Mege Gaya 4
4
Dmudul Dseediq Israel Tthei Gaya ka Moseh
1“Saya, seediq Israel! Bhangi ka kari pndakar ma gaya bneku mu yamu. Asi namu ka muyu kiya maha malu ka kndesan namu, tduwa namu mremux dxeral ngngalun namu bnege na yamu ka Utux Tmninun, Utux Baro namu. 2Kari rnengo mu yamu we iya bale prnai ma meelih. Kiya ka klaun namu muyu kari pnosa Utux Tmninun, Utux Baro namu. Kiya ka kari tnugeesa mu yamu. 3Qtaan namu bale doriq namu ka qneepah Utux Tmninun quri Baal Peor. Phqilun Utux Tmninun, Utux Baro namu peeyah ckceka namu ka kana dseediq smnegul Baal Peor. 4Wano so dyamu kana nii gisu smnegul riyung Utux Tmninun, Utux Baro namu ka betaq muudus ali saya. 5Qtai! Muyu ku rnengo Utux Tmninun, Utux Baro mu mptgesa ku kari pndakar ma gaya bneku yamu. Kiya ka pyugun namu meniq dxeral ssaun namu hiya. 6Asi namu ka muyu. Kiya ka knkela ma gnkela namu meniq berah kana seediq bobo dxeral ka nii. Mbahang kana gaya nii ka dheya de, maha rmengo: ‘Seediq paru qlhangan nii we bale ba niqan knkela ma, niqan gnkela!’ 7Paru qlhangan we diima ka niqan utux msdaling dheya, mntena Utux Tmninun, Utux Baro ta. Dmurun ta ciida de smdaling ita ka heya peni? 8Paru qnlhangan we diima ka niqan msdeerux kari pndakar ma gaya bneku, mntena so kana gaya stgesa mu berah namu peni?
9Kiya de, qlahang ka isu, kdrumuc psdehu lhebun su. So su uxe chngiun ka noda qntaan su. Kiya uri ma so uxe mpqduriq peyah lhebun su ka noda nii meniq kana laali kndeesan su. Asi namu ka stgesa lqlaqi laqi namu ka kiya. 10Ali mnheyu su berah Utux Tmninun, Utux Baro su meniq dgiyaq Xoreb ciida, rmnengo kenan ka Utux Tmninun: ‘Sai psseli kenan ka seediq. Pqbhangun mu kari mu ka dheya. So maha smluhe miicu kenan meniq kndeesan daha bobo dxeral ka dheya. Kiya ma tduwa daha stgesa lqlaqi daha uri.’ 11Ciida, meeyah namu berah mu. Mpheyu namu deriq dgiyaq. Mpniqan rana puniq sqama betaq karac baro ka bobo dgiyaq. Kiya uri we maha niqan mkuung, plabu ma, knkuung. 12Peeyah ckceka rana puniq mprengo yamu ka Utux Tmninun. Mpkbahang namu hrenang na. Wano ba hrenang ma uxe namu qtaun ka hnyegan na. 13Mprengo gaya pyugun namu ka heya. Kiya ka 10 gaya pndakar. Dungal we gnequr na matis 2 qrtinuh btunux ka gaya pndakar nii. 14Ciida, Utux Tmninun we rnengo kenan ttgesa mu yamu ka kari pndakar ma gaya bneku. Kiya ka pyugun namu meniq dxeral ssaun namu hiya.”
Mdakar Tthmuku Tikung
15“So kiya de, ririh yamu nanak asi ka qmlahang bale. Ado peeyah ckceka puniq meniq dgiyaq Xoreb ali rmnengo yamu ciida ka Utux Tmninun we, uxe namu qntaan ka hnyegan na. 16So uxe maha mmhemuc ka ooda namu gmequr ssmalu ani maanu tikung. Ani hnyegan rseno ma mqedil. 17Uxe uri we hnyegan camac bobo dxeral, qbheni skiya karac, 18uxe uri we kuyi mkkarang dxeral ma klegan qcurux gaga ckceka qsiya toma dxeral. 19So su uxe mpquri karac mita, mqita su Utux Tmninun, kiya ka Utux Baro pnosa hido, idas ma ppngerah smnalu Utux Baro bbege na kana seediq, kiya ka lmlamu hnyegan karac baro de, maha psridil yamu mpthmuku ma mqeepah dheya. 20Pnlatac dmnudul yamu peeyah Micrayim tbbau srana rqeda ka Utux Tmninun. Ngalun namu na lqlaqi dnoi niya, mntena so saya.”
21“Ririh yamu mnseang kenan ka Utux Tmninun. Smndehu ini sruwa ptaril yayung Yarden kenan. Ini ku na srwai pteme malu dxeral dooyun namu bnege Utux Tmninun, Utux Baro su. 22Mphuqil ku hini ka yaku di ma, uxe ku mpntaril yayung Yarden. Kiya de yamu we mpntaril namu maha mangal dxeral malu. 23Asi ka qmlahang ka yamu. So namu uxe chngiun ka Utux Tmninun, Utux Baro namu ma sndhegan na dyamu. Uxe namu gmrequr ssmalu lmlamu hnyegan tikung nnamu nanak. Pndakar Utux Tmninun, Utux Baro su ka nii. 24Ado Utux Tmninun we, kiya ka rana puniq mpsqama ma, Utux Baro pnugaya ba qnnaqah.”
25“Bsiyaq ka nniqun namu dxeral hiya ma tmlaqi namu lqlaqi laqi. Nasi naqah ka noda daha, gmequr ssmalu lmlamu tikung nnamu nanak, meepah namu noda naqah meniq ckceka doriq Utux Tmninun, Utux Baro su breebur pkseang heya. 26Mplawa ku karac ma dxeral pgkela yamu ali saya. Asi namu pkuuka peeyah dxeral ngngalun namu mntaril yayung Yarden! Uxe namu mpqbsiyaq meniq dxeral hiya ma, maha namu mpkuuka kana. 27Mpkrehak yamu meniq ckceka icil qlhangan ka Utux Tmninun ma, uxe mpkhbaro ka mntngari ka yamu. 28Meniq namu hiya we mpthmuku namu utuutux snmalu baga seediq. Kiya ka qhuni ma btunux, ini qita ma ini qbahang, ini ekan ma ini qbahang. 29Maha namu migin Utux Tmninun, Utux Baro su meniq namu hiya. Nasi su pooda kana lhebun ma lnglungan migin heya de, maha namu slayun ka heya 30Bobo na meniq namu ckceka mqraqil ciida, meeyah yamu kana ka ooda nii de, mpbrinah namu Utux Tmninun, Utux Baro su ma, mpqbahang namu kari na. 31Niqan mnughuwe ka Utux Tmninun, Utux Baro namu. Uxe maalix isu, uxe pphuqil isu ma, uxe mpchungi sndhegan na pnsdehu pusu rdrudan namu uri.”
32“Sai smiling, knxalan tgberah su. Peeyah smnalu seediq bobo dxeral, peeyah karac hini betaq karac hiya we, mnoda su ma mnbahang su so nii paru noda peni? 33Dseediq ima ka mnbahang hrenang Utux Baro meniq ckceka rana puniq ma, so yamu mnbahang na de ida namu muudus nana ho? 34Sknuwan ka Utux Baro spooda na snseengan, pnskraya, sklwiun, mccebu ma, baga paru beyax, hmkero hiqur baga ma, noda so sklwiun, mntena namu ba meniq Micrayim hiya, Utux Tmninun, Utux Baro namu meniq berah namu mnoda kana ooda nii peni? 35Gisu ptuura pqita yamu ka nii. So namu maha klaun, wano Utux Tmninun ka Utux Baro. Wano heya, uka da. 36Pqbhangun namu na hrenang peeyah karac baro ka heya. Ttgesa na yamu. Kiya uri we pqtaun namu na rana puniq na meniq bobo dxeral ma, pqbhangun namu na kari peeyah ckceka rana puniq. 37Ado wada gmaalu ba pusu rudan namu ka heya. Gmao lqlaqi mnslutuc na ma, dmoi paru beyax na dmnudul isu mlatac peeyah Micrayim. 38Eyux na psteme isu mremux ma bbege na dnoi namu ka dxeral daha de, wada na lwaqun ka paru ba qlhangan mgkala yamu, mntena so ali saya. 39Maanu so kiya de, asi namu ka mkela saya. Peeniq bale lhebun namu uri. Wano Utux Tmninun ka Utux Baro, uka ani ima dungal ka karac baro ma bobo dxeral da. 40Rnengo mu yamu saya ka pndakar ma gaya we, asi namu ka pyugun. Kiya ka isu ma lqlaqi mnslutuc su de maha mangal msbleyaq. Kiya uri we ali nniqun namu bobo dxeral bnege Utux Tmninun, Utux Baro namu de, maha namu bbsiyaq.”
3 Alang Qdriqan Meniq Nklaan Hido Yayung Yarden
41“Ciida, mneniq nklaan hido yayung Yarden ka Moseh. Mquri nklaan hido, pheyu 3 alang. 42Dseediq so uka qnrquwan daha ma, uxe na nseung phuqil ka seediq ssiyo na we, tduwa mremux 1 alang ckceka 3 alang nii de, mpkuudus ka heya. 43Becer kiya ka tadus brenux we nseediq Reuben kiya. Ramot dxeral Gilad we nseediq Gad kiya. Golan dxeral Basan we nseediq Menaseh ka kiya.”
Pgkela Gaya Utux Baro ka Moseh
44Nii we kiya ka gaya pnugkela na meniq berah seediq Israel ka Moseh. 45Sseengan, kari pndakar ma, gaya bneku nii we, mlatac peeyah Micrayim ka seediq Israel ciida we, kiya ka rnengo na dheya ka Moseh. 46Meniq ckceka ayu sipo Bet Peor nklaan hido yayung Yarden. Meniq Xesbon dxeral Sixon qbsuran paru Amori. Sixon nii we pnhqilan Moseh ma seediq Israel mnlatac peeyah Micrayim ciida kiya. 47Wada daha ngalun ka dxeral na. Dungal we wada daha ngalun ka dxeral Og qbsuran paru Basan uri. Kiya ka 2 qbsuran paru Amori, dxeral nklaan hido quri yayung Yarden, dxeral mquri knklaan hido: 48Peeyah Aroer ssiyo ayu Arnon betaq dgiyaq Sion. Kiya ka dgiyaq Xermon. 49Dungal we kana Arabah mquri nklaan hido yayung Yarden. Mquri nklaan hido betaq rcilung Mhuqil smdaling deriq dgiyaq Pisgah.
Currently Selected:
Mege Gaya 4: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
