Garatia 2

Psteme Poro ka Duma Snkgulan

1Bobo wada 14 knkawas de mosa ku Yerusalem dungal, msuupu yaku ka Brnabas ma stheyaq mu madis ka Titos uri. 2Mnoda pnugkela kenan ka nsaan mu hiya. Malu kari gnarang mu seediq icil qnlhangan we ssneeru mu dheya dmtswai. Mpdudul daha we gruusun mu smneeru. So uxe pgqeya ka ndaan mu ma ddaun mu saya ma cuuxal. 3Kiya de msuupu kenan ka Titos ge, ani seediq Hellenis ka heya we ini daha pskyexi ptgaya psalak. 4Ado gmuruus mremux ka duma nnnangi mtswai we meyah kmuuruy pntrwahan ta na mnoda Kiristo Yesu mangal tnqliyan ita. 5Ani so kiya eeniq na ckceka yamu klaali ka knbale malu kari we ini miyan hediq muyu dheya. 6Tai so dseediq niqan ngayan we, ani so seediq mnmaanu we, uka pnugluban na yaku. Utux Baro we ini qita nganguc seediq. Dseediq niqan ngayan nii we, uka pnrnaan na kenan. 7Msciyuk de, nuuqu dheya ka mnita seediq ini oda ptgaya psalak kiya ka gnarang mu malu kari bnege Bukung kenan. Mntena seediq mnoda ptgaya psalak, gnarang malu kari Petros bnege Bukung heya. 8Lmgelu lhebun Petros, maangal snkgulan heya quri seediq ptgaya psalak we lmgelu lhebun mu uri. Heya ka mnlawa kenan maangal snkgulan quri seediq icil qnlhangan. 9Ngalan daha eruc pssliyan ka Yakobu, Kepas ma Yohane we mkela huwe bnege Utux Baro kenan de dmoi baga Brnabas ma kenan pgkela pggaluk mddayo menan. Kiya de smruwa yami oosa miyan quri seediq icil qnlhangan ma oosa daha quri seediq mnoda ptgaya psalak. 10Quri uxe pchungi seediq qrinuc wano so nii ka pnesa daha menan. Qqpahun nii ka ga mu stbeyax ba moda.

Mseang Petros ka Poro

11Bobo na, betaq Antiokeia ka Kepas da. Ado niqan qnquwan na de, asi ku hetur berah na. 12Tgberah ini eyah ka dseediq pneeyah Yakobu hiya na we, mnsuupu theyaq mekan seediq icil qnlhangan ka heya. Dehuk ka dheya de, ado miicu seediq mnoda ptgaya psalak de wada tbrinah ka heya ma, sntheya seediq icil qnlhangan. 13Duma seediq Yudaya muyu heya ma mnnangi. Ani Brnabas uri smnegul dheya msnnangi. 14Kiya de taan mu qnuuqu ka noda daha, ini puyu bale ba malu kari de, asi mu rngagi berah seediq ka Kepas, “Seediq su Yudaya ka isu ma, ma su muyu noda seediq icil qnlhangan, ini su puyu so noda seediq Yudaya. Ma su pskeyux seediq icil qnlhangan muyu noda seediq Yudaya da ho?”

Seediq Yudaya Mntena Seediq Icil Qnlhangan Mangal Snhiyan

15Mtuting ta ciida de seediq ta Yudaya ka ita da, uxe ta seediq niqan qnquwan noda icil qnlhangan. 16Ma su so kiya we klaun ta, ngalan msderux noda ka seediq we uxe pnooda noda gaya, asi ka pnooda snhii Kiristo Yesu. Yami duri snhii nami Yesu Kiristo. So nami daha ngalun msderux noda ado snhii nami Kiristo, uxe so noda gaya nii ngalun msderux noda. Ado kana muudus niqan heyi ma dara we uka ani 1 ka ga ngalan msderux noda gaya. 17Netun ta mesa ngngalun msderux ooda ckceka Kiristo ma ida ta seediq niqan qnquwan noda na ka ita, so kiya we tnqliyan qnquwan noda ka Kiristo ho? Ida uxe so kiya. 18Nasi mu brahun smalu ka hnurah mu we kika nii ku pnugkela yaku ka seediq smeeliq gaya na. 19Ado moda ku gaya wada ku mhuqil quri gaya di, so kkuudus mu Utux Baro. Wada ku msuupu Kiristo pteetu jyujika. 20Muudus ku saya we uxe yaku da. Kiristo ka nii muudus ckceka mu. Gisu ku muudus ckceka heyi mu we mnoda ku snhii laqi Utux Baro muudus. Heya we gmaalu kenan ma ririh yaku wada na sbege ka heyi na. 21Ini mu lixi ka huwe Utux Baro. Nasi mnoda gaya ka ngalan msderux ooda we naka mgqiya ka hnqilan Kiristo da.

Currently Selected:

Garatia 2: Stgdaya

Highlight

Copy

Compare