2 Petros 2
2
Mnnangi Mpgeela Kari ma Dmptgesa
1Cbeyo we niqan ka mnnangi mpgeela kari. Mntena so nii, meyah yamu hiya ka mnnangi mtgesa uri. Gruusun daha psteme ka qnuuqu tnugesa pgedang seediq. Betaq ini thei pusu sapah daha ma, ini beyo maangal kkgedang. 2Hbaro ka seediq mpsnegul mbesu daha truma, kiya de ririh dheya wada betaq snyanun ka kari bale ba. 3Dheya we ririh snqnruwan lnglungan daha, spooda daha kari mberiq maha maangal rrihan daha peeyah heyi namu. Pkdira daha we uxe mpsgcuqi. Uxe beyo meyah ka kkgedang daha.
4Utux Baro we ini na srwai ka dsnkgulan baro niqan qnquwan noda de, wada na asi hteri tuxan pkdraan hiya tmara psgeegan. 5Wada ini srwai Utux Baro ka knxalan cbeyo, betaq smkagul rnecux knxalan ini kstuutux ciida. Wano 8 heyi tnsapah Noax mprengo kari msderux noda ka wada qlhangun. 6Pnsgeegan Utux Baro ka Sedom ma Amorah de, betaq mtakur ma tnemu psqama. Kiya de so maha pkiicu seediq ini kstuutux nexal. 7Wano Lot seediq msderux noda mnaqah kuxul lmngelung mbesu truma dseediq naqah. 8Ado seediq msderux noda we ga meniq ckceka daha, lhebun msderux na we mqraqil riyung klaali qmita ma mbahang qnnaqah noda daha. 9So kiya de, Bukung we mdoi baga dseediq kmstuutux mlatac peeyah pssengan. Seediq ini ksderux noda we htiun na peeniq pnkdira tmara ali psgeegan. 10Maha krnahun so nii ka dseediq mquri heyi, kmraguh heyi qnrutiq, smbiciq qmita pusu beyax Bukung.
Dheya we paru pahung daha ma mnhemuc riyung, ini bale kiicu smngayan niqan knledax spruun. 11Ani mgkala paru beyax na ka snkgulan baro we, ini doi kari sngayan pgkela psgeegan peeyah Bukung ciida. 12Dseediq nii we mntena so camac uka lnglungan, ida so klegan camac qqrapun ma pphqilun. Dheya we smngayan ooda ini daha klai. Ga pqnaqah seediq ciida ka dheya we, dheya nanak ka mnaqah. 13Wada mangal nanak sntkean daha ini ksderux noda. Dheya we smkuxul mqaras ani diyan. Wada srtiqan ma niqan qnnaqah de ga msuupu yamu mqaras. Ngalan daha qrasun ka qqberiq daha. 14Doriq daha we ga stngayan mbesu truma, kiya ka qnquwan noda uka hteran. Psridil lhebun seediq ini psdehu, mtluhhe snqruwan ka qnquwan lnglungan daha, kiya ka bale ba klegan syusan Utux Baro ka dheya. 15Laxan daha ka elu msderux, mquri elu msridil. Smnegul elu Bilam laqi Beor. Bilam we kiya ka smkuxul riyung pila sntkean pnooda ini ksderux noda. 16Ado qnquwan na nanak wada mangal psruwan heya. Dapa roba ini kela rmengo we dmoi hrenang seediq hmetur pnsparu mpgeela kari.
17Seediq nii we mntena uka qsiya saun bubul, plabu qnada paru bgihur. Mnkuung riyung ka kuung we kiya sseku dheya. 18Dheya we rmengo kari tmdahu skbrhuwan, dmoi kkraguh heyi ma ooda skbesu truma pkridil seediq hani mnlatac pneyah qnquwan kndesan. 19Sntangan ptraguh seediq ka dheya we, dheya nanak ka tnqliyan msburo. Ado ga pexan seediq ka ima de, kiya ka tnqliyan nepix nheya. 20Nasi mnkela Bukung ta ka dheya ma Yesu Kiristo Bukung mdoi baga ta, kiya de mlatac qnrutiq bobo dxeral. Bobo na de, wada bkeun ma pexun qnrutiq dungal. Bobo na ciida de mpgkala krrinah naqah pntnaun pnrading ka nhdean daha da. 21Mkela elu msderux noda ka dheya, wada daha lixun ka gaya mrtaso bnege dheya. So kiya de nuuqu malu ini kela ka so nii. 22Malu ka rnengo seediq, kari nii we ga mndungus bale heyi daha:
“Mbrinah mekan pnberih na nanak ka huling.”
Rmengo dungal:
“Tnrmaan ka babuy de, wada mbrinah treeru celaq dungal.”
Currently Selected:
2 Petros 2: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
