1 Korinto 5
5
Ini Srwai Meepah Mkmhemuc Msuupu
1Bale ba mnbahang ku ckceka namu we niqan meepah mmhemuc msuupu. Ini ba slai ani ckceka seediq icil qnlhangan ka so nii. Kiya ka ga mangal mqedil tama na ka taxa namu mesa. 2Kiya de ida namu krinah psparu na! Uxe namu naka naqah kuxul ma sqada namu peeyah ckceka namu ka seediq qmneepah nii peni? 3-4Ani ku ini eniq yamu hiya we ida msuupu yamu ka lhebun mu. Mntena ku so mtheyaq yamu hiya. Spooda mu ngayan Bukung ta Yesu wada mu psgeegun ka seediq qmneepah so nii. Msseli namu ciida, mtheyaq yamu ka lhebun mu. Yamu we spooda namu beyax Bukung Yesu, 5bqani Satang ka seediq so nii. Maha mnaqah ka heyi na ma utux bgihur na de maha pkdusun meeniq ali Bukung.
6Uxe malu ka so nii psparu namu. Ani biciq tgeda ka pllabu kana qnrugan pang we ini namu klai peni? 7Bale ba pang uka tgeda pllabu ka yamu. Maanu so kiya de pkuuka peeyah yamu ka kana cmucac tgeda pllabu, kbgurah namu kklegan pang. Ado miric smseman hrnasan ta ka Kiristo ma wada ta paqun ma ssapuh da. 8Maanu so kiya de dae ta ka smseman hrnasan. Iya ta daani cmucac tgeda pllabu. Kiya ka tgeda pllabu naqah lnglungan, tgeda pllabu sseku naqah lnglungan. Daani ta pang ini psai tgeda pllabu. Pang nii we mrtaso ma bale ba.
9Iya spui theyaq ka seediq qmeepah mmhemuc msuupu. Mnesa ku rmengo yamu patis tgberah na. 10Kiya de kari tniyu mu we uxe kana seediq ga meepah mmhemuc msuupu, qnruwan lmngelung, mpgeeluk gmeeguy, thmuku tikung. Nasi so kiya de asi namu ka mlatac peeyah bobo dxeral nii kiya di. 11Maanu so saya de matis ku patis yamu, nasi kesun mtswai ka seediq we ida ga meepah mmhemuc msuupu, snqruwan lmngelung, thmuku tikung, mpsngayan, bsukan, mpgeeluk gmeeguy we iya spui theyaq ka seediq so nii. Ani kesun mekan hnpure uri we ini tduwa uri. 12Maanu pnugluban ta seediq ini eniq pssliyan ta ho? Uxe seediq ga meniq ita pssliyan ka psgeegun namu peni? 13Utux Baro ka mpsgeegun seediq ini eniq pssliyan. Mntena so ga spatis Patis: “Liwaq peeyah ckceka namu ka naqah seediq.”
Currently Selected:
1 Korinto 5: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
