2 Qbsuran Paru 25
25
1Ali 10 idas 10 tg9 knkawas qnlhangan na ka Cidqiyahu ciida, Nebukadnecar qbsuran paru Babirun we madis kana supi na meyah mccebu Yerusalem. Dheya we pkobu mquri alang ma, smmalu qbrangan mtqiri bukuy alang. 2Tmlibu betaq tg11 knkawas qbsranun Cidqiyahu. 39 ali 4 idas knkawas ciida, ado daan krayan ka truma alang, kiya ka uka ba uqun ka seediq dxeral hiya da. 4Wada hrahun ka pnharac qnalang alang de, keeman ciida kana supi we asi peeyah smdaling qnpahan qbsuran paru ma, rhengun cenga 2 alang hiya qduriq. Gisu mtqiri tmlibu alang ka seediq Krdiya we, mquri Arabah qduriq ka qbsuran paru. 5Supi Krdiya we smdurak bukuy qbsuran paru ma, sklaan daha breenux Yerixo hiya. Wada ini baka kana ka supi na ma, malix heya mkrehak qduriq kana da. 6Seediq Krdiya we qrapun daha ka Cidqiyahu ma, desun daha qbsuran paru Babirun gaga Riblah hiya. Kiya de sbege daha niqan qnquwan noda ka heya. 7Phqilun berah Cidqiyahu ka lqlaqi na ma, wada gqeran mangal doriq Cidqiyahu ma, saangal daha bekuy limuk ka mekuy heya ma, desun daha betaq Babirun.
Hrahun ka Sapah Thmkuwan
(Yir 52:12-33)
87 ali tgrima idas kiya ma tg19 knkawas qbsranun paru Babirun ka Nebukadnecar qbsuran mpqlahang ciida, dqbsuran mdayo qbsuran paru Babirun ma, Nibusaradan we mosa Yerusalem. 9Psqmai daha ka sapah thmkuwan Utux Tmninun, sapah qbsuran paru ma, kana spsapah Yerusalem. Sdoi daha puniq wada psqama paru sapah seediq. 10Msuupu thlangan mpqlahang ka supi Krdiya we, wada daha hrahun kana ka pnharac qnalang alang mtqiri Yerusalem. 11Ciida, Nibusaradan qbsuran mpqlahang we, wada na qrapun madis kana ka seediq mntngari alang hiya ma, dseediq wada ini baka qbsuran paru Babirun ma, duma seediq hiya. 12Kiya de Nibusaradan qbsuran mpqlahang ge, rngiyan na hiya ka duma seediq tgqrinuc ba we, ngalan na mpqeepah qnpahan lipas, mpqeepah dxeral.
13Eruc limuk, tlungan limuk ma, smseman limuk sapah thmkuwan Utux Tmninun we, wada gremun seediq Krdiya ma, kana limuk nii we wada daha desun Babirun. 14Dungal we wada daha desun ka kana limuk, dahur, daquc, pngerah sara, dahur begu ma, kana qyqeya xiluy limuk dooyun smapuh. 15Ani king ma ging ka sara psaan bagah ma pngerah we, ida wada desun qbsuran mpqlahang kana da. 16Dungal we 2 eruc, 1 smseman limuk ma, tlengun limuk snmalu Selomoh gaga sapah thmkuwan Utux Tmninun. Kana limuk qyqeya nii we, uka snqlingan smeung. 17Eruc limuk nii we knbragan na we 18 sese, puting ba bungu na we ida limuk ma, 3 sese ka knbragan na. Mtqiri tunux na we gaga pdpingan kadi limuk ma qutirodux so qutirodux snmalu limuk. Tg2 eruc we, mntena so nii, ida niqan kadi uri.
Qrapun Desun Babirun ka Seediq Yehudah
(Yir 52:24-27)
18Qbsuran mpqlahang we, qmerac Serayah pusu msapuh, Cepanyahu mdayo msapuh ma, 3 heyi mpqlahang sapah thmkuwan. 19Dungal we qrapi na ka 1 qbsuran mdudul supi meniq ckceka alang ma, slayan na alang hiya ka 5 heyi mdayo qbsuran paru meniq berah na ma, qbsuran supi matis mplawa seediq hiya ma, 60 heyi seediq hiya. 20Nibusaradan qbsuran mpqlahang nii we qrapun na ka dheya ma aadis na qbsuran paru Babirun gaga Riblah hiya. 21Qbsuran paru Babirun we, phuqil dheya ma, wada na phqilun Riblah dxeral Xamat hiya ka dheya. So kiya wada qrapun mlatac dxeral daha nanak ka seediq Yehudah.
Gedalyahu Mpqlahang Dxeral Yehudah
(Yir 40:7-9, 41:1-3)
22Quri so dseediq mnsngari Yehudah, kiya ka knrngiyan Nebukadnecar qbsuran paru Babirun. Nebukadnecar qbsuran paru Babirun we, pheyu Gedalyahu laqi Axiqam, lqlaqi laqi Sapan mpqlahang dheya. 23Mbahang wada pheyu Gedalyahu mpqlahang ka qbsuran paru Babirun de, kana qbsuran supi ma dseediq na ma, Yismael laqi Netanyah, Yoxanan laqi Qarex, Serayah laqi Tanxumet seediq Natopat ma, Yaajaneyahu seediq Maakah we, meyah Gedalyahu gaga Micpah hiya kana. 24Smdehu rmengo dheya ma kana dseediq na ka Gedalyahu: “Iya kiicu dqbsuran mdayo Krdiya. Asi eniq hini ma, qmeepah quri qbsuran paru Babirun. Kiya de mangal namu mpbleyaq.” 25Idas 7 knkawas ciida, Yismael laqi Netanyah, lqlaqi mslutuc Elisama lutuc tnsapah qbsuran paru we, maadis 10 heyi seediq, mosa Micpah phuqil Gedalyahu ma, dseediq Yehudah ma Krdiya gaga Micpah mnsuupu heya. Wada na phqilun ka dheya. 26Kiya de kana seediq, ani paru ma biciq, ani dqbsuran supi we, ado miicu seediq Krdiya de, mtutuy mquri Micrayim qduriq ka dheya.
Pltadun ka Yehoyakin
(Yir 52:31-34)
27Ewil Merodaq ka mqbsuran paru knkawas na qnbsrangan Babirun, kiya ka bobo qnrapan 37 knkawas, pkelu 27 ali 12 idas ciida, sbleqan na ka Yehoyakin qbsuran paru Yehudah ma, pltadun na peeyah sapah kuung ka heya. 28Sbleqan daha mege malu kari ma, spgkala daha tluungan mnsuupu qnrapan ma dqbsuran paru mnsuupu Babirun ka heya. 29Dungal we plaxun na ka lukus pnlkusan sapah kuung ma, betaq hnqilan msuupu mekan uqan qbsuran paru Babirun ka heya. 30Qbsuran paru we, mege uqun na klaali, 1 ali we 1 ka uqun, ida so kiya kana kndesan na.
Currently Selected:
2 Qbsuran Paru 25: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
