Mege Gaya 33
33
Smbleyaq Pnswayan Drudan Israel ka Moseh
1Kari nii we hniti smbleyaq seediq Israel berah qnhdean kndesan Moseh seediq utux. 2Rmengo ka heya:
“Utux Tmninun we kndalax Sinay meyah,
peeyah Seir ptruura dheya ka Utux Tmninun,
kndalax dgiyaq Paran peeyah knledax.
Peeyah ckceka knhbragan mrtaso,
kndalax narac baga na peeyah gaya msrana.
3Bale ba gmaalu kana seediq ka heya,
gaga meniq baga na kana ka dseediq mrtaso na,
mptleung toma papak su ka dheya,
maangal tnugesa su.”
4Bnege gaya ita ka Moseh,
kiya ka pusu dnoi seediq Yakobu ka kiya.
5Utux Tmninun we, mqbsuran paru meniq Yesurun.
Msuupu mqaras hiya ka dqbsuran mdudul ma txtaxa pnswayan rudan Israel.
6Tai so uxe mphuqil, mpkuudus ka Reuben,
ani so ini khbaro ka dheya.
7Quri so Yehudah we, so nii ka rnengo na,
“Utux Tmninun! Braho su bhangi ka hrenang Yehudah,
dmnudul heya pbrinah dseediq na.
Ririh heya nanak dmoi baga na mccebu,
isu we mpdayo su heya mpccebu pais.”
8Quri so Lewiy, rmengo ka heya:
“Tai so Tuming ma Uring su we meniq dseediq niqan snhiyan hiya.
Pnseengan su meniq Masah hiya ka heya,
pkeekan su kari heya meniq su qsiya Meribah hiya.
9Quri so tama bubu ta nanak we, rmengo ka heya: Ini mu ba lnglungi na.
Mtswai na we, ini mu ngali,
lqlaqi na we, ini mu klai.
Ado thei kari su ka seediq Lewiy,
tleus muyu sndhegan su.
10Stgesa daha Yakobu ka gaya bneku su,
stgesa daha Israel ka gaya su.
Psqama malu sknexan pskenux sunan ka dheya,
mege snapuh pnqhedu psqama bobo spuhan ka dheya.
11Utux Tmninun, sbleqi heya ka dnoi na,
qrasi heya ka qneepah baga na.
Paqi hiya ka hwinuk seediq mccebu heya,
so uxe maha mnpusal mtutuy ka dseediq tmnraqil heya.”
12Quri so Binyamin we, rmengo ka heya:
“Sgaalu ba Utux Tmninun we, mptheyaq meniq Utux Tmninun,
mpqlahang heya klaai ka Utux Tmninun,
heya uri we meeniq ckceka ahing Utux Tmninun ka heya.”
13Quri so Yosehu we, rmengo ka heya:
“Tai so sblequn Utux Tmninun ka dxeral na,
maangal dremus peeyah baro ma,
qsiya peeyah toma dxeral.
14Maangal malu gnhei pnrdaxan hido ma,
gnhei malu ckceka knledax idas.
15Maangal tgmalu dnoi ddgiyaq cbeyo,
Tgmalu dnoi ddgiyaq betaq ani knuwan.
16Maangal tgmalu dnoi ckceka na hiya,
maangal qnaras ani meniq ckceka dupi.
Tai snbleyaq nii we maha tunux Yosehu,
maha meniq tunux dseediq pnsnakan peeyah mtswai na.
17Pnlaale ba mtuting ckceka dpdapa ka heya,
niqan ba paru knpruwan.
Urung na we urung camac bbuyu.
Rungun na betaq puting dxeral ka kana seediq qnlhangan.
Urung nii we, kiya ka khaya mang Eprayim,
urung nii we, kiya ka khaya seng Menaseh.”
18Quri so Jebulun we, rmengo ka heya:
“Jebulun! Tqqaras meyah nganguc ka isu.
Yisaskar! Tqqaras meniq su truma kobu.
19Heya we mplawa hbaro seediq meeyah dgiyaq baro,
msapuh snapuh msderux hiya ka dheya.
Ado maangal qnbleyaq dnoi peeyah ckceka rcilung ka dheya,
pusu dnoi gaga reesun ckceka bnaquy.”
20Quri so Gad we, rmengo ka heya:
“Naka spruun ka pnrana qnlhangan Gad!
Mntena gipu rkelic rudu tqeraq ka Gad,
cmilaq sapic ma qmraqil tunux camac ka heya.
21Sgao na tgmalu bale ka heya nanak,
ado knrngiyan mangal pusu beyax kiya.
Mtheyaq qbsuran mdudul ka heya,
mooda msderux noda Utux Tmninun ma,
gaya bneku pnheyu na Israel ka Utux Tmninun.”
22Quri so Dan we, rmengo ka heya:
“Rkelic biciq ka Dan,
msbolung peeyah Basan.”
23Quri so Naptaliy we, rmengo ka heya:
“Naptaliy! Mnangal su knttuku huwe ka isu,
stngayan snbleqan Utux Tmninun,
ani nak mangal dxeral quri pryaxan hido ma quri toma na.”
24Quri so Aser we, rmengo ka heya:
“Tai so maangal snbleqan meniq ckceka lqlaqi ka Aser,
tai so maangal qnaras mtswai na ka heya,
tduwa na rbegun ckceka abura hiya ka papak na.
25Ruhu rhengun su we snmalu xiluy ma xiluy limuk.
Knhenu ali su we, knhenu nanak ka beyax su uri.”
26“Yesurun! Uka ani ima mpsdungus Utux Baro!
Paapa plabu ka heya, ptuura knledax na,
peeyah karac baro meyah dmayo sunan.
27Tkwaxan ka Utux Baro peeyah cuxal,
niqan beyax hiqur peeyah cuxal.
Lmiwaq pais peeyah berah su ka heya,
rmengo: Pqhedu pkuuka!
28Kiya de, tbleyaq meniq nanak ka Israel,
meniq dxeral pyahan uuqun ma sino bgurah ka pusu hrean qsiya Yakobu,
hmebuy dremus uri ka karac na.
29Israel! Niqan su ba qnbleqan!
Dseediq dnoi baga Utux Tmninun! Ima ka maha mntena isu?
Qeerung mdayo sunan ka heya,
hlmadac knledax sunan ka heya.
Mpstemaq berah su ka pais su.
Mpqleqah su bukuy daha ka isu.”
Currently Selected:
Mege Gaya 33: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
