Hiburu 7
7
Gaya Msapuh Malkicedeq
1Malkicedeq nii ge, kiya ka qbsuran paru Saleim, kiya ka msapuh Utux Baro Tgpusu Ba Baro. Wada ini baka ka dqbsuran paru meyah ka Abraham ciida we meyah smterung ka heya, kiya uri ma smbeyax heya. 2Abraham we kiya ka nangal na kana nheya we, sbege na heya ka 1 tnugmxalan. Hdilun ta ka ngayan na plaale we “Qbsuran paru msderux noda”. “Qbsuran paru Saleim” kesun ngayan na ma: “Qbsuran paru mtbale” kesun uri. 3Heya we uka tama, uka bubu, uka patis ngayan ddrudan, uka ali pntingan na, mntena hari laqi Utux Baro mparu msapuh Utux Baro betaq ani knuwan.
4Lnglungi yamu bino, teyal knparu ngayan na ka seediq nii! Ani drudan ta Abraham we ida na sbege heya ka 1 tnugmaxal peeyah nangal na. 5Kiya de so ka maangal qneepah ssapuh ka lqlaqi Lewiy we, muyu so gaya nii mesa 1 tnugmxalan peeyah seediq Israel. Dseediq nii we mtswai ta nanak. Ani pneeyah dlutuc Abraham we, ida muyu gaya mege 1 tnugmxalan. 6Wano Malkicedeq ma tnlutuc ddrudan daha we, mpangal 1 tnugmaxal Kiya de uka pnltudan rudan daha ka seediq nii we wada mangal 1 tnugmaxal pneyah Abraham. Kiya de mege smbleyaq Abraham maangal sntangan. 7Tgparu ka smbleqan tgbiciq we uka ngunglan kari ka so nii. 8Ooda so nii we, mangal 1 tnugmaxal we seediq mphuqil kana. Kiya uri we, mnangal 1 tnugmaxal ka seediq we gisu ptuura ga muudus. 9Mtduwa ta srengo so nii ka kari, Lewiy mnangal 1 tnugmaxal we ida pnooda Abraham wada mangal 1 tnugmaxal. 10Ado smterung Abraham ciida ka Malkicedeq we, ga meniq ckceka heyi drudan na ka Lewiy.
11So kiya de, dseediq de nasi daha spooda qpahun smapuh Lewiy mtduwa pttuku de, ma asi ka muyu gaya Malkicedeq pheyu 1 msapuh dungal ma, ini puyu gaya Aharon ho? Ado meniq toma qpahun snapuh nii maangal gaya ka dseediq. 12Wada pryuxun ka qpahun smapuh de, asi ka priyuxun ka gaya uri. 13Ado seediq ga srengo kari nii we pneeyah icil ddlutuc ddrudan. Ddlutuc ddrudan nii we uka bale ka qmneepah mrtaso spuhan. 14Truura bale ka nii, pneeyah Yehudah ka Bukung da. Kiya de quri so ddlutuc ddrudan nii de, ini rengo quri msapuh ka Moseh.
15Nasi mtutuy dungal ka 1 msapuh mntena Malkicedeq de, maha mtruura riyung ka kari mu. 16Wada msapuh ka heya de, uxe pnooda gaya heyi, nii we pnooda paru beyax knuudus uka psteqan. 17Ado rmengo ka pgkela heya:
“Isu we pnooda su gaya Malkicedeq,
mpsapuh su betaq ani knuwan.”
18Kiya de, ririh knuuwic uka beyax ma wada lixun ka gaya pndakar tgberah da. 19(Gaya we uxe mptduwa moda ani maanu). Kiya uri we, niqan 1 ka sntangan malu ga pyahun. Smtama ta sntangan nii de, tduwa ta smdaling Utux Baro.
20Dungal we wada mmsapuh ka Yesu, uxe kesun uka ka pnsdehu Utux Baro. Duma dmsapuh we uka so nii pnsdehu maangal qpahun msapuh. 21Wano Yesu ka pheyu pnsdehu nii, ado pnheyu Heya we rmnengo Heya,
“Smndehu ka Bukung da:
Uxe bale kmpriyux.
Msapuh betaq ani knuwan ka Isu.”
22Heya ka pnheyu pnsdehu de, Yesu de knmalu pnsdhegan ga meniq ckceka ita ma Utux Baro ka Heya.
23Kiya we, egu riyung ka pnheyu mpsapuh, ado niqan sneengan mhuqil kiya de ini tduwa hhridan bsiyaq. 24Kiya uri we, nii ka ga hridun ani knuwan de, qpahun na msapuh we ida ini tduwa pryuxun. 25So kiya de, pnooda Heya mremux berah Utux Baro we, tduwan na dooyun baga. Ado ida muudus dmurun dheya ani knuwan ka Heya.
26Paru msapuh nii we mrtaso, uka qnnaqah, uka qnrutiq, smtheya seediq niqan qnquwan noda, mgkala kana karac baro we, maha mlengu bale ita kiya. 27Ini pntena dmsapuh dheya ka Heya. Dheya we asi ka plaale mege snapuh qnquwan noda daha nanak han, kiya we bobo na de mege snapuh qnquwan noda dseediq. Ado wada pttkuun bale asi sxali mege snapuh ka Heya nanak. 28Pnheyu gaya ka paru msapuh we ida niqan knuuwic daha. Kiya de, bobo gaya de, Utux Baro spooda na kari pnsdehu pheyu laqi na mparu mpsapuh, mttuku riyung betaq ani knuwan.
Currently Selected:
Hiburu 7: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
