1 Timoteos 5
5
Qqpahun Quri Dseediq Icil
1Iya kseengi paru ka ddrudan rseno, ngali so tama su dmudul heya. Ngali so mtswai su ka mbbeyax. 2Rudan mqedil we ngali so bubu su. Mqedil mbeyax we ngali so mtswai su, pniqi uka qnquwan dmayo dheya.
3Sprui ka bale ba mqedil ga mqrinuc. 4Nasi niqan laqi na ka mqedil mqrinuc de, uxe uri we niqan lqlaqi laqi na we, prdingi psluhe mbahang drudan, cmiyuk malu ddrudan meniq sapah daha nanak han. Ado qrasun mangal meniq berah Utux Baro ka so nii. 5Uka sdharan na ka mqedil mqrinuc we wano Utux Baro ka stmaan daha. Ani diyan ani keeman ini setuq mesa dmurun. 6Kiya de tmqaras riyung ka mqedil mqrinuc ge, ani ga muudus we ririh ga mhuqil. 7Ooda nii we tgsai bale dheya. So maha uka ttyuan ka dheya. 8Nasi ini psbrinah qmlahang tndadal daha ka seediq we, kiya ka so tnsapah daha nanak uri we, kiya ka nii malix snhiyan da. Nuuqu malu dseediq ini snhii.
9Ppatis ngayan ka dmqedil mqrinuc we, asi ka mnkala 60 knkawas. Heya we mqedil nkingal ba rseno. 10Asi ka niqan malu ngayan na, mntena so dmanga laqi, pteme seediq tnooda, trima papak snkgulan mrtaso, dmayo seediq moda mqraqil ma, meepah riyung malu qneepah. 11So quri dmqedil mqrinuc mbbeyax we, isu we iya srwai ppatis ngayan daha. Ado lmngelung rseno ma tbrinah Kiristo ciida de mkmosa rseno ka dheya da. 12Ngalun qnquwan noda ka dheya ado wada qmada sndhegan daha pnlaale. 13Uxe wano kiya, dheya we smluhe mbserux, smluhe mkrhengun sapah. Uxe wano mbserux nanak, smkuxul riyung smnetur seediq. Smkuxul rmengo ani maanu ma, rmengo kari uxe rrengo.
14Maanu so kiya de, quri so mqedil mqrinuc mbbeyax na we, osa rseno ma tmlaqi ma dmanga laqi. Qmlahang oda sapah ma, iya pngali ssngayan ptsiiyax dpais. 15Ado tena wada msridil smnegul Satang ka duma seediq da. 16Netun niqan mqedil mqrinuc ka dmqedil snhii we, dyagi ka dheya, iya pskuuwic pssliyan. Tai so maha dmayo mqedil qrinuc bale ba uka stmaan daha.
17So dmkela ba tmgesa pssliyan mpqlahang, kiya ka mdrumuc riyung tmgesa na we, naka prnaun snparu mita ka dheya. 18Ado ga rmengo ka Kari Utux Baro: “Qmtemaq miriq mugi ka dapa ciida we, iya gmuki ka quwaq na.” Kiya rmengo dungal: “Sduwan ka mpqeepah we bale ba ka kiya.” 19Mege qnquwan rmengo rudan mpqlahang ka seediq we, iya psrwai, asi ka niqan daha ma teru seediq meyah pgkela na. 20Ida ini setuq meepah naqah nana we, asi kseengi berah seediq. So maha miicu ka seediq uri. 21Meniq ku berah Utux Baro, Kiristo Yesu ma, berah snkgulan baro rmengo ku sunan, pyugi bale ka kari nii. Iya bale psaanak, iya peeniq pkciicil lnglungan uri. 22Iya ptkeeyux moda ptgaya psino. Iya tuumal qnquwan noda seediq, qlhangi ka isu nanak so maha uka qnquwan. 23Quri so rkebul su, mnarux su klaali uri we, iya wano qsiya ka mahun su. Asi su ka mimah tikuh sino.
24Truura qnquwan daha ka duma seediq we, wada pllayan psgao ka kiya di. Duma seediq we gisu meyah bukuy nana ka qnquwan daha. 25Mntena so nii, mtuura duma ka malu qnpahan uri, ani ini truura na we maha uxe lliingan.
Currently Selected:
1 Timoteos 5: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
