Yirmeyah 46
46
Ini Baka Karkemis Hiya ka Micrayim
1Meyah Yirmeyah mpgeela kari ka kari Utux Tmninun quri qqlhangan.
2Quri Micrayim, kiya ka dsupi Paroh Neko nqbsuran paru Micrayim, meniq Karkemis ssiyo yayung Euhrates ge, tg4 knkawas qnbsranun na paru Yehudah ka Yehoyaqim laqi Yosiyahu ciida we, wada ini baka mccebu Nebukadnecar qbsuran paru Babirun.
3Psramal qeerung berah paru ma biciq,
Osa mccebu berah,
4Psai qraqil sapil ka rulu,
paapa dapa dmay!
Kbunuh bunuh qeerung ma ptbeku mheyu,
Lpaxi snbrangan ma plukus lukus mccebu!
5Ma ku nii mita gaga qduriq ka dheya,
knheguc bukuy ka dheya ho?
Ini baka mccebu ka supi daha,
mteeyux bale qduriq, ini ba psbrinah bukuy.
Niqan kniicu kana ka ssiyo!
Rmnengo so nii ka Utux Tmninun.
6Iya pqdriqi ka msliko qduriq,
iya pqdriqi ka dsupi mnpahung uri.
Meniq ssiyo yayung Euhrates tgdaya hiya,
skripuc mtakur ka dheya.
7Ima ka nii, mntena yayung Yeor msqbqebuq mnkala?
Mntena so yayung paru mrmari ho?
8Mntena yayung Yeor msqbqebuq mnkala we Micrayim,
mntena so qsiya yayung paru msqurux.
Rmengo ka heya: “Mppnkala ku ma bungun mu ka kana dxeral.
Daun mu smeeliq ka lualang ma dseediq meniq hiya.
9Dapa dmay! Osa da!
Rulu mccebu! Ttalang da!
Seediq Kusu ma Put mdoi qeerung ka dsupi mnpahung,
seediq Lud mkela ba hmkero budi, osa da!”
10Ali mciyuk Utux Tmninun Bukung Mdoi Kana Supi ka nii,
Mciyuk quri pais.
Maha mtengi riyung pnuqan na ka hlmadac,
mttuku riyung nmahan dara.
Ado meniq ssiyo yayung Euhrates tgdaya hiya,
niqan ka snapuh bege daha Utux Tmninun Mdoi Kana Supi.
11Weewa Micrayim!
Osa Gilad maangal geluq skenux.
Ani su asi ekan egu klegan iyu,
maha mgqiya ba, uxe su pkmalu.
12Mpqbahang qnsiqa su ka qqlhangan,
stngayan diras su ka kana dxeral.
Pptatuk ka dsupi mnpahung,
mddaha msuupu mtakur.
Meyah Kmremux ka Nebukadnecar
13Kari bukuy nii we, Kari Utux Tmninun rnengo na Yirmeyah ka nii. Quri so meeyah mccebu Micrayim ka Nebukadnecar qbsuran paru Babirun.
14Grangi Micrayim ma, rngagi Migdol hiya ka yamu,
rngagi meniq Nop ma Taxpanxes hiya:
“Bleyaq mtbeku, psramal mccebu,
ado gaga mpqhedu pkuuka ssiyo su ka hlmadac.”
15Ma wada asi sksiki ka supi namu mkkere ho?
Ini ksdehu mheyu,
ado wada lwaqun Utux Tmninun ka dheya.
16Hbaro ka wada na ptkurun ma mccikul mtakur.
Rmengo ka dheya: “Tutuy! Nita seediq ta nanak,
nita dxeral pnttingan ta nanak,
Prkawe ta hlmadac tmraqil kenan.”
17Kesun daha “Seediq psparu ini pnlengu ali” tmngayan ka Paroh qbsuran paru Micrayim.
18Rmengo ka ngayan kesun Utux Tmninun Mdoi Kana Supi:
Mpsdehu ku knuudus mu ani betaq knuwan:
“Meyah ka Nebukadnecar ciida,
maha mntena so dgiyaq Tabor,
mntena so ssiyo rcilung Karmel.”
19Seediq gaga meniq Micrayim!
Psramal qyqeya namu qqrapan namu daha.
Ado mpkbuyuh ka Nop,
psqmaun ma, uka seediq meeniq.
20Dapa giyas mtbeno ka Micrayim.
Gisu ka pahung dapa pneeyah daya meeyah kmremux! Gisu da!
21Supi snduwan na we mntena wawa dapa mtbeno,
mquri bukuy hmeruc,
mpsuupu qduriq, ini kdehu mheyu.
Ado ali strengun daha mqraqil,
ali pkdraun we gisu da.
22Hrenang na we mntena quyu sdheriq mkkesa.
Tqapur meyah ka supi, mntena dseediq meeyah gmeyu qhuni,
dmoi puru ka baga daha cmebu heya.
23Ani mqriqu ttmayan ka nrao na,
gyeun daha ma ptgsebu ka qhuni.
Ado Hmrinas utun kneegu ka supi, uka kklaan smepu.
Rnengo Utux Tmninun ka nii.
24Psqaun ka Micrayim,
bege baga dseediq pneeyah daya.
25Rmengo ka Utux Tmninun Mdoi Kana Supi, Utux Baro nuIsrael: “Qtai! Pkdraun mu ka Amon utux No, Paroh ma, Micrayim ma utuutux daha, dqbsuran mdudul. Pkdraun mu uri ka Paroh ma dseediq smtama heya. 26Bege mu baga migin pphuqil knuudus na ka heya ma, bege mu baga Nebukadnecar qbsuran paru Babirun ma dtnqliyan na ka dheya. Kiya de, bobo na de, maha niqan seediq ka meeniq, mntena so cuuxal dungal. Rnengo Utux Tmninun ka nii.”
Dmoi Baga Seediq Na ka Utux Tmninun
27Yakobu tnqliyan mu! Iya knngungu!
Israel! Iya nklui!
Ado mpdoi ku baga su peeyah theya,
mpdoi ku baga lqlaqi mnslutuc namu peeyah dxeral lnwaqan hiya.
Mpbrinah ka Yakobu, maangal mpbleyaq,
uka ka mpkiicu dheya.
28Yakobu tnqliyan mu! Iya knngungu!
Ado gaga ku msuupu sunan ka yaku.
Qhdeun mu pkuuka ka qnlhangan hiya,
kiya ka qqlhangan lnwaqan mu yamu hiya.
Uxe mu qhdeun pkuuka ka isu,
maha slokah hari ka pnkdira mu sunan,
kiya ka kiya asi misu ka pkdraun ka isu.
Rnengo Utux Tmninun ka nii.
Currently Selected:
Yirmeyah 46: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
