Matay 1
1
Patis Ltlutuc Yesu Kiristo
(Ruk 3:23-38)
1Lqlaqi ltlutuc Abraham, so nii ka patis pnsltudan rdrudan Yesu Kiristo laqi mnslutuc Dawid:
2Tnlaqi Yijxaq ka Abraham, tnlaqi Yakobu ka Yijxaq, tnlaqi Yehudah ma mtswai na Yehudah ka Yakobu. 3Tnlaqi Perec ma Jerax peeyah Tamar ka Yehudah. Tnlaqi Xecron ka Perec. Tnlaqi Aram ka Xecron. 4Tnlaqi Aminadab ka Aram. Tnlaqi Naxson ka Aminadab. Tnlaqi Salmon ka Naxson. 5Peeyah Raxab tnlaqi Boaj ka Salmon. Peeyah Rute tnlaqi Obed ka Boaj. Tnlaqi Yisay ka Obed. 6Tnlaqi Dawid qbsuran paru ka Yisay.
Tnlaqi Selomoh ka Dawid dhaka mqedil na Uriyah. 7Tnlaqi Rexabam ka Selomoh. Tnlaqi Abiyah ka Rexabam. Tnlaqi Asa ka Abiyah. 8Tnlaqi Yehosapat ka Asa. Tnlaqi Yehoram ka Yehosapat. Tnlaqi Ujiyah ka Yehoram. 9Tnlaqi Yotam ka Ujiyah. Tnlaqi Axaj ka Yotam. Tnlaqi Yexijqiya ka Axaj. 10Tnlaqi Menaseh ka Yexijqiya. Tnlaqi Amon ka Menaseh. Tnlaqi Yosiyahu ka Amon. 11Tnlaqi Yexonias ma mtswai na ka Yosiyahu. Ciida we thrigan Babirun ka seediq.
12Bobo tnheruy Babirun, Tnlaqi laqi Saltiel ka Yexonias. Tnlaqi Jirubabil ka Saltiel. 13Tnlaqi Abiod ka Jirubabil. Tnlaqi Elyaqim ka Abiod. Tnlaqi Ajor ka Elyaqim. 14Tnlaqi Cadoq ka Ajor. Tnlaqi Akim ka Cadoq. Tnlaqi Eliod ka Akim. 15Tnlaqi Elajar ka Eliod. Tnlaqi Matan ka Elajar. Tnlaqi Yakobu ka Matan. 16Tnlaqi Yosehu ka Yakobu. Yosehu nii we seno Maria. Kiristo kesun ka Yesu we tnlaqi peeyah Maria.
17So nii de, mk14 pnsltudan ka peeyah Abraham betaq Dawid. Mk14 pnsltudan ka peeyah Dawid betaq theruy Babirun. Mk14 pnsltudan ka peeyah tnheruy Babirun betaq Kiristo.
Mtuting ka Yesu Kiristo
(Ruk 2:1-7)
18So nii ka ndaan mtuting Yesu Kiristo: Bubu na Maria ge mnoda psgaya mpsterung Yosehu ka heya. Ini psdehu mpsterung nana we pnooda Bgihur Utux mchedil ka heya. 19Seediq msderux ka seno na Yosehu. Ssatang ggruus malix ka Maria, kiicu na pqsiqa seediq ka Maria. 20Lmngelung so nii ka heya ciida, tai, mtqita sepi Yosehu ka 1 snkgulan Bukung, rmengo: “Laqi Dawid Yosehu, iya kiicu, ngali mqedil su ka Maria. Ado pnooda Bgihur Utux ka ga nbuyas na. 21Mptnlaqi rseno ka heya. Yesu kesa tmngayan ka heya. Ado laqi nii we meeyah dmoi baga seediq na peeyah ckceka qnquwan daha.” 22Meniq ka ndaan kana noda nii we, kiya ka nii pbale ba kari Bukung pnooda rnengo mpgeela kari:
23“Mpchedil mptnlaqi rseno ka weewa.”
Imanuel kesun daha tmngayan ka heya.
Hdilun ka kari Imanuel nii de: “Utux Baro we msuupu meniq ita.”
24Mtkela ka Yosehu de muyu so tnugesa snkgulan baro nBukung ka heya, ngalan na mqedil na ka Maria. 25Ini psuupu mtaqi ka dheya. Betaq mtuting ka laqi, kiya de Yesu kesun na tmngayan ka laqi rseno.
Currently Selected:
Matay 1: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
