Yexejqel 33
33
Ngalan Mpqlahang Qmlahang Utux Baro ka Yexejqel
(3:16-21)
1Meeyah kenan ka kari Utux Tmninun, rmengo, 2“Laqi seediq! Rngagi ka dseediq su, rngagi ka dheya: Posa ku hlmadac 1 qlhangan ciida, gmao taxa heyi peeyah ckceka daha ka seediq ngalan mpqlahang qmlahang daha. 3Qmita mpdehuk qlhangan ka hlmadac ciida, miyuk iyuk urung ka heya ma pqlahang seediq. 4Mbahang nyupan urung ka seediq ma ini qlahang ka heya we, meeyah phuqil heya ka hlmadac. Dara seediq nii we maha tunux na nanak. 5Mnbahang hrenang iyuk urung ka heya ma ini qlahang de, mmaha heyi na nanak ka dara na. Nasi qmlahang ka heya de, mdoi baga knuudus na nanak. 6Nasi qmnita gisu ka hlmadac ka mpqlahang qmlahang ge, ini iyuk urung ka heya, betaq ini qlahang ka seediq ma, meyah phuqil 1 seediq ckceka daha ka hlmadac de, ani mphuqil qnquwan noda na nanak ka seediq nii we, ida ku mpciyuk mesa dara peeyah baga mpqlahang qmlahang nii ka yaku.
7Laqi seediq! Ida ku mpheyu sunan ka mpqlahang qmlahang sapah Israel. Qbahang kari rnengo quwaq mu, pririh kenan pqlahang rmengo dheya. 8Mprengo ku quri naqah seediq: ‘Naqah seediq! Ida su mphuqil ka isu!’ Nasi su ini pdakar naqah seediq, ttaalix peeyah noda na we, mphuqil ririh qnquwan noda na nanak ka naqah seediq nii. Mpciyuk ku mesa dara na peeyah baga na. 9Kiya ka isu we, nasi su mdakar seediq naqah, rmnengo su ttaalix peeyah noda na. Kiya we ida ini alix ka heya de, mphuqil qnquwan noda na nanak ka heya. Kiya de mpkuudus su knuudus su nanak ka isu.”
Qpahun Taxa Seediq
10“Laqi seediq! Rngagi ka sapah Israel: Rmnengo namu so nii: Qnnaqah qnquwan noda ta we gaga meeniq heyi ta nanak. Kiya ka mphuqil ta, Mphuwa ta mesa muudus ho? 11Rngagi ka dheya, rmnengo ka Utux Tmninun Bukung: Psdehu ku knuudus mu betaq ani knuwan, ida ku ini qqaras mphuqil ka seediq naqah, wano ba betaq muudus malix noda na ka seediq naqah we, kiya ka qqrasun mu. Sapah Israel! Kmpriyux, kmpriyux malix qnnaqah noda namu! Ma namu asi ka mphuqil ho? 12Laqi seediq! Rngagi ka dseediq su: Knsderux seediq msderux ge, uxe su doyun baga meeniq ali ndaan na qnnaqah noda ciida. Quri so qnnaqah seediq naqah we, uxe mptakur meeniq ali nlixan na qnquwan noda ciida. Seediq msderux we uxe mpkuudus knsderux na meeniq ali qnquwan noda ciida. 13Mprengo ku seediq msderux: Ida su mpkuudus ka isu! Nasi smtama knsderux na mooda qnnaqah noda ka heya we, uxe daha lnglungun ka knsderux noda na. Mphuqil qnnaqah noda na ka heya. 14Mprengo ku seediq naqah: Mphuqil su ka isu! Nasi malix qnquwan noda na, mooda ini psanak ma msderux noda ka heya. 15Nasi pbrinah mege pnlabu ma, pbrinah qyqeya gneeluk daha, muyu gaya pndakar knuudus ma ini qeepah naqah de, ida mpkuudus ka heya, uxe mphuqil. 16Uxe daha lnglungun ka kana qnquwan noda na. Mpkuudus noda na ini psanak ma msderux noda ka heya.
17Mprengo ka seediq su: ‘Mksaanak ooda na ka Bukung.’ Bale ba we, noda daha ka bale ba mksaanak. 18Malix knsderux noda na mooda qnnaqah ooda ka seediq msderux noda. Kiya ka mphuqil ka heya. 19Malix qnaqah na ka seediq qnnaqah ma, mooda ini psaanak ma msderux noda de, mpkuudus so nii noda na ka heya. 20Rmnengo namu dungal: Mksaanak ooda na ka Bukung. Sapah Israel! Mpuyu ku qneepah txtaxa namu psgao ku sunan.”
Kari Wada Ini Baka ka Yerusalem
215 ali 10 idas tg12 knkawas bobo qnerac menan, meyah qduriq yaku hini ka seediq pneeyah Yerusalem, rmengo: Wada daha ngalun ka alang di. 22Keeman berah meeyah ka seediq qnduriq nii, meyah tmelung heyi mu ka baga Utux Tmninun ma, rmaguh quwaq mu. Mgrebu kusun de, betaq yaku hini ka seediq kiya de, rmaguh ka quwaq mu ma, ini ku tduwa mgmelux da.
Qnnaqah Seediq
23Meeyah kenan ka kari Utux Tmninun, rmengo, 24“Laqi seediq! Rmengo ka dseediq gaga meeniq dxeral Israel qnada hiya: ‘Abraham hiya nanak ka dmnoi dxeral nii. Hbaro ta ka ita. Nii na sbege ita ddooyun ta ka dxeral nii.’ 25Maanu so kiya de, rngagi ka dheya, rmnengo so nii ka Utux Tmninun Bukung: Mnekan namu uqun gaga niqan dara ma, thmuku namu tikung. Dungal we psdara namu seediq. So kiya de, mptduwa namu mangal dxeral nii na peni? 26Smtama hlmadac namu nanak qmeepah namu pqnqihun noda. Gmeeguy namu mqedil ssiyo namu we, mptduwa namu mangal dxeral nii na ho? 27Isu we rngagi so nii ka dheya, rnengo so nii ka Utux Tmninun Bukung: Mpsdehu ku knuudus mu ani betaq knuwan, meeniq dxeral qnada hiya we, mptakur toma hlmadac. Meeniq breenux na we, pqdalun mu camac ka dheya. Meeniq qbrangan ma rangah beling we, pknrexun mu mnarux punu ka dheya. 28Pktdusun mu malix ka dxeral nii, mpkuuka ka beyax stndahu daha. Mpkbuyu laxan ka ddgiyaq Israel ma uka ani ima ka mooda hiya. 29Ririh kana pqnqihun noda daha, maha sqada nlaxan ka dxeral nii. Ciida, mpkeela ka dheya, yaku ka Utux Tmninun.”
Kari Rnengo Mpgeela Kari
30“Isu, laqi seediq! Gisu smetur sunan gaga meeniq ssiyo qnalang alang ma rhengun sapah ka seediq su. Mpprengo ka mtswai: ‘Aguh! Bhangi teta niqan ka kari pneeyah Utux Tmninun.’ 31Mntena seediq meeyah yaku hini ka dheya. Tleung berah mu we, mntena so seediq mu. Mnbahang kari su ka dheya we, ini oda ka dheya. Ado rmengo gnaalu ka quwaq daha we, mhero pila ka lhebun daha. 32Qtai! Qtaan daha sunan we, mntena so seediq gisu muuyas uyas mskuxul. Malu riyung ka hrenang ma, mkela riyung tmubu. Mnbahang kari su ka dheya we, ini oda ka dheya. 33Qtai! Maha ma bale ka kari nii. Ma bale ciida de, mpkeela ka dheya, ckceka daha we niqan ka mpgeela kari.”
Currently Selected:
Yexejqel 33: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
