1 Korinto 14
14
Rmengo Kari Utux ma Kari Mpgeela Kari
1Yamu we hbragi mangal ka gnaalu. Skxeli ba migin ka pndungus Bgihur Utux. Ggarang namu kari Utux Baro ka pgsai bale. 2Ado rmengo kari utux we uxe seediq ka srengo na, Utux Baro ka ga na srengo. Ado uka ka mkela mbahang. Heya we mnoda Bgihur Utux rmengo ani maanu lneing. 3Kiya de gmarang kari Utux Baro we seediq ka srengo na. Kiya de pgdehu pheyu, pkbeyax lhebun ma dmudul seediq. 4Rmengo kari utux we dmayo heya nanak. Gmarang kari Utux Baro we dmayo pssliyan. 5So namu maha rmengo kari utux ka yamu. Mgkala hiya dungal we so namu maha gmarang kari Utux Baro. Ado rmengo kari utux ge, nasi ini tglui ka kari na we uxe mmdehu pheyu pssliyan. So kiya de nuuqu malu ka gmarang kari Utux Baro.
6Mtswai, mosa ku yamu hiya we nasi ku rmengo nanak kari utux ma ini doi ptuura, knkela, kari pgeela, kari gnarang ma betaq mu tgsaan bale ka tnugesa we huwa mu kesun peeniq rrihan yamu? 7Ani kesun duma qyqeya so deerang ma tlbegan ge, ani uka knuudus we ida hmrenang. Hrenang daha we nasi ini psnaki de huwa ta kesun mkela ka niyuk na tnubu na ho? 8Nasi ini tgleexan ka hrenang iyuk de ima ka mpsramal mccebu di ho? 9Keso kiya ka yamu uri. Nasi ini sleesi mbahang ka kari utux rnengo hema we huwa kesun mkela ani ima ka rnengo namu ho? Yamu de skbrhuwan ka rngagan namu! 10Mtqiri qnlangan nii we lmlamu ka klegan kari ma uka ani 1 ka uka elu kari. 11Nasi mu ini klai mbahang ka kari rmnengo kenan de ngalan ku na daha uxe mnatis ma ngalun so uxe mnatis ka dheya uri 12Keso kiya ka yamu uri. Smkuxul namu migin pndungus Bgihur Utux. Kiya de pgsai bale ka pndungus na ppgdehu pheyu pssliyan.
13Maanu so kiya de rmengo kari utux we asi ka dmurun ddehuk na psaalu kari utux na. 14Nasi ku dmurun kari utux we utux mu ka dmurun. Kiya de ini pgheyi ka lnglungan mu. 15So kiya de huwa mu kesun ho? Moda ku utux dmurun ma moda ku lnglungan mu uri. 16Nasi uxe so kiya de ani su moda utux tmdahu ge, so uka pndungus kari utux ka seediq tnluung hiya we, ado ini na klai mbahang ka kari su de, huwa na kesun mesa “Ameng” mqaras su cida ho? 17Ida malu ka qnaras su. Kiya de ini pgdehu pheyu txaun ka kiya. 18Mgkala ku yamu rmengo kari utux we qrasun mu Utux Baro. 19Kiya de meniq ckceka pssliyan de nuuqu malu ka spooda mu lnglungan rmengo 5 kari tmgesa seediq, mgkala rmengo mang kari utux.
20Mtswai, iya qlaqi lnglungan namu. Quri oda naqah we mgrabu. Kiya de krudan ka lnglungan namu. 21Ga spatis Patis Mrtaso:
“Rmengo ka Bukung:
‘Pooda mu hema seediq qnlhangan icil ma,
quwaq seediq qnlhangan icil,
mquri dseediq nii rmengo.
Ani so kiya, ini ba qbahang kenan ka dheya.’”
22Maanu so kiya de uxe pnskraya quri ga snhii ka rmengo kari utux, pnskraya quri seediq ini snhii kiya. Uxe pnskraya quri seediq ini snhii ka gnrangan pgeela kari, pnskraya quri ga snhii. 23Maanu so kiya de msseli ka kana 1 pssliyan ciida, nasi rmengo kari utux ka kana heyi daha ma meyah ka uxe ddheya, uxe uri seediq ini snhii we “Mkuni namu” uxe mpkeso peni? 24Kiya de nasi gmarang mpgeela kari Utux Baro ka kana de meyah mremux hiya ka seediq ini snhii, uxe uri we ini kela kari utux de pklaan qnnaqah ma psgeegan kana seediq. 25Kiya uri ma ptraun ka mnuleing lhebun na. Maanu so kiya de mptgtemaq dxeral ka dqeras ma mpthmuku Utux Baro, mprengo: “Bale ba nii meniq yamu hini ka Utux Baro.”
Niqan Elu Na ka Ani Maanu
26Mtswai, so kiya de huwa namu kesun ho? Msseli namu ciida, duma we muuyas, duma we tmgesa, duma we rmengo kari pnugkela Utux Baro, duma we rmengo kari utux ma duma we psaalu kari utux. Ani maanu asi ka dmayo seediq ka kana so nii. 27Nasi niqan ka rmengo kari utux ge, wano 2 heyi ma 3 heyi ka knhbaro mssriyux rmengo. Kiya de asi ka psaalu kari ka 1 heyi. 28Nasi uka ka psaalu kari na we asi ka mgmelux ckceka pssliyan. Wano rengo nanak isu ma Utux Baro di. 29Quri so gmarang kari we wano 2 heyi uxe uri we 3 heyi ka rengo. Duma na seediq we asi ka lmngelung psaanak rnengo daha. 30Nasi wada mangal kari pnugkela Utux Baro ka ga tleung ssiyo we asi ka mgmelux ka pnlaale rmengo na. 31Ado mtduwa namu msriyux gmarang kari Utux Baro kana. So kiya de kkela namu smluhe kana ma pddudul namu. 32Kiya de Bgihur mpgeela kari we ida muyu mpgeela kari. 33Ado Utux Baro we ini pprudu seediq, Utux Baro we ppsbleyaq seediq ka heya.
Meniq ta ckceka mrtaso kana pssliyan we, 34asi ka mgmelux ka mmqedil. Ado ini srwai prengo ka dheya. Asi ka thei, mntena so kari rnengo gaya. 35Nasi kmkela ani maanu ka mqedil we slingi nanak rseno su meniq sapah. Ado rmengo ckceka pssliyan ka mqedil we so ssiqa. 36Kndalax peeyah yamu ka kari Utux Baro peni? Wano yamu nanak ka dhekan na peni?
37Nasi, yaku ka snkgulan Utux Baro mesa ka duma seediq, uxe uri niqan ku Bgihur mesa we ida asi ka klaun daha ka pnatis mu yamu we ida pnosa kari Bukung. 38Nasi ini kela so nii ka seediq we asi laxi hiya. 39Maanu so kiya de mtswai mu, pgsai bale pndungus ggarang namu kari Utux Baro ma iya pdakar rrengo kari utux. 40Kana ani maanu we asi ka mnduwa ba moda elu na.
Currently Selected:
1 Korinto 14: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
