpqbsuran paru seediq Yudaya ho? Qmnita miyan pngerah na pniyah nklaan hido, kiya de meyah nami thmuku heya.” 3Mgedang lnglungan na mbahang so nii ka Hrodes qbsuran paru. Mntena heya mgedang lnglungan daha ka dseediq Yerusalem uri. 4Kiya de pssliun na kana ka pusu msapuh ma dmptpatis ka heya, smiling dheya: Mptuting inu ka Kiristo? 5Rmengo ka dheya: “Meeniq Betlexem dxeral Yudaya. Ado so nii ka pnatis mpgela kari:
6‘Betlexem dxeral gaga Yehudah!
Uxe su tgbiciq bale meniq ckceka lualang Yehudah.
Ado mpeeyah isu hiya meyah ka 1 mpqlahang,
meyah tmabu seediq mu Israel.’”
7Kiya de Hrodes we gruusun na mlawa ka dseediq niqan knkela. Sbleqan na ba smiling cnriyu sknuwan ka pngerah. 8Kiya de skgulan na mosa Betlexem ka dheya, rmengo: “Sai stratuc ba smiling ka laqi rabu. Slayan namu de yahi ku tmgesa, klaun mu mosa thmuku heya uri.” 9Wada mbahang kari qbsuran paru de mosa ka dheya da. Tai, pngerah qntaan daha nklaan hido hiya we nii dmudul berah daha, betaq bobo gaga niqan laqi rabu de msange de. 10Mita pngerah nii ka dheya de, mqaras bale. 11Mremux sapah ka dheya. Taan daha ka laqi ma Maria bubu na. Kiya de tmbqelic thmuku laqi kiya. Rwahan daha uri ka psaan pusu dnoi. Mangal king, geluq skenux ma geluq mngihur, ngalun na lnabu sbege na heya. 12Ado mnangal tnugesa Bukung meeniq sepi, iya osa mbrinah qmita Hrodes. Kiya de mooda elu icil mosa alang daha.
Qduriq Mquri Micrayim
13Bobo wada ka dheya, asi mtqita ckceka sepi Yosehu ka snkgulan Bukung, rmengo: “Tutuy! Adis ka laqi ma bubu na qduriq mosa Micrayim! Eeniq hiya ma tara kari mu. Ado maha migin laqi nii ka Hrodes ma pphqilun heya.” 14Kiya de mtutuy ka Yosehu ma, desun na keeman ka laqi ma bubu na qduriq mquri Micrayim. 15Meeniq hiya betaq mhuqil ka Hrodes. So nii we kiya ka maha mpbale ba rnengo Bukung pnooda na kari mpgeela kari: “Splawa mu peeyah Micrayim ka laqi mu.”
Phuqil Lqlaqi
16Mkela mesa gisu qbriqun dseediq niqan knkela ka Hrodes de, sqama seang na. Kiya de smkagul seediq mosa Betlexem ma ssiyo alang hiya. Muyu so ali stratuc ba sniling na ddseediq niqan knkela, wada na phqilun kana ka quri 2 knkawas toma na ka lqlaqi. 17Gisu mpbale kari rnengo Yirmeyah mpgeela kari ka nii:
18“Mpqbahang hrenang sndaring ma lingis meniq Ramah hiya,
kiya ka Rajie gaga lmingis laqi na,
ini sruwa meyah psbeyax heya,
ado tena wada uka ka dheya.”
Mpbrinah Peeyah Micrayim
19Bobo wada mhuqil ka Hrodes, meeniq Micrayim, mosa mtqita sepi Yosehu ka 1 snkgulan Bukung, 20rmengo: “Tutuy, adis ka laqi ma bubu na osa dxeral Israel! Ado seediq migin knuudus laqi nii we wada mhuqil da.” 21Kiya de mtutuy ka Yosehu, desun na ka laqi ma bubu na mosa dxeral Israel. 22Yosehu we, qbhangan na wada rmirih Hrodes tama na mpqlahang Yudaya ka Arxelaos de, miicu mosa hiya. Rngagan Bukung meniq sepi dungal ka heya, kiya de mosa mbrinah quri dxeral Galil. 23Dehuk hiya ka dheya de, mosa meeniq alang Najare. So nii we kiya ka maha pbale ba rnengo dmpgeela kari: “Seediq Najare kesun daha mlawa ka heya.”
Currently Selected:
Matay 2: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
